TOOS, Turkiga oo sheegay in ay soo rideen gantaal balastig ah oo laga soo ganay Iiraan

Tebin toos ah

Abdishukri Haybe - Xuseen Xuska

1. 4 Maarso 2026War deg deg ah, Xarun ay CIA ku leedahay Sacuudi Carabiya oo la duqeeyay sida warbaahinta Maraykanku sheegtay

   

   Xigashada Sawirka, Getty Images

   Saldhig ay leedahay Hay’adda Sirdoonka Dhexe ee Maraykanka (CIA) oo ku yaalla safaaradda Maraykanka ee Sacuudi Carabiya ayaa la sheegay in uu ku dhacay weerar diyaarado aan duuliye lahayn Isniintii.

   Maraykanka iyo Sacuudi Carabiya labaduba waxay xaqiijiyeen in laba drone ay ku dhaceen dhismaha safaaradda ee Riyadh, balse ma jirto wax muujinaya in xarunta sirdoonka ay ahayd bartilmaameedka weerarka, sida ay sheegtay Reuters.

   Weerarka ayaa “burbur” ku sameeyay qayb ka mid ah saqafka safaaradda, isla markaana qiiq ku “wasakheeyay” gudaha, sida lagu sheegay digniin ka soo baxday Waaxda Arrimaha Dibadda ee Maraykanka oo uu helay wargeyska Washington Post.

   Digniintaasi waxay kaloo sheegtay in safaaradda ay soo gaadhay “burbur dhismeed”, isla markaana shaqaalaha lagu amray inay “sii joogaan goobtooda oo ay is-difaac ku ekaadaan,” sida ay tabisay Washington Post.

2. 4 Maarso 2026War deg deg ah, Xildhibaan Ingiriis ah ayaa sheegay in Britain ay tahay inay ka soo horjeesato weerarrada Mareykanka ee Iran

   

   Xigashada Sawirka, Getty Images

   Emily Thornberry, Guddoomiyaha Guddiga Arrimaha Dibadda ee Golaha Commons ee UK, ayaa u sheegtay BBC’s The World Tonight in Britain ay tahay inay “u istaagto waxa saxda ah” oo ay ka soo horjeesato weerarrada Mareykanka ee Iran.

   Waxay tiri: “Waa inaan u istaagno waxa aan aaminsanahay iyo waxa saxda ah. Aragtidayadu waa in weerarkan Iran aanu lahayn qorshe, mana aha danaha Britain in la taageero, isla markaana si kasta uma waafaqsaneyn sharciga caalamiga ah.”

   “Vietnam kumaynaa lug yeelan, markaas waa maya (ayaan dhahnay), imminka waa maya. Markaas waan saxsanayn, imminkana waan saxanahay,” ayay tiri Thornberry, oo si joogto ah u dhaliilaysay hawlgalka Mareykanka ee Iran tan iyo Sabtidii uu bilowday.

   Hadallada xildhibaanka ayaa yimid saacado kadib markii Madaxweynaha Mareykanka Donald Trump uu dhaliilay Ra’iisul Wasaaraha UK Sir Keir Starmer, isagoo leh: “Tani ma aha Winston Churchill oo aan la macaamilayno.”

3. 4 Maarso 2026War deg deg ah, Mareykanka ayaa aqoonsaday afar askari oo ku dhintay weerar ay Iiraan fulisay

   

   Xigashada Sawirka, US Army Reserve

   Milatariga Mareykanka ayaa hadda aqoonsaday afar ka mid ah askartii ugu horreysay ee Mareykan ah ee ku dhintay dagaalka kala dhexeeya Iiraan.

   Askartan ka tirsanaa Kaydka Ciidanka Dhulka Mareykanka (US Army Reserve), kana socday Taliska Taageerada 103aad ee Des Moines, Iowa, waxay ahaayeen:

   • Kabtan Cody A. Khork, 35 jir, kana soo jeeda Winter Haven, Florida
   • Sarreeye Koowaad Noah L. Tietjens, 42 jir, kana soo jeeda Bellevue, Nebraska
   • Sarreeye Koowaad Nicole M. Amor, 39 jir, kana soo jeeda White Bear Lake, Minnesota
   • Sarreeye Declan J. Coady, 20 jir, kana soo jeeda West Des Moines, Iowa

   Laba kale ayaa lagu dilay weerarkii Iiraan ku qaadday xarun milatari oo ku taalla Kuwait Axaddii, balse weli lama shaacin magacyadooda.

