ቀጥታ, ብሪጣንያ ኣብ ኦማን ንዝርከቡ ዜጋታታ ተውጽእ፤ ኣብ መላእ ማእከላይ ምብራቕ ዝፍጸም ዘሎ መጥቃዕቲ ይቕጽል

ቀጥታዊ ሸፈነ

1. ቅድሚ 12 ደቓይቕሓድሽ ምላሽ ኤርትራ ንሓድሽ መግለጺታት ኢትዮጵያ

   ሓድሽ መግለጺታት መራሕቲ ኢትዮጵያ "ንዞባዊ ሰላምን ጸጥታን ሓደገኛ ሳዕቤናት" ኣለዎ ክትብል ኤርትራ ኣጠንቂቓ።

   ብወገን ኤርትራ ዝወሃብ ምላሽ፡ ዝበዝሐ እዋን ብመንገዲ ሚኒስተር ዜና እታ ሃገር እዩ ዝወጽእ።

   "ኣብ ዝተረኽበ ኣጋጣሚ እናተደጋገመ ዝቐርብ ሓደ ቃና ዘለዎ መዝሙር፡ ተመሳሳሊ መርዛምን ዘይሕጋውን ምንዳይ 'ልኡላዊ' ኣፍደገ ባሕሪ" እዩ ክብል ሚኒስተር የማነ ገብረመስቀል ትማሊ ለይቲ ብኤክስ ምላሽ ሂቡ'ሎ።

   "ፖለቲካዊ ጸወታ ትያትር ሰልፊ ፖተምኪን [ብልጽግና] እናሓደረ ናብ ትርጉም-ኣልቦነት ይሰጋገር ኣሎ"።

   እቲ "ብስም 'ህጹጽ ኣድላይነት ልምዓት' 'ነጺሁን ተሓጺቡን' ዝቐርብ ዘሎ ጠለብ፡ ዘርኢ ዘየድሊ ግጭትን ዘይምርግጋእን" ምዃኑ'ዩ የማነ ዝነቅፍ።

   ትማሊ ኣብ ዝወጸ ቃለመሕትት፡ ነቲ ጉዳይ ኣፍደገ ባሕሪ ካብ 2023 ኣትሒዙ ከም ዛዕባ ናብ ባይቶን ኪኖኡን ብምምጻእ ኣጀንዳ ዝገበሮ ቀዳማይ ሚኒስተር ኣቢይ ብምስላታት ዝተወንዘፈ ነቐፌታን መጠንቀቕታን ኣብ ልዕሊ ኤርትራን መራሕታን ወርዊሩ ነይሩ።

   ፕረዚደንት ኢትዮጵያ ታየ ኣጽቀ ስላሴ፡ ከምኡ'ውን ኣዛዚ ሰራዊት ኢትዮጵያ ፊልድ ማርሻል ብርሃኑ ጁላ ዝርከብዎም መራሕቲ ኢትዮጵያ ብኣጋጣሚ በዓል ዓወት ዓድዋ ኣብ ዘመሓላለፍዎ መልእኽቲ ኣፍደገ ባሕሪ ንምውሓስ ይሰርሑ ከምዘለዉ ተዛሪቦም ነይሮም።

2. ቅድሚ 2 ሰዓታትኢትዮጵያ፡ ፈተነ ሰብ ኣልቦ ‘ስማርት’ መደበር ፖሊስ ጀሚራ

   

   ኢትዮጵያ፡ ብቴክኖሎጂ ብዝተሓገዘ ሰብ ኣልቦ መደበር ፖሊስ ኣገልግሎት ክትህብ ጀሚራ።

   እዚ ከም ናይ ፈተነ ፕሮጀክት ብ9 ለካቲት 2026 ተጀሚሩ ዘሎ ‘ስማርት’ መደበር ፖሊስ፡ እኹል ኣባላት ፀጥታ ኣብ ዘይብለን መደብራት ፖሊስ፡ ተበፃሕነት ኣገልግሎት ክህሉ ዘኽእል እዩ።

   ቀዳማይ ሚኒስተር ኣብይ ኣሕመድ፡ ኣገልግሎት ፖሊስ "ብዝሓሸ ፍጥነትን ቴክኖሎጅን" ናብ ዜጋታት ክበጽሕ ዝሕግዝ ፕሮጀክት ምዃኑ ይገልጽ።

   ኣብቲ ኣብ ኣዲስ ኣበባ ኣብ ክፍለ ከተማ ቦሌ ዝርከብ ፈላማይ መደብር ፖሊስ፡ ዕግርግር ኣይረኣይን።

   ናብዝን ናብትን ዝንቀሳቐሱ ኣባላት ፖሊስ እውን የለዉን። ኣብ ዝተፈላለዩ ክፍልታት ብዝተቐመጡ ኮምፒተራትን ወይ ታብሌታትን ጥራይ እዩ ኣገልግሎት ዝህብ።

   እታ ሃገር ‘ዲጂታል ኢትዮጵያ 2030’ ብዝብል ናይ ሓሙሽተ ዓመት ዲጂታላዊ ስትራተጂ ካብ እተኣታትው ጀሚራ፡ መለለዪ መንነት፡ ስርዓት ክፍሊት፡ ኣገልግሎት ኣብያተ ፍርድን ካልኦት ትካላትን ዲጂታላዊ እናገበረት ትርከብ።

   ይኹን’ምበር እታ ድሩት ተበፃሕነት ኢንተርኔት ዘለዋ ሃገር፡ ብቴክኖሎጂ ካብ ካልኦት ሃገራት ኣፍሪቃ ድሒራ’ያ ትርከብ።

   ብተወሳኺ ብሰንኪ ግጭታትን ኩናትን ኣገልግሎት ኢንተርነት ብተደጋጋሚ ይቋረጽ እዩ።

   ሶፍትዌር ኢንጂነር ብርሃን ነጋ፡ ዲጂታላዊ ኣሰራርሓ ብዝግባእ እንተ ተተግቢሩ፡ ምንግልታዕ ከምዝንክይ ብምጥቃስ፡ በቲ ዝረአ ዘሎ ለውጢ ሕጒስ ምዃኑ ይገልጽ።

   እንተዀነ ግን፡ "ዲጂታዊ ኣፍልጦ ዘይብሎም ሰባት ብቐሊሉ ክታለሉ ይኽእሉ እዮም" ብምባል ስክፍታኡ ይጠቅስ።

   ዝያዳ ተጠቀምቲ ዲጂታላዊ ኣገልግሎት ክኾኑ ዝኽእሉ ነበርቲ ከተማታት፡ መንእሰያት፡ ትካላት ንግዲን ብሓፈሻ ተጠቀምቲ ስማርትፎናትን ብምዃኖም፡ እቲ ኣገልግሎት ድሩት ክኸውን ከምዝኽእል ይዛረብ።

   ኣብ ኢትዮጵያ ዲጂታላዊ ተበፃሕነት ዘይምዕሩይ እዩ። ውድብ ትምህርቲ፡ ሳይንስን ባህልን ሕቡራት ሃገራት (ዩኔስኮ) ኣብ ዝሓለፈ ዓመት ዝዘርግሖ ጸብጻብ፣ 79 ሚእታዊት ካብ ህዝቢ ኢትዮጵያ ኢንተርነት ከምዘይረክብ ይሕብር።

3. ቅድሚ 2 ሰዓታትመርከብ ሓይሊ ባሕሪ ኢራን ኣብ ገማግም ሲሪላንካ ጥሒላ፡ ሃለዋት ብዙሓት ኣባላታ ኣይተፈልጠን

   

   ምንጪ ስእሊ, re

   ሓንቲ መርከብ ኲናት ኢራን ኣብ ገማግም ባሕሪ ስሪላንካ ድሕሪ ምጥሓላ ዝበዝሑ ኣባላta ሃለዋቶም ከምዘይተፈልጠ ጸብጻባት ሓቢሮም።

   ኣፈኛ ሓይሊ ባሕሪ ስሪላንካ ንቢቢሲ ኣብ ዝሃቦ ሓበሬታ፡ ሃለዋት ናይ 140 ኣባላታ ከምዘይተፈልጠን፡ 32 ካልኦት ካብታ ትጥሕል ዝነበረት መርከብ ከምዘድሓኑን ጠቒሱ።

   ጠንቂ ናይታ 'ኣይሪስ ደና' ዝተባህለት መርከ እንታይ ምዃኑ ከምዘይተፈልጠ'ዩ እቲ ኣፈኛ ተዛሪቡ።

   "ኪኖ ማያትና ዘጋጠመ'ኳ እንተነበረ፡ ኣብ ውሽጢ ዳህሳስን ምድሓንን እናካይደሉ ዞባ እዩ ነይሩ። ስለዚ ድማ፡ ብዘለና ዓለምለኻዊ ግዴታ ግብረመልሲ ክንህብ ተገዲድና" ይብል ወሃቢ ቃል ቡደሂካ ሳምፓት።

   "ኣብ ማይ ጸምበለል ዝብሉ ሰባት ረኺብና፡ ኣውጺእናዮም፡ ብድሕሪኡ ምስ ኣጻረና፡ ኣባላት መርከብ ኢራን ምዃኖም ኣረጋጊጽና"።

   ብመሰረት ሰነዳት ናይታ መርከብ፡ 180 ሰባት ከምዝነበሩዋ ይእመን፡ ዋላ'ኳ ቁጽሪ ናይቶም ሃለዋቶም ዘይተፈልጠ ብንጹር እንተዘይተረጋገጸ።

   ሓይሊ ባሕሪ ስሪላንካ ናብቲ ቦታ ምስ በጽሐ ጥሒላ'ያ ጸኒሓቶም፡ ዝንሳፈፍ ዘይቲን መድሕን ህይወት ዝኾና ንኣሽቱ ጃላቡን ጥራይ እዮም ረኺቦም።

   ብመጥቃዕቲ ውስጠ-ማያውያን (ሳብማሪን) ከምዝጠሓለት ንዝገልጽ ጸብጻባት ዝነጸገ እቲ ኣፈኛ፡ ጠንቂ ናይቲ ሓደጋ ዛጊት ከምዘይተፈልጠ'ዩ ንቢቢሲ ሓቢሩ።

   ኣቐድም ኣቢሉ፡ ጸሓፊ ምክልኻል እታ ሃገር፡ ምክትል ማርሻል ሓይሊ ኣየር ሳምፓት ትዪያኮንታ ንቢቢሲ ቋንቋ ሲንሃላ ኣብ ዝሃቦ ሓበሬታ፡ ሃለዋት ናይ 140 ዝኾኑ ኣባላት እታ መርከብ ከምዘይተፈልጠ ተዛሪቡ ነይሩ።

   ዛጊት ሰራዊት ስሪላንካ ጠንቂ ናይቲ ሓደጋ እንታይ ምዃኑ ከረጋግጽ ኣይክኣለን ዘሎ።

4. ቅድሚ 5 ሰዓታትዋንጫ ዓለም 2026፡ ኢራን ክትሳተፍ ድያ?

   

   ምንጪ ስእሊ, Getty Images

   ፕረዚደንት ኣመሪካ ዶናልድ ትራምፕ ኣብ ዝሓለፈ ዓመት፡ ዜጋታት ኢራን እትርከበን 12 ሃገራት ናብ ኣመሪካ ከይኣትዉ ዝኽልክል ፈጻሚ ትእዛዝ ፈሪሙ እዩ። እዚ ድማ ስግኣታት ጸጥታ ንምምካት ዝግበር ጻዕሪ ምዃኑ እዩ ጠቒሱ።

   ተጻወትቲ ዋንጫ ዓለምን ኣሰልጠንቲን ካብዚ ውሳነ ነጻ እኳ እንተዀኑ፡ ኢራን ግን ገለ ካብ ናይ ሰበስልጣናታ ሕቶ ቪዛ ምስተነጽገ፡ ካብቲ ኣብ ወርሒ ታሕሳስ ኣብ ዋሽንግተን ዝተኻየደ ዕጫ ድልድል ምድብ ከምእትስሕብ ኣፈራሪሓ ነይራ።

   ኢራን ኣብ ዋንጫ ዓለም ክትጻወት እንተዀይና ግን፡ እታ ጋንታ እተካይዶም ጸወታታት፡ ከምኡ'ውን ኣብ ኣሪዞና ክትገብሮ ዝሓዘቶ መደብ ልምምድ ብዝምልከት ዝያዳ ምጽራይ ክግበር ተኽእሎ ኣሎ።

   እታ ሃገር ኣብ 2022 ኣብ ቀጠር ኣብ ዝተኻየደ ዋንጫ ዓለም፡ ኣብ ኢራን ጃምላዊ ጸረ መንግስቲ ተቓውሞታት ኣብ ዝተኻየደሉ እዋን እዩ፡ ኣንጻር ኣመሪካ እትርከበን ሃገራት ጸወታታት ኣካይዳ።

   ኢራን እቲ ረመጽ ብዘየገድስ ኣብ ዋንጫ ዓለም ክትሳተፍ ድያ?