   Xoghayaha Difaaca ayaa Isniintii sheegay in xarun oo Mareykan ah oo ku taalla Kuwait la la duqeeyay kadib markii weerar aargoosi ah oo ay Iiraan soo qaaday uu ka baxsaday nidaamyada difaaca hawada.

   Lixda dhimasho ayaa ah kaliya khasaaraha dhimasho ee ay milatariga Mareykanku xaqiijiyeen tan iyo markii ay bilaabeen weerarrada ka dhanka ah Iiraan iyagoo kaashanaya Israa’iil.

4. 4 Maarso 2026War deg deg ah, Ra’iisul Wasaaraha Canada ayaa ku baaqay in Maraykanka iyo Israa’iil ay “ixtiraamaan xeerarka caalamiga ah”

   

   Xigashada Sawirka, Getty Images

   Hadal uu jeediyay fiidnimadii Talaadada, Ra’iisul Wasaaraha Canada, Mark Carney, ayaa ku celiyay taageerada dalkiisu u hayo howlgalka Maraykanka ee Iiraan.

   Wuxuu cambaareeyay weerarrada ay Iiraan ku qaadday rayidka iyo kaabeyaasha rayidka ee Bariga Dhexe oo dhan.

   Carney wuxuu sidoo kale ku booriyay “dhammaan dhinacyada, oo ay ku jiraan Maraykanka iyo Israa’iil, inay ixtiraamaan xeerarka iskaashiga caalamiga ah.”

   “Canada waxay ku baaqaysaa in si degdeg ah loo dejiyo colaadda, waxayna diyaar u tahay inay gacan ka geysato gaarista yoolkan,” ayuu yiri.

   Carney wuxuu intaas ku daray in wada-hadal diblomaasiyadeed, oo ay weheliso go’aan adag oo lagu gaarayo xal siyaasadeed oo ballaaran, ay muhiim u yihiin xallinta qalalaasaha iyo ka hortagga dagaal ka sii weyn.

   “Rayidka aan waxba galabsan waa in la ilaaliyaa, dhammaan dhinacyaduna waa inay ka go’naadaan helitaanka heshiisyo waara oo lagu soo afjarayo faafitaanka hubka nukliyeerka iyo xagjirnimada argagixisada,” ayuu raaciyay.

5. 4 Maarso 2026War deg deg ah, Israel ayaa sheegay inay dishay taliyihii Ciidanka Quds ee Iran

   

   Xigashada Sawirka, Getty Images

   Ciidamada Israel (IDF) ayaa sheegtay inay dishay taliyihii Ciidanka Quds ee Iran u qaabilsanaa Lebanon, Daoud Ali Zadeh, kadib weerar ka dhacay Tehran.

   “Diyaarado dagaal ayaa duqeysay bartamaha Tehran, iyagoo beegsaday Daoud Ali Zadeh, oo ahaa mas’uul sare oo ka tirsan Ciidanka Quds isla markaana ahaa taliyaha qeybta Lubnaan,” ayuu yiri afhayeenka IDF, Brig. Gen. Effie Defrin.

   Ciidanka Quds waa mid ka mid ah laamaha Islamic Revolutionary Guard Corps ee Iran.

   “Wuxuu isku dayay inuu Israa’iil ka weeraro dhulka Lubnaan, annaguna waxaan ku garaacnay oo ku dilnay gudaha dhulka Iran,” ayuu Defrin ku daray.

   Zadeh wuxuu ahaa “taliyaha ugu sarreeya ee Iiraani ah ee mas’uulka ka ahaa Lubnaan,” ayay IDF ku sheegtay bayaan, iyadoo ku eedeysay inuu “hagayay awoodda weerarrada ee Hezbollah iyo kooxo kale oo wakiillo ah.”

   “Israa’iil ma oggolaan doonto in xubno Iiraani ah oo hor istaaga soo kabashada Lubnaan isla markaana xoojiya Hezbollah ay saldhig ka sameystaan gudaha Lubnaan,” ayay IDF tiri.