5. ቅድሚ 5 ሰዓታትኩዌት ማዕበላዊ ደብዳብ ሚሳኤልን ድሮንን ይፍጸማ’ሎ

   ሰራዊት ምክልኻል ኩዌት ማዕበላዊ ደብዳባት ሚሳኤልን ድሮንን ይበጽሖ ከም ዘሎ ሕጂ ዝበጽሓና ሓበሬታ የመልከት።

   ሰብ መዚ ምክልኻል እታ ሃገር ኣብ ኤክስ ኣብ ዘውጽእዎ ሓበሬታ፡ ነቲ ዝመጽኦም ደሎ ደብዳባት ክምክትዎን ከምክንዎን ምዃኖም ሓቢሮም።

6. ቅድሚ 6 ሰዓታትትራምፕ ነቲ ዝካየድ ዝነበረ ዘተ 'ኣዝዩ ኣቕሊሉ'ዩ ርእዩዎ'- ሚኒስተር ጉዳያት ወጻኢ ኢራን- ሚኒስተር ጕዳያት ወጻኢ ኢራን

   ሚኒስተር ጕዳያት ወጻኢ ኢራን ኣባስ ኣራግቺ፡ ዶናልድ ትራምፕ፡ "ብኽፋእ፡ ነቲ መኣዲ ድርድር ቦምባታት ደርብይሉ፡" ክብል ከሲሱ።

   ንሱ፡ ኣብ ማሕበራዊ መራኸቢታት ኣብ ዝዘርግሖ ሓድሽ ጽሑፍ፡ ንኣዝዩ "ዝተሓላለኸ ኒዩክለራዊ ድርድር ኣቕሊሉ'ዩ ዝሕዞ ነይሩ -ከም ትራንዛክሽን ሪልስቴት፡" ብምባል "ዓበይቲ ሓሶታት ንክውንነት ክጐስዩ ከለዉ፡ ዘይክውንነታዊ ትጽቢታት ፈጺሙ ክማላእ ኣይክእልን'ዩ፡" ይብል።

   "ውጽኢቱ? ካብ ጽልኢ ተበጊስኻ ኣብ መኣዲ ድርድር ቦምባ ምድርባይ፡"።

   ትራምፕ "ንዲፕሎማሲን ንዝመረጽዎ ኣመሪካውያንን ጠሊሙ፡" ክብል ጽሒፉ።

   

   ምንጪ ስእሊ, Reuters

   እዚ ከምዚ እንከሎ፡ መርከብ ኢራን ኣብ ጥቓ እታ ደሴት ክትጥሕል ምስ ጀመረት ሓይሊ ባሕርን ሓይሊ ኣየርን ሲሪላንካ ንባሕረኛታት ኢራን ንምድሓን ከም ዝተላእኹን ሰብመዚ ሲሪላንካ ገሊጾም።

   ሚኒስተር ጉዳያት ወጻኢ ቪጂታ ሄራት ንባይቶ ኣብ ዝሃቦ መግለጺ፡ ካብታ "ኣይሪስ ደና" እትበሃል መርከብ፡ ናይ ርድኡና ምልክት ከም ዝበጽሖም ተዛሪቡ።

   ኣብታ መርከብ 180 ሰባት ከም ዝነበሩ ይግለጽ።

   ሄራት፡ ኣብታ መርከብ ዝነበሩ 30 ዝቘሰሉ ባሕረኛታት ናብ ወደብ ሲሪላንካ ጋለ ናብ ዝርከብ ሆስፒታል ከም ዝተወስዱ ሓቢሩ።

   ጠንቂ ናይቲ ምጥሓል ኣይተፈልጠን።

   ሓደ ኣባል ባይቶ ተቓዋሚ ሰልፊ፡ እታ መርከብ ከም ኣካል ናይቲ ኣመሪካን እስራኤልን ኣብ ልዕሊ ኢራን ዘካይድኦ ዘለዋ መጥቃዕቲ ቦምባታት ተደብዲባ ድያ ዝብል ሕቶ ኣቕሪቡ - ወግዓዊ መልሲ ግን ኣይተዋህበን።

7. ቅድሚ 6 ሰዓታትኣብ ቀጠር ዝርከብ መደብር ኣየር ኣመሪካ ብሚሳይል ኢራን ተሃሪሙ

   ሚኒስትሪ ምክልለል ቀጠር፡ ኽልተ ባለስቲክ ሚሳይላት ኢራን ንሃገሩ ዒላማ ከም ዝገበሩ ገሊጹ።

   እቲ ሓደ፡ ብስርዓት ምክልኻል ኣየር ቀጠር ክብርዕን እንከሎ፡ እቲ ካልኣይ ኣብ ኣል-ዑደይድ ኣብ ዝርከብ መደብር ኣየር ኣመሪካ ከም ዝሃረመ ሓቢሩ።

   እዚ መደብር ኣየር፡ ኣመሪካ ኣብቲ ዞባ ካብ ዘለውዋ እቲ ዝዓበየ እዩ።

   ክሳብ ሕጂ ኣብ ልዕሊ ሰባት ዝወረደ ጕድኣት ከም ዘየለ ቀጠር ገሊጻ።

8. ቅድሚ 6 ሰዓታትእስራኤል፡ ኣብ መላእ ቴህራን ዝርከብ 'ቤት ጽሕፈት ጸጥታ' ኣጥቂዐ ትብል

   እስራኤል ኣብ መላእ ቴህራን ብዓሰርተታት ዝቑጸሩ ወተሃደራዊ ዒላማታት ከም ዝሃረመት ወሃቢ ቃል ሓይልታት ምክልኻል እስራኤል ኣፍሊጡ።

   እቲ መጥቃዕቲ ንዋና ቤት ጽሕፈት ባሲጅ - ምስ ሓለዋ ሰውራ ኢራን ዝተኣሳሰር ንኡስ ወተሃደራዊ ሓይሊ - ዒላማ ከም ዝገበረ ሓቢሩ።

   ብተወሳኺ፡ መወንጨፊ ሚሳይላትን ስርዓታት ምክልኻልን፡ ከምኡ'ውን "ምስ ናይ ምድራዊ ሓይልታት ናይቲ ስርዓት ዝተኣሳሰር ዳይረክቶሬት ቀረብን ሎጂስቲክስን፡" ዒላማ ዝገበረ መጥቃዕቲ እዩ ኢሉ።

   ንሱ ወሲኹ፡ ሰራዊት ምክልኻል እስራኤል ኣብ ልዕሊ ትሕተ ቅርጺ ስርዓት ኢራን "መጥቃዕቲ ከሐይሉ" ክቕጽል ምዃኑ ይገልጽ።

9. ቅድሚ 8 ሰዓታትኣመሪካ፡ 'ኣተኵርኣ ንኹሉ ዘጥቅዓ ምጥቃዕ'ዩ'

   

   ምንጪ ስእሊ, Reuters

   ሰራዊት ኣመሪካ ምስ እስራኤል ኣብ ልዕሊ ኢራን ሓባራዊ ወፍሪ ካብ ዝጅምር ንደሓር ኣብ ኢራን ልዕሊ 2000 ዒላማታት ከም ዝወቕዐ ክገልጽ እንከሎ፡ ኢራን ልዕሊ 500 ባሊስቲክ ሚሳይላትን ልዕሊ 2000 ሰብ ኣልቦ ነፈርትን ኣወንጪፋ።

   ኣመሪካን እስራኤልን ኣብ ልዕሊ ኢራን ጽዑቕ መጥቃዕቲ ምፍጻመን ይቕጽላ ኣለዋ።

   ኣዛዚ ማእከላይ ትእዛዝ ኣመሪካ ኣድሚራል ብራድ ኩፐር ኣብ ዝሃቦ ናይ ቪድዮ መግለጺ፡ ኣብ ናይ መጀመርታ 24 ሰዓታት ሓባራዊ ስርሖም ካብቲ ኣብ 2003 ብኣመሪካ ዝተመርሐ ኲናት ዒራቕ ዳርጋ ብዕጽፊ ከም ዝዀነ ገሊጹ።

   እቲ ልኡኽ ልዕሊ 50 ሽሕ ወተሃደራት፡ 200 ነፈርቲ ውግእ፡ ክልተ መራኽብ ጽዕነት ነፈርትን ነፈርቲ ቦምባን ዘሳተፈ ኰይኑ፡ እዚ "ብኣመሪካ ኣብ ማእከላይ ምብራቕ ዝዓበየ፡" እዩ ኢሉ።

   ሓይልታት ኣመሪካ 17 መራኽብ ኢራን ብምዕናው ንመላእ ሓይሊ ባሕሪ ኢራን ከም ዝጥሓሉ ሓቢሩ።

   ሕጂ ድማ፡ "ኣተኵርኣ ንኹሉ ዘጥቅዓ ምጥቃዕ'ዩ፡" ክብል ወሲኹ ገሊጹ።

   ኣመሪካን እስራኤልን ንመከላኸሊ ኣየር ኢራንን ኣማኢት ባሊስቲክ ሚሳይላትን ሰብ ኣልቦ ነፈርትን ዒላማ ከም ዝገበራ ይገልጻ።

   ኣብ ዝሓለፈ ሒደት ሰዓታት እስራኤል ኣብ ልዕሊ ኢራን "ሰፊሕ ማዕበል መጥቃዕቲ" ትፍጽም ከም ዘላ ገሊጻ። ኣብ ሊባኖስ'ን ንሕዝቦላህ ተጥቅዕ ኣላ።

   ብተወሳኺ ምክልኻል ኣየር እታ ሃገር፡ ካብ ኢራንን ሊባኖስን ዝተተኰሱ ተወሳኺ ሚሳይላት ከም ዘበርዓነ ገሊጻ።

10. ቅድሚ 9 ሰዓታትሃገራት ኣብ ማእከላይ ምብራቕ ንዝርከቡ ዜጋታተን እንታይ ይገብራ ኣለዋ?

    ኣብዚ እዋን፡ ኣብተን ዜጋታተን ምስ ኢራን ብዝካየድ ዘሎ ውግእ ኣመሪካ እስራኤልን ዝtጸልዋ ሃገራት ዝርከቡ ሃገራት፡ ብውሑስ ንምውጻእ ይጽዕራ ኣለዋ።

    ዓባይ ብሪጣንያ እትርከበ ሃገራት ዜጋታተን ናብ ሃገሮም ንምምላስ ይዳለዋ ኣለዋ።

    ኣውስትራልያ

    ሚኒስተር ጉዳያት ወጻኢ ፔኒ ቮንግ፡ ኣውስትራልያ ነቶም ኣብ ማእከላይ ምብራቕ ተዓጽዮም ዘለዉ 115 ሽሕ ኣውስትራሊያውያን ንምሕጋዝ ምስ መገዲ ኣየራት ትዘራረብ ከም ዘላ ሓቢራ።

    እንተዀነ መብዛሕትኡ ክሊ ኣየር ናይቲ ዞባ ተዓጽዩ ኣብ ዘለሉ እዋን፡ ምውጻእ ኣጸጋሚ ከም ዝኸውን ገሊጻ።

    ፈረንሳ

    ሓደ በዓል ስልጣን መንግስቲ ፈረንሳ፡ በቲ ኩነታት ዝተሃስዩ ኣስታት 400 ሽሕ ፈረንሳውያን ዜጋታት ከም ዘለዉ ሓቢሩ።

    ተጓዓዝቲ ኣብ ሚኒስትሪ ጉዳያት ወጻኢ ክምዝገቡ ድሕሪ ዘቕረቦ ምሕጽንታ ድማ፡ ልዕሊ 25 ሽሕ ሰባት ከም ዝተመዝገቡ ገሊጹ።

    ጀርመን

    መንግስቲ ጀርመን፡ ወተሃደራዊ ምግዓዝ ናይ መወዳእታ መማረጺ ጥራይ ምዃኑ ብምግላጽ፡ እቶም ኣብቲ ዞባ በቲ ኩነታት ተጸልዮም ዘለው ኣስታት 30 ሽሕ ጀርመናውያን ናብ ዓዶም ናይ ምምጻእ ሓላፍነት ዘለዎ ኢንዱስትሪ ቱሪዝም እዩ ኢሉ።

    ኢጣልያ

    ካብ ኦማን ክወጽኡ ዘይክኣሉ 127 ኢጣልያውያን ዜጋታት ዝሓዘት ፈላመይቲ ቻርተር በረራ ብሰኑይ ኣጋምሸት ኣብ መዓርፎ ነፈርቲ ሮማ ፊዩሚቺኖ ዓሊባ።

    እቶም ናብ ሮማ ዝኣተዉ ተጓዓዝቲ፡ ንኽምለሱ ንዝሓገዞም ኤምባሲ ኢጣልያ ሞሳ ሂቦም።

    ስፔን

    ስፔን ዜጋታታ ካብ ማእከላይ ምብራቕ ከተውጽእ ጀሚራ ምህላዋ ሚኒስተር ጉዳያት ወጻኢ ጆሴ ማኑኤል ኣልባረስ ብሰሉስ ገሊጹ።

    ኣመሪካ

    ሚኒስትሪ ጉዳያት ወጻኢ ኣመሪካ ብሰኑይ ኣመሪካውያን ካብ ልዕሊ 12 ሃገራት ማእከላይ ምብራቕ ብቕልጡፍ ክወጽኡ ጸዊዑ እኳ እንተነበረ፡ ክሳብ ሕጂ ግን ናይ ምምላስ በረራታት ብዛዕባ ምህላው ኣይገለጸን።

    

    ምንጪ ስእሊ, Reuters

11. ቅድሚ 9 ሰዓታትመሓዙት ኢራን፡ ሩስያን ቻይናን ናበይ ኣተዋ?