6. 4 Maarso 2026War deg deg ah, Israel ayaa sheegtay inay burburisay boqolaal qalab oo gantaallada laga gano oo ay leedahay Iran

   Warbixin cusub oo lagu daabacay barnaamijka fariimaha ee Telegram, ayay ciidamada Israel ku sheegeen inay burburisay qiyaastii 300 qalab oo gantaallo laga gano oo ku yaalla Iran, isla markaana ay garaacday bartilmaameedyo dhowr ah oo ku yaalla Lebanon.

   “24-kii saac ee la soo dhaafay, boqolaal diyaarado dagaal iyo diyaarado kale ayaa si isku mar ah u garaacay boqolaal bartilmaameed oo ku yaalla Iran iyo Lebanon,” ayay IDF ku dhaheen bayaan, iyadoo ku dartay in 4,000 hub (rasas iyo gantaallo) la adeegsaday gudaha Iran tan iyo bilowgii howlgalka dhammaadkii toddobaadka.

   “Howgalkan oo qayb ka ah qorshaha difaaca, Ciidanka Cirka ee Israa’iil waxay sii wadaan hirar isdaba-joog ah oo weerarro ah oo ka dhan ah nidaamka gantaallada ballistic-ga ee maamulka Iran iyo nidaamyada difaaca cirka,” ayay IDF ku dartay.

7. 3 Maarso 2026Maamulka Donald Trump oo ku andacoonaya in Iran ay haysatay “qaddar u dhiganta 11 bam” oo yuraaniyam la naaxiyay ah.

   

   Xigashada Sawirka, Getty Images

   Mas’uuliyiin sare oo ka tirsan maamulka Trump ayaa sheegay in Iran ay lahayd “qaddar u dhiganta 11 bam” oo yuraaniyam la kobciyey bilowgii dagaalka, islamarkaana ay awoodi kartay inay u beddesho walax heer hub nukliyeer ah muddo hal toddobaad oo keliya ah.

   Iyagoo la hadlayay wariyeyaasha Talaadadii, mas’uuliyiintu waxay sheegeen in kaydka Iran uu ka koobnaa 10,000 kiiloogaraam oo yuraaniyam la kobciyey ah, kuwaas oo ku dhowaad 460 kiiloogaraam laga kobciyey heerka 60%.

   Intaas ayaana la gaarsiin kari lahaa heerka 90% oo guud ahaan loo arko heer hub nukliyeer muddo u dhexeysa “hal toddobaad ilaa toban maalmood,” ayuu yidhi mid ka mid ah mas’uuliyiinta.

   Mas’uuliyiintu waxay sidoo kale sheegeen in Iran ay tijaabisay “qolofyada hubka” iyo “qalabka qarxinta (detonators),” taas oo mas’uuliyiinta Mareykanku ku tilmaameen caddeyn muujinaysa in Tehran ay si degdeg ah u qaadan lahayd yuraaniyam heer hub ah una beddeli lahayd hub loo adeegsado cadowgeeda.

   Warbixintan ayaa ah tan ugu faahfaahsan tan iyo bilowgii dagaalka ee ku saabsan qiimeynta maamulka ee barnaamijka nukliyeerka Iran.

   Waxay imanaysaa xilli Madaxweyne Trump iyo mas’uuliyiin kale oo sare ay ku doodayaan in dagaalku uu ahaa mid lagama maarmaan u ah in laga tirtiro awoodda Iran ee horumarinta hub nukliyeer.

   Trump ayaa marar badan sheegay in weerarradii United States ay sannadkii hore ku qaaday Iran ay “baabi’iyeen gebi ahaanba” barnaamijka nukliyeerka dalkaas.

   Si kastaba ha ahaatee, mas’uul sare oo ka tirsan maamulka ayaa Arbacadii sheegay in walxo nukliyeer la kobciyey ay weli yaallaan dhammaan saddexda goobood.

8. 3 Maarso 2026War deg deg ah, Xiliga la qabanayo kulanka lagu dooranayo hoggaamiyaha cusub ee Jamhuuriyadda Islaamiga ah ee Iran oo la shaaciyay.

   

   Xigashada Sawirka, Getty Images

   Fars News Agency, iyada oo soo xiganaysa ilo ay ku kalsoon tahay, ayaa sheegtay in kulanka kama dambaysta ah ee khubarada lagu dooranayo hoggaamiyaha cusub ee Jamhuuriyadda Islaamiga ah ee Iran laga yaabo in lagu qabto “si fool ka fool ah kadib munaasabadda aaska Ali Khamenei.”

   Fars ayaa sidoo kale, iyada oo tixraacaysa ilo xog-ogaal ah, shaacisay in xafladdaasi dhici karto toddobaadka soo socda.

   Sida lagu sheegay warbixinta, “tallaabooyinka amni ee lagu qabanayo kulanka khubarada waxaa loo qaaday heerka ugu sarreeya ee suurtagalka ah.”

   Waxaan hore u soo sheegnay in dhismaha Xoghaynta Golaha Khubarada ee ku yaalla Qom maanta, iyo goobta shirarkooda lagu qabto ee Tehran shalay, lagu bartilmaameedsaday weerarro ay fuliyeen Maraykanka iyo Israel.

   Isla waqtigaas, Golaha Isuduwidda Dacaayadda Islaamiga ah ayaa bayaan ku sheegay in la qorsheynayo aaska Ali Khamenei, wuxuuna ugu baaqay “dhammaan warbaahinta” inay ka waantoobaan baahinta mala-awaalka.

   Qaar ka mid ah warbaahinta Iiraan ayaa sheegay in hoggaamiyihii la dilay ee Jamhuuriyadda Islaamiga ah ee Iran ay u badan tahay in lagu aaso barxadda Imaamka siddeedaad ee Shiicada ee ku taalla Mashhad.

9. 3 Maarso 2026War deg deg ah, Dab kacay kadib weerar diyaarado aan duuliye lahayn lagu qaaday Qunsuliyadda Mareykanka ee Dubai.

   

   Xigashada Sawirka, Getty Images

   Dab ayaa kacay kadib weerar loo adeegsaday diyaarado aan duuliye lahayn (drone) oo ka dhacay meel u dhow Qunsuliyadda Maraykanka ee ku taalla Dubai, gudaha Imaaraadka Carabta, sida uu xaqiijiyay xafiiska warbaahinta ee dowladda.

   Dabka si guul leh ayaa loo xakameeyay, ayay tidhi dowladdu. “Kooxaha gurmadka degdegga ah ayaa isla markiiba ka jawaabay. Wax dhaawac ah lama soo sheegin.”

10. 3 Maarso 2026War deg deg ah, Trump oo sheegay in Maraykanku waardiyeyn doono maraakiibka maraya Hormuz haddii ay noqoto 'lagama maarmaan'

    Donald Trump ayaa sheegay in “haddii loo baahdo, Ciidanka Badda ee United States ay bilaabi doonaan inay ilaaliyaan maraakiibta shidaalka qaada ee maraya Marinka Hormuz sida ugu dhaqsaha badan ee suurtagalka ah.”

    Dagaalka u dhexeeya Mareykanka iyo Israel ee ka dhanka ah Iran ayaa ku dhowaad gebi ahaanba hakiyay maraakiibtii ganacsiga ee mari jirtay marinka badda, kaas oo u dhexeeya Gacanka Beershiya iyo Gacanka Cumaan.

    Waa mid ka mid ah marinnada ugu muhiimsan adduunka ee sahayda shidaalka iyo gaaska caalamka, iyadoo ku dhowaad 20 milyan oo foosto oo shidaal ah ay maalin kasta maraan.

    Trump ayaa sidoo kale sheegay inuu faray hay’ad federaal ah inay bixiso “caymis khatar siyaasadeed iyo dammaanad qaadyo Dhammaan Ganacsiga Badda” ee mara Gacanka.

    “Si kasta oo ay ahaataba, Mareykanku wuxuu xaqiijin doonaa socodka Xorta ah ee Tamarta adduunka,” ayuu yiri.

    

    Xigashada Sawirka, Atta Kenare / Getty Images

11. 3 Maarso 2026Maxaa ku dhacaya doorashada hoggaamiyaha haddii Golaha Khubaradu aan la kulmin karin?

    

    Xigashada Sawirka, Getty Images

    Dhismaha Xoghaynta Golaha Khubarada ee ku yaalla Qom ayaa lala beegsaday weerarro ay fuliyeen Israel iyo Maraykanka, dhismaha ayaana la burburiyay. Kadib dilkii Ali Khamenei, golahan ayaa lagu waday inuu magacaabo hoggaamiyaha saddexaad ee Jamhuuriyadda Islaamiga ah.