    ዓባይ ብሪጣንያ፡ ኣብ እዋን ኲናት ኣመሪካን እስራኤልን ምስ ኢራን፡ ዋሽንግተን መደበራት ኣየር ን"ምክልኻላዊ" መጥቃዕቲ ክትጥቀመሉ ምስ ፈቐደት፡ ቴህራን ካብ ካልኦት ሃገራት እንታይ ደገፍ ክትረክብ ትኽእል ዝብለ ኣቓልቦ ስሒቡ ኣሎ።

    ብፍላይ ሩስያን ቻይናን ክልቲአን ምስታ እስላማዊት ሪፓብሊክ ጽኑዕ ዲፕሎማስያዊ፡ ንግዳውን ወተሃደራውን ምትእስሳር ኣለወን።

    እንተዀ ናብዚ ግጭት ክሳብ ክንደይ ኢደን ከእትዋ ድልዋት እየን ዝብል የዘራርብ ኣሎ።

    ዝርዝር ሓበሬታ ነዚ መላግቦ ብምስዓብ ትረኽቡዎ።

    

    ምንጪ ስእሊ, SPUTNIK/KREMLIN POOL/EPA/Shutterstock

12. ቅድሚ 9 ሰዓታትኣብ ስዑዲ ዓረብ ዝርከብ መደብር ሲኣይኤ ብድሮን ተሃሪሙ

    

    ምንጪ ስእሊ, Getty Images

    ኣብ ስዑዲ ዓረብ ዝርከብ ቤት ጽሕፈት ስለያ ኣመሪካ (ሲኣይኤ) ብመጥቃዕቲ ሰብ ኣልቦ ነፋሪት ከም ዝተሃረመ ሮይተርስ ሓቢሩ። እቶም መጥቃዕቲ ዘብጽሑ ድሮናት ናይ ኣመሪካ'ዮም ዝብል ጥርጣረ ምህላው እውን ሓቢሩ።

    ኣመሪካን ስዑዲ ዓረብን፡ ክልተ ሰብ ኣልቦ ነፈርቲ ኣብ ሪያድ ዝርከብ ኤምባሲ ኣመሪካ ከም ዝሃረማ ኣረጋጊጸን።

    እቲ ማእከል ስለያ ዒላማ ምዃኑ ዝሕብር ምልክት ግን ከም ዘይነበረ ሮይተርስ ሓቢሩ።

    ጋዜጣ ዋሽንግተን ፖስት፡ እቲ መጥቃዕቲ ንገለ ክፋል ናሕሲ እቲ ኤምባሲ “ኣፈሪሱ” ነቲ ህንጻ ብትኪ “ከም ዝዓብለኾ፡" ዝገልጽ መጠንቀቕታ ሚኒስትሪ ጉዳያት ወጻኢ ከም ዝበጽሓ ጸብጺባ።

    እቲ ኤምባሲ ብተወሳኺ "መዋቕራዊ ዕንወት" ከም ዝበጽሖን ሰራሕተኛታት "ኣብ ዘለውሉ ክዕቈቡ፡" ከም ዝተነግሮምን እታ ጋዜጣ ጸብጺባ።

    መንግስቲ ስዑዲ ዓረብ ድሕሪ እቲ መጥቃዕቲ ኣብ ዘውጽኦ መግለጺ፡ ነታ ሃገርን ዜጋታታን ንምክልኻል ኩሉ ኣድላዪ ስጉምትታት ከም ዝወስድ ገሊጹ።

    ካቢነ ሚኒስተራት ስዑዲ ዓረብ፡ ካብ ኢራን ንዝመጽእ ዝዀነ ይኹን መጥቃዕቲ መሻርኽቱ ዝህብዎ ምላሽ “ንምድጋፍ ኩሉ ዓቕምታት ንምውዳብ ድሉው ምዃኑ” ኣረጋጊጹ ክብል መንግስታዊ ማዕከን ዜና እታ ሃገር ሓቢሩ።

    ሚኒስትሪ ምክልኻል ስዑዲ ዓረብ ብወገኑ፡ ካብ ርእሰ ከተማ ሪያድ ንደቡብ ክልተ ክሩዝ ሚሳይላት ከም ዝዓገተ ሮይተርስን ኤኤፍፒን ሓቢሮም።

    ወግዓዊ ማዕከን ዜና ስዑዲ ዓረብ፡ ትሽዓተ ሰብ ኣልቦ ነፈርቲ ከም ዝፈሸላ ጸብጺቡ።

    ሰበስልጣን ስዑዲ ዓረብ፡ እቶም ፈሺሎም ዝተባህሉ ሚሳይላትን ሰብ ኣልቦ ነፈርትን ካበይ ከም ዝተወንጨፉ ኣይገለጹን።

13. ቅድሚ 9 ሰዓታትኣብ ኢራን ልዕሊ 1000 ሰላማውያን ሰባት ተቐቲሎም

    ኣብ ኣመሪካ ዝመደበሩ ተጣበቕቲ ሰብኣዊ መሰላት (HRANA)፡ ካብ 28 ለካቲት ጀሚሩ ኣብ ኢራን 1097 ሰላማውያን ሰባት ከም ዝተቐትሉ ሓቢሩ።