    Hadda waxaa la sameeyay gole hoggaan ku-meel-gaar ah oo qaban kara waajibaadka hoggaamiyaha si aan xad lahayn, haddii saddex-meelood afar meel ee Golaha Garashada Danaha Qaranka ay u codeeyaan. Mas’uuliyiinta Iiraan ayaa ballan qaaday in Golaha Khubaradu uu sida ugu dhaqsaha badan u dooran doono hoggaamiye saddexaad.

    Dhismaha la burburiyay ee Xoghaynta Golaha Khubaradu ma ahayn goobta rasmiga ah ee shirarka lagu qabto, mana cadda inta xubnood ee Golaha weli awood u leh inay ka qaybgalaan kulan lagu dooranayo hoggaamiyaha, ama xitaa inay nool yihiin iyo in kale.

    Golaha Khubaradu wuxuu ka kooban yahay 88 xubnood, waxaana tirada ansaxinta (kooramka) ee kulanka lagu dooranayo hoggaamiye cusub ay tahay laba-meelood saddex meel dhammaan xubnaha. Taas macnaheedu waa in kulankaasi sharci noqdo oo rasmi ah, waa in ay joogaan ugu yaraan 59 xubnood oo ka tirsan Golaha Khubarada.

    Haddii tiradaas ay ka yaraato kooramka loo baahan yahay, suurtagal ma aha in la qabto kulan rasmi ah, waana in la sugaa ilaa la qabto doorashooyin dhexdhexaad ah oo lagu buuxiyo boosaska bannaan si loo gaaro tirada loo baahan yahay. Xaaladdan oo kale, haddii la qaato in Jamhuuriyadda Islaamiga ahi sii ay usii jirto, golaha hoggaanka ku-meel-gaarka ahi waa inuu sii wadaa gudashada waajibaadka hoggaamiyaha.

    Sanadkii 1989, Golaha Khubaradu wuxuu u dhaqmay si ka hor imanaysa dastuurkii waqtigaas jiray ee la ansixiyay 1979, isagoo u doortay Ali Khamenei hoggaamiye, inkastoo uusan buuxin dhammaan shuruudihii hoggaaminnimo.

    Kadib markii isla sanadkaas dib-u-eegis lagu sameeyay dastuurka oo laga saaray shuruuddii awoodda diineed ee hoggaamiyaha, Golaha Khubaradu mar kale ayuu u codeeyay Ali Khamenei si sharci looga dhigo tallaabo horey uga hor timid dastuurka.

    Sidee Maraykanka iyo Israa'iil u qorsheeyeen muddo bilooyin ah dilka Khamenei

    Sidee bay Turkiga u saameynaysaa xaaladda sii darsanaysa ee bariga dhexe

    Yaa burburiyay saddexdii diyaaradood ee dagaalka Maraykanka, sideese loo burburiyay?

12. 3 Maarso 2026War deg deg ah, Faransiiska oo u diraya markab dagaal iyo difaacyo cirka ah oo dheeraad ah Cyprus,

    

    Xigashada Sawirka, Getty Images

    Emmanuel Macron ayaa sheegay in France ay tahay “inay garab istaagto saaxiibadeenna iyo xulafadeenna gobolka”, isagoo ku daray in “mas’uuliyadda dalku ay tahay mid si adag u difaac ah”.

    “Waxaan higsaneynaa inaan nabadda dib u soo celinno sida ugu dhaqsaha badan ee suurtagalka ah,” ayuu yidhi.

    Macron wuxuu sheegay in France ay oggolaatay inay u dirto difaacyo cirka ah oo dheeraad ah Cyprus, iyo markab dagaal oo Faransiis ah kaas oo caawa gaari doona xeebaha Cyprus.

    “Waxaan la kaashaneynaa xulafadeenna iyo wada-hawlgalayaasheena Yurub si loo hubiyo in amniga bariga badda Mediterranean-ka la xaqiijiyo,” ayuu ku daray. Hoggaamiyaha Faransiiska ayaa sidoo kale sheegay inuu rejeynayo in shacabka Iran ay awoodi doonaan inay go’aan ka gaaraan mustaqbalka dalkooda.

    Macron wuxuu sheegay in milatariga Faransiisku uu ka shaqeynayo ilaalinta danaha qaran ee dalkiisa ee gobolka, isla markaana uu xoojinayo amniga safaaradihiisa.