    ካብዚኦም እቶም 181 ትሕቲ 10 ዓመት ዝዕድሚኦም ህጻናት ምዃኖም እቲ ትካል ይሕብር።

    ቁጽሪ ናይቶም ዝቘሰሉ ሰባት 100 ህጻናት ዝርከብዎም 5,402 ከም ዝበጽሐ የመልክት።

    ኣብ ዝሓለፉ 24 ሰዓታት ጥራይ ብውሕዱ 104 መጥቃዕቲ ከም ዝተፈጸመ ይገልጽ።

    ወተሃደራዊ መዓስከራት፣ ማእከላት ሕክምናን መንበሪ ኣባይትን ከም ዝሃረሙ'ዉን ሓቢሩ።

    ሞት ተወሳኺ ኣማኢት ግዳያት ድማ ይግምግም ኣለኹ ኢሉ።

    እዚ ከምዚ እንከሎ፡ ቀብሪ ኣብ ከተማ ሚናብ ደቀንስትዮ ኣብ ዝመሃራሉ ቤት ትምህርቲ ብዝተፈጸመ መጥቃዕቲ ነፈርቲ ናይ ዝሞቱ ግዳያት ብሰሉስ ተፈጺሙ።

    ሰበስልጣን ኢራን፡ እቲ ኣብ ጥቓ መደበር ሓለዋ እስላማዊ ሰውራ ዝነበረ ቤት ትምህርቲ፡ ብዝተፈጸመ መጥቃዕቲ ነፈርቲ ልዕሊ 160 ሰባት ከም ዝሞቱ ገሊጾም።

    ቢቢሲ ነዚ ኣሃዝ ሰብመዚ ኢራን ብናጻ ኣካል ከረጋግጽ ኣይከኣለን።

    ወተሃደራዊ ሓይሊ ኣመሪካ፡ ጸብጻባት ናይቲ ፍጻመ ይምርምር ከም ዘሎ ክገልጽ እንከሎ፡ ሰራዊት እስራኤል ኣብቲ ከባቢ ዝዀነ ይኹን ስርሒት ከም ዝተኻየድ "ኣይፈልጥን" ኢሉ።

    

    ምንጪ ስእሊ, Reuters

14. 3 መጋቢት 2026ኣመሪካ ናይ ማእከላይ ምብራቕ ኤምባሲታታ ክትዓጹ ጀሚራ

    

    ምንጪ ስእሊ, Getty Images

    ኣመሪካ ኣብ ሃገራት ማእከላይ ምብራቕ ንዝርከብ ሓያሎ ኤምባሲታታ ንግዚኡ ክትዓጹ ተገዲዳ ከምዘላ ኣፍሊጣ።

    ኣብ ርእሰከተማ በይሩት (ሊባኖስ) ዝርከብ ኤምባሲ "ክሳብ ተወሳኺ ሓበሬታ ዝወሃብ" ተዓጽዩ ኣሎ። "ኩሉ ስሩዕን ህጹጽን ቆንስላዊ ቆጸራታት ተዘሪዙ" ከምዘሎ'ውን እቲ ኤምባሲ ሓቢሩ።

    እስራኤል ኣብ ልዕሊ ኣብ ሊባኖስ ዝርከብ ዒላማታት ሕዝቦላህ ዝጀመረቶ ደብዳብ ትቕጽሎ ከምዘላ ይፍለጥ። ብፍላይ ደቡብ በይሩት ቀንዲ ግዳይ ናይቲ ዘየቋርጽ መጥቃዕቲ ኣየር ኮይኑ ትርከብ። ብኢራን ዝድገፍ ጉጅለ ሕዝቦላህ ንቴህራን ዘለዎ ምሕዝነት ንምግላጽ ኣብ ልዕሊ እስራኤል ሮኬታት ድሕሪ ምውንጫፉ ሰራዊት እስራኤል ሓያል ግብረመልሲ ከምዝሃበ ይዝከር።

    ዋሽንግተን ነቲ ኣብ ኩዌት ዝርከብ ኤምባሲኣ ኣቐዲማ ዓጽያቶ ነይራ እያ።

    እቲ ግዳይ መጥቃዕቲ ድሮን ኢራን ዝኾነ ኣብ ሪያድ፡ ስዑዲ ዓረብ፡ ዝርከብ ኤምባሲ'ውን ብተመሳሳሊ ተዓጽዩ'ሎ።

    ብዘይካ'ዚ ሰራሕተኛታታ ካብቲ ኣብ ዮርዳኖስ ኣብ ዝርከብ ኤምባሲ ከምዘግዓዘት'ውን ኣመሪካ ኣፍሊጣ'ላ።

15. 3 መጋቢት 2026ቁጽሪ ዝሞቱ ወተሃደራት ኣመሪካ ይውስኽ ዳርባ ሚሳይላት ይቕጽል

    

    ምንጪ ስእሊ, Getty Images

    ቁጽሪ ብመጥቃዕቲ ኢራን ዝተቐትሉ ወተሃደራት ኣመሪካ ከምዝወሰኸ ተገሊጹ።

    ማእከላይ እዚ ሰራዊት ኣመሪካ ኣብ ዝሃቦ ሓበሬታ፡ ዛጊት እቲ ኲናት ካብ ዝውላዕ ኣትሒዙ 6 ወተሃደራት ተቐቲሎም ኣለዉ።

    ብዘይካ'ዚ፡ ሰለስተ ነፈርቲ ውግእ ኣመሪካ ኣብ ኩዌት "ብናይ ወገን ተዂሲ" ተሃሪመን ምውዳቐን ይዝከር። ኣባላተን ግን ብህይወት ክድሕኑ ክኢሎም እዮም።

    ኤምባሲ ኣመሪካ ኣብ ርእሰከተማ ሪያድ (ስዑዲ ዓረብ) ብክልተ ድሮናት ኢራን ተሃሪሙ "ድሩት" ዕንወት ከምዝወረዶ'ውን ሚኒስትሪ ምክልኻል እታ ንግስነት ሓቢሩ ነይሩ።

    ቴህራን ከምዝበለቶ ኸኣ፡ ኣብ ባሕሬን ኣብ ዝርከብ መዓስከር ሓይሊ ኣየር ኣመሪካ ዝነበረ መአዘዚ ህንጻ ብዘካየደቶ ደብዳብ ዓንዩ'ሎ።

    እስራኤልን ኣመሪካን ብወገነን፡ ሓድሽ ማዕበል መጥቃዕቲ ኣብ ልዕሊ ኢራን የካይዳ ኣለዋ።

    ሚሳይላት ኢራን'ውን ናብ ከም ዖማንን ኢማራት ዓብን ዝበላ ሃገራት ወሽመጥ ምዕላብ ቀጺሉ ኣሎ።

16. 3 መጋቢት 2026መራሒ ቻይና ኣብ ልዕሊ ጀነራላት ዝወስዶ ዘሎ ስጉምቲ ይቕጽል

    