    Ku dhowaad 400,000 oo muwaadiniin Faransiis ah ayaa ku sugan gobolka, qaar muddo gaaban iyo qaar muddo dheer, ayuu Macron xusay, isagoo sheegay in duulimaadyada dib-u-celinta ay socdaan laba ka mid ahna caawa ayay gaari doonaan Paris.

    Khariidad: Duqaymaha ka dhacay Iiraan iyo Bariga Dhexe

    Muxuu yahay qorshaha ka dambeeya beegsiga hoggaamiyayaasha Iiraan?

    Dagaalka bariga dhexe: Aaway saaxiibadii Iiraan ee Shiinaha iyo Ruushka?

    Yaa burburiyay saddexdii diyaaradood ee dagaalka Maraykanka, sideese loo burburiyay?

13. 3 Maarso 2026War deg deg ah, 'Hub awood badan leh' oo ay Iraan soo gantay oo lix askar Ameerikaan ah ku dilay saldhig ku yaala Kuweyt

    

    Xigashada Sawirka, Reuters

    Lix askari oo Mareykan ah ayaa lagu dilay weerar ay Iran ku qaadday xarun milatari oo ku taalla Kuwait maalintii Axadda, sida uu xaqiijiyay Maraykanku

    US Central Command ayaa markii hore sheegtay in saddex askari ay ku dhinteen dhacdada, balse mas’uuliyiin ayaa Isniintii xaqiijiyay in tirada dhimashadu labanlaabantay, kadib markii hal qof uu u dhintay dhaawacyadiisa isla markaana laba mayd oo kale laga helay burburka hoostiisa.

    Xoghayaha Difaaca, Pete Hegseth, ayaa xaqiijiyay in bakhaar milatari oo Mareykan ah oo ku yaalla Kuwait la garaacay markii weerar aargoosi ah oo ay Iran soo qaaday uu ka baxsaday difaacyadii cirka. “Mararka qaarkood mid baa kaa dhex bixi kara,” ayuu ku yidhi shir jaraa’id oo uu qabtay Isniintii.

    Lixda dhimasho waa kuwa keliya ee ay xaqiijiyeen milatariga Mareykanka tan iyo markii ay bilaabeen dagaal cusub oo ka dhan ah Iran iyaga oo kaashanaya Israel.

    Shirka jaraa’id, Hegseth wuxuu sheegay in “hub awood badan leh” uu ku dhacay “xarun hawlgallo istiraatiiji ah oo si adag loo adkeeyay,” isagoo aan bixin faahfaahin dheeraad ah oo ku saabsan goobta saxda ah.

    Saddex mas’uul oo ka tirsan milatariga Mareykanka oo si toos ah ula socday weerarka Iran ayaa u sheegay CBS News oo bahwadaag la ah BBC-da in askarta lagu dilay Kuwait ay ku dhaceen weerar loo malaynayo inuu ahaa mid diyaarado aan duuliye lahayn (drone). Waxay ka shaqaynayeen xafiis ku-meel-gaadh ah.

    Waxay su’aal ka keeneen in dhismaha si ku filan loo adkeeyay, iyagoo u sheegay CBS News in gaari jiidmo (trailer) ah loo isticmaalayay xafiis ahaan, iyadoo lagu hareereeyay derbiyo shub ah oo bir lagu xoojiyay oo dhererkoodu yahay 3.7 mitir si gaashaan u noqdaan.

    Mareykanka iyo Kuwait waxay leeyihiin xiriir difaac oo soo jireen ah, waxaana in ka badan 13,000 askari oo Mareykan ah ay ku sugan yihiin dalkan Khaliijka ku yaalla.

    Iran ayaa uga jawaabtay weerarrada lagu qaaday iyada iyadoo gantaallo ku ridday dalalka Khaliijka ee xulafada la ah Mareykanka. Bahrain, United Arab Emirates, Saudi Arabia, Oman iyo Qatar dhammaantood waxay la kulmeen weerarro.

    Dhanka kale gudaha Kuwait, Mareykanka ayaa xaqiijiyay in saddex diyaaradood oo dagaal la soo riday kadib waxa uu ku tilmaamay dhacdo “rasaas saaxiibtinimo” ah Isniintii.