    ምንጪ ስእሊ, Getty Images

    ፕረዚደንት ቻይና ክገብሮ ዝጸንሐ ንላዕለዎት ወተሃደራውያን ኣዘዝቲ ናይ ምብራር ስጉምቲ ሕጂ'ውን ቀጺልዎ ኣሎ።

    ሺ ዢንፒንግ፡ ኣብዚ ቀረባ መዓልታት ከም ኣማኸርቲ ከገልግሉ ንዝጸንሑ ሰለስተ ጀነራላት ኣሰናቢቱ።

    ሓደ ካብኦም፡ ላዕለዋይ ኣዛዚ ሓይሊ ምድሪ ናይቲ 'ህዝባዊ ሓርነታዊ ሰራዊት' ተባሂሉ ዝጽዋዕ ሓይልታት ምክልኻል እታ ሃገር ዝነበረ ጀነራል ሃን ወይገው እዩ።

    እቲ ኣብ 2012 ናብ ስልጣን ካብ ዝድይብ ኣንጻር ብልሽውና ተሪር ስጉምቲ ክወስድ ምጽንሑ ዝንገረሉ መራሒ ዴሳዊ ሰልፊ ቻይና ዝኾነ ሺ ዢንፒንግ፡ ነቲ ስጉምቲ ተቐናቐንቱ ዝኾኑ መራሕቲ ንምእላይ ይጥቀመሉ ኣሎ ዝብል ወቐሳ'ውን ይቐርበሉ'ዩ።

17. 3 መጋቢት 2026ፕረዚደንት ኢትዮጵያ ብዛዕባ ጉዳይ ኣፍደገ ባሕሪ ዝሃቦ ሓድሽ መግለጺ

    ፕረዚደንት ኢትዮጵያ ታየ ኣስቀ ስላሴ፡ ኢትዮጵያ ኣፍደገ ባሕሪ ንምርካብ እትገብሮ ዘላ ጻዕሪ፡ “ዘልኣለማው"ን ካብ ጉዳይ ልዑላውነት ዘይፍለን ምዃኑ ገሊጹ።

    ታየ ኣስቀ ስላሴ ነዚ ዝገለጸ፡ መበል 130 ዓመት ዓወት ዓድዋ ንምብዓል ኣብ ኣዲስ ኣበባ ኣብ ዝተኻየደ ስነስርዓት እዩ።

    እቲ ላዕለዎት ሰበስልጣን መንግስቲ፡ ኣዘዝቲ ሰራዊትን ዕዱማት ወጻእን ዝተሳተፍዎ ፅምብል፡ ብመንግስታዊ መራኸቢ ብዙሓን ኢትዮጵያ ብቐጥታ ተፈንዩ።

    “ነባርን ዘተኣማምንን ኣፍደገ ባሕሪ ናይ ምርካብ መሰልና፡ ካብቲ ሰማእታት ዓድዋ ብሓላፍነት ኣባና ዘሕድሩዎ ናይ ልዑላውነት እምነት ዘይፍለ እዩ፡” ኢሉ።

    ልምዓት ኢትዮጵያ ብተደጋጋሚ ክዕንቅፉ ዝፍትኑ ሓይልታት ንተግባራቶም ምግታእ ወሳኒ ምዃኑ’ውን ገሊጹ። እንተዀነ፡ ስም ውልቀሰብ፡ ጕጅለ ይዅን ሃገር ኣይጠቐሰን።

    ውግእ ዓድዋ ኣብ መጀመርታ መጋቢት 1896 ኣብ መንጎ ብሃጸይ ምኒሊክ ዝምርሑ ኢትዮጵያውያንን ብኦረስተ ባራቲየሪ ዝምርሑ ኢጣልያውያንን ኣብ ከባቢ ጎቦታት ዓድዋ - ትግራይ ዝተኻየደ ኰይኑ፡ ብዓወት ኢትዮጵያ ከም ዝተዛዘመ ይፍለጥ።

18. 3 መጋቢት 2026ኣመሪካ ኣብ ልዕሊ ሰራዊት ርዋንዳን ኣዘዝቱን ዝወሰነቶ እገዳ

    

    ምንጪ ስእሊ, AFP via Getty Images

    መንግስቲ ኣመሪካ ኣብ ልዕሊ ሰራዊት ርዋንዳን ኣርባዕተ ላዕለዎት ኣዘዝቱን እገዳ ኣንቢራ።

    እቲ እገዳ ምስቲ ኣብ ምብራቕ ጐረቤት ሃገር ደሞክራስያዊት ሪፓብሊክ ኮንጎ ዘሎ ግጭት ብዝተሓሓዝ'ዩ ተወሲኑ ዘሎ።

    ኪጋሊ ኢዳ ኣብቲ ብማዕድን ሃብታም ዝኾነ ዞባ ብምእታው ነቲ ግጭት ተጋድዶ ኣላ ክትብል'ያ ዋሽንግተን ትኸስስ።

    ኣብ ዝሓለፈ ወርሒ ታሕሳስ ኣብ ኣብ መንጎ ኪንሻሳን ኪጋሊን ኣብ ዋሽንግተን ስምምዕ ሰላም ተፈሪሙ'ኳ እንተነበረ፡ እቲ ግጭት ይቕጽል ምህላዉ ንኣመሪካ ኣቖጢዕዋ ይርከብ።

    ነቲ እገዳ ዝነጸገት ርዋንዳ፡ ንሓደ ወገን ጥራይ ዒላማ ዝገበረ'ዩ ክትብል ተቓውሞኣ ገሊጻ ኣላ።

    ኪጋሊ ነቶም ኤም23 ተባሂሎም ዝፍለጡ ዕጡቓት ከምዘይትድግፍ'ኳ ትምጉት እንተኾነት፡ ኣብቲ ቦታ ወተሃደራዊ ህላወ ከምዘለዋ ግን ትእመን'ያ፣ ሃገራዊ ጸጥታኣ ንምውሓስ ጥራይ ሰራዊታ ዶብ ከምዝሰገረ'ያ ትምጉት።

19. 3 መጋቢት 2026ዝርዝር ኣስማት ዝተቐትሉ ሸውዓተ ላዕለዎት ኢራናውያን ጀነራላት

    

    ምንጪ ስእሊ, Getty Images

    ኢራን፡ ዝርዝር ኣስማት ናይቶም ብመጥቃዕቲ እስራኤልን ኣመሪካን ዝተቐትሉ ላዕለዎት ጀነራላት ኣውጺኣ።

    ምስ ኣሃዱታት ሓለዋ እስላማዊ ሰውራ ኢራን ጥቡቕ ርክብ ዘለዎ ኣገልግሎት ዜና ታስኒም ከምዝሓበሮ፡ ክሳብ ትማሊ ምሸት ኣብ ዝነበረ እዋን ሸውዓተ ኣዘዝቲ ሰራዊት ተቐቲሎም ኣለዉ። እቶም ዛጊት ኣስማቶም ዝተፈልጠ እዞም ዝስዕቡ እዮም`፤