    Muuqaallo la baahiyay ayaa muujinayay diyaaradaha oo ku dhacaya dhulka iyagoo wareegaya. Duuliyeyaashii ku lugta lahaa dhammaantood way ka boodeen diyaaradaha waxayna ka badbaadeen dhacdada.

    Warbaahinta dowladda Iran ayaa sheegtay in milatariga Iran ay soo rideen diyaaradaha, iyagoo aan soo bandhigin wax caddeyn ah.

14. 3 Maarso 2026Sawirro muujinaya qiiq ka baxaya deked shidaal oo Imaaraad leeyahay

    

    Xigashada Sawirka, Reuters

    Waxaan hore u daabacnay warbixin ku saabsan muuqaallo dayax-gacmeed iyo sawirro muujinaya dab iyo waxyeello ka dhacday Fujairah Oil Terminal ee ku yaalla Imaaraadka Carabta.

    Hadda waxaan soo baxaya sawirro dheeraad ah oo muujinaya qiiq ka kacaya dekedda shidaalka, oo ku taalla xeebta gacanka Cumaan

    Xafiiska warbaahinta ee Imaaraadka ee Fujairah ayaa sheegay in dab uu kacay ka dib markii burbur ka soo dhacay diyaarad drone ah oo ay difaacyada cirka qabteen. Si kastaba ha ahaatee, waxay intaas ku dareen in dabka la damiyay, isla markaana aan wax khasaare naf ah la soo sheegin.

    

    Xigashada Sawirka, Reuters

15. 3 Maarso 2026Ma Israa'iil ayaa Trump ku qasabtay inuu Iran weeraro?

    

    Xigashada Sawirka, Getty Images; naqshadeynta: BBC

    Madaxwaynaha Mareykanka Donold Trump ayaa hadda la hadlaya warbaahinta.

    Su’aashii ugu horreysay ee la weydiiyay Donald Trump ee ku saabsan Bariga Dhexe waxay ahayd in Israa’iil ku qasabtay inuu tallaabo qaado.

    Wuxuu ku jawaabay: “Maya, aniga ayaa laga yaabaa inaan iyaga ku qasbay.”

    Isagoo ka hadlayay Iran, Trump wuxuu yiri: “Waxaan wadnay wada-xaajoodyo la jiray waalanyahannadan, aniguna waxaan qabay aragti ah inay iyagu marka hore weerar qaadi doonaan.”

    “Maan rabin in taasi dhacdo,” ayuu yiri madaxweynaha Maraykanka. “Marka haddii wax jira, aniga ayaa laga yaabaa inaan ku qasbay Israa’iil inay tallaabo qaado.”

    Wuxuu intaas ku daray: “Waxaan u maleynayaa inay yaabeen, aniguna waan yaabay, haddana dalalkaas oo dhan ayaa la dagaallamaya iyaga.”

    Muxuu yahay qorshaha ka dambeeya beegsiga hoggaamiyayaasha Iiraan?

    Dagaalka bariga dhexe: Aaway saaxiibadii Iiraan ee Shiinaha iyo Ruushka?

    Yaa burburiyay saddexdii diyaaradood ee dagaalka Maraykanka, sideese loo burburiyay?

16. 3 Maarso 2026Ingiriiska oo hubka difaaca hawada u direysa gobolka bariga dhexe

    

    Xigashada Sawirka, PA Media

    Ingiriiska ayaa kordhinaya difaaciisa cirka ee saldhigga uu ku leeyahay Qubrus, iyadoo diraysa diyaarado ah nooca qumaatiga u kaca oo leh awood ka hortaga drones-ka, sida uu sheegay Ra’iisul Wasaare Keir Starmer.

    Starmer ayaa sidoo kale sheegay in markabka burburiya difaaca cirka ee HMS Dragon loo diri doono gobolka.

    Wuxuu intaas ku daray in UK ay “si buuxda uga go’an tahay amniga Qubrus iyo ciidamada Ingiriiska ee halkaas ku sugan.”

    Go’aankan ayaa yimid ka dib weerarro dronis loo adeegsaday oo Iiraan ay ku qaaday saldhigga Ingiriiska ee jasiiradda, RAF Akrotiri, maalmihii la soo dhaafay —.