    • ብርጋዴር ጀነራል መሓመድ ሺራዝ፡ ሓላፊ ቤትጽሕፈት ጠቕላሊ ሓለቓ ስታፍ ሓይልታት ኢራን
    • ብርጋዴር ጀነራል ሳልሕ ኣሳዲ፡ ኣብ ቤትጽሕፈት ጠቕላሊ ሓለቓ ስታፍ ምክትል ሓላፊ ስለያ
    • ሜጀር ጀነራል (ሓይሊ ኣየር)፡ ሞሕሰን ዳረባጊ፡ ምክትል ሓላፊ ሎጀስቲክስን ደገፍን ሓይልታት ምክልኻል
    • ብርጋዴር ጀነራል ኣክባር ኢብራሂምዛደህ፡ ምክትል ሓላፊ ቤት ጽሕፈት ጠቕላሊ ሓለቓ ስታፍ
    • ብርጋዴር ጀነራል ጐልማረዛ ረዛይያን፡ ሓላፊ ውድብ ስለያ ፋራጃ (እዚ ሓይልታት ኣኽበርቲ ሕጊ)
    • ብርጋዴር ጀነራል ባህራም ሖሴኒ ሞትላግ፡ ሓላፊ ክፍሊ ውጥንን ስርሒታትን፡ ከምኡ'ውን ምክትል ሓላፊ ስርሒታት ቤት ጽሕፈት ሓለቓ ጠቕላሊ ስታፍ ሓይልታት ምክልኻል
    • ብርጋዴር ጀነራል ሓሳን-ዓሊ ታጂክ፡ ሓላፊ ክፍሊ ሎጀስቲክስ ሓይልታት ምክልኻል ጠቕላሊ ሓለቓ ስታፍ

    ኣቐዲማ'ውን ኢራን፡ ጸሓፊ ቤትምኽሪ ምክልኻል ዓሊ ሻምካኒ፡ ሚኒስተር ምክልኻል ብርጋዴር ጀነራል ዓዚዝ ናሲርዛደህ፡ ከምኡ'ውን ኣዛዚ ሓይልታት እስላማዊ ሰውራ ኢራን ጀነራል መሓመድ ፓክፑር ኣብተን ቀዳሞት መዓልታት ከምዝተቐትሉ ኣፍሊጣ ነይራ'ያ።

20. 3 መጋቢት 2026ሱዳን ንኢትዮጵያ 'ምትዅታዅ' ትፍጽም ኣላ ብምባል ግብረ-መልሲ ከም እትህብ ኣጠንቂቓ

    

    ምንጪ ስእሊ, Getty Images

    ብወተሃደራዊ ሓይሊ ዝምራሕ መንግስቲ ሱዳን፡ ካብ ጐረቤት ሃገር ኢትዮጵያ ዝተበገሳ ድሮናት ኣብ ቀረባ እዋን ኣብ ትሕቲ ሰራዊት ሱዳን ኣብ ልዕሊ ዝርከቡ ከባቢታት ክሃርማ ከም ዝጸንሓን ነቲ "ምትዅታዅ" ምላሽ ከም ዝህብ ከም ዘፈራርሐን መንግስታዊ ማዕከን ዜና ሱዳን (ሱና) ሓቢሩ።

    "መንግስቲ ሱዳን ኣብ ምሉእ ለካቲትን መጀመርታ መጋቢትን ኣብ ውሽጢ ሱዳን ንዝርከቡ ቦታታት ዒላማ ብምግባር ካብ መሬት ኢትዮጵያ ንዝኣትዋ ድሮናት ክከታተል ጸኒሑ'ዩ። እዚ ተጻባኢ ኣካይዳ... ኣብ ልዕሊ መንግስቲ ሱዳን ቅሉዕ ተግባር መጥቃዕቲ'ዩ፡" ክብል እቲ ማዕከን ዜና ንምኒስትሪ ጉዳያት ወጻኢ ሱዳን ብምጥቃስ ጸብጺቡ።

    እቲ ምኒስትሪ ብተወሳኺ፡ "ንሰበስልጣን ኢትዮጵያ ካብ ሳዕቤን ናይዚ ተጻባኢ ተግባራት ክእደቡ ኣጠንቂቑ፡"።

    ሱዳን ኣንጻር እቲ ዝተባህለ ምትዅታዅ፡ "ልኡላውነታን ግዝኣታዊ ሓድነታን ክትከላኸል" መሰል ከም ዘለዋ ኣረጋጊጹ።

    ሱዳን ኣብቲ ንኣስታት ሰለስተ ዓመታት ዝካየድ ዘሎ ኲናት ሓድሕድ ንጐረቤታ ኢትዮጵያ ብምትእትታው ክትከስስ እዚ ናይ መጀመርታ እዩ።

    ርክብ ሱዳንን ኢትዮጵያን ኣብ ዝሓለፉ ዓመታት ብሰንኪ ምስሕሓብ ዶባትን፡ ኣዲስ ኣበባ ኣብ ሩባ ኣባይ ብዝሃነጸቶ ዓብዪ ግድብን ሓርፊፉ ጸኒሑ እዩ።

    እታ ሃገር፡ ንተነሓናሕቲ ዕጡቓት ጕጅለታት ሱዳን ትድግፍ እያ ዝብል ክስታት እውን ይስማዕ እዩ።

    ማዕከን ዜና ሮይተርስ ኣብ ለካቲት ኣብ ዘውጽኦ ጸብጻብ፡ ኣባላት ሓይልታት ዳዕመ-ሰሪዕን መሻርኽቲ ተዋጋእትን ኣብ ምዕራባዊ ዞባ ቤኒሻንጉል-ጉሙዝ ኢትዮጵያ ብገንዘብ ኢማራት ዓረብ ዝተሃንጹ ኣብ ዝተባህሉ መዓስከራት ይስልጥኑ ከም ዘለዉ ሓቢሩ ነይሩ።

    ኢትዮጵያ ብዛዕባ እዚ ክሲ ዛጊት ርእይቶ ኣይሃበትን፤ ኢማራት ዓረብ ኣብ ግጭት ሱዳን ኢድ የብለይን ብምባል ንዝቐርበላ ክስታት ትነጽጎ።