    Mid ka mid ah weerarada ayaa dhacay habeenkii Axadda kaasi oo sababay “waxyeello yar,” halka laba kale la qabtay Isniintii, sida uu sheegay afhayeen u hadlay dowladda Qubrus.

17. 3 Maarso 2026Iraan oo ka hadshay qorshaheeda dagaalka iyo hubka ay adeegsanayso

    

    Xigashada Sawirka, Iranian Ministry of Defense

    Wasaaradda Difaaca ee Iran ayaa ku dhawaaqday in muddada ay awood u leedahay inay iska caabbiso isla markaana fuliso howlgallo weerar ah ay “aad uga badan tahay waxa cadawgu filayay marar badan,” iyadoo la tixraacayo sii kordhinta xiisadda milatari.

    Wasaaraddu waxay bayaan ku sheegtay in Iiraan ay si tartiib tartiib ah u adeegsan doonto hubkeeda casriga ah, iyadoo xustay in “aan dhammaan hubka horumarsan la qorsheyn in la isticmaalo maalmaha ugu horreeya ee dagaalka,” sida ay hadalka u dhigtay.

    Hadalladan ayaa imanaya iyadoo ay jiraan is-weydaarsiadeen weerarro iyo hanjabaado u dhexeeya Tehran iyo dalalka ay is hayaan, xilli uu sii xoogeysaneyo iska horimaadka milatari ee gobolka.

    Muxuu yahay qorshaha ka dambeeya beegsiga hoggaamiyayaasha Iiraan?

    Dagaalka bariga dhexe: Aaway saaxiibadii Iiraan ee Shiinaha iyo Ruushka?

    Yaa burburiyay saddexdii diyaaradood ee dagaalka Maraykanka, sideese loo burburiyay?

18. 3 Maarso 2026Mareykanka oo soo saaray digniin ku aadan Sacuudiga

    Safaaradda Mareykanka ee ku taalla Riyadh ayaa ka digtay weerarro gantaallo iyo diyaarado aan duuliye lahayn oo dhowaan ay suuragal tahay inay ku dhacaan magaalada bariga Dhahran, halkaas oo uu ku taallo qunsuliyadda Maraykanka.

    Safaaradda ayaa muwaadiniinta Maraykanka ku boorrisay inay joogaan meelaha ay ku sugan yihiin oo ay “dib u eegaan qorshayaasha amniga haddii uu weerar dhaco,” sida lagu sheegay bayaanka digniinta.

    Dhahran, oo ku taalla xeebta bari ee Sacuudiga waa xarun weyn oo warshadaha shidaalka ah, waxayna hoy u tahay xarunta shirkadda qaranka ee shidaalka ee Saudi Aramco.

19. 3 Maarso 2026Ururka Xisbullah oo sheegay inay soo rideen diyaarad ay Israa'iil leedahay

    Hezbollah ayaa bayaan ku soo saartay maanta iyagoo sheegay in ay soo rideen diyaarad aan duuliye lahayn oo Israa’iil ay leedahay magaalada Nabatieh ee koonfurta Lubnaan.

    Bayaan-ku wuxuu sheegay in howlgalkan la fuliyay 12:30 duhurnimo Talaadada, 3-da Maarso 2026, iyadoo la adeegsanayay “hub ku habboon,” sida lagu xusay qoraalka.

    Bayaan-ku wuxuu intaas ku daray in howlgalkan uu dhacay “si looga jawaabo gardarrada Israa’iil”, taasoo, sida ay sheegeen, saameysay boqolaal magaalooyin iyo tuulooyin Lubnaan ah, oo ay ku jiraan xaafadaha koonfureed ee Beirut.

20. 3 Maarso 2026Waa sidee xaaladda caafimaad ee Mojtaba Khamenei oo ah wiil uu dhalay Khamenei?

    

    Xigashada Sawirka, Isna

    Warbaahinta Iiraan ayaa sheegtay in Mojtaba Khamenei, oo ah wiilka hogaamiyaha dhintay ee Jamhuuriyadda Islaamiga ah, uu “si buuxda u caafimaad qabo.” Wakaaladda wararka Mehr News Agency ayaa qortay in Mojtaba Khamenei uu “haatan ka shaqeynayo arrimaha shuhadada qoyska, kormeerayo howlaha, la tashanayo, isla markaana dib u eegayo arrimaha muhiimka ah ee dalka.

    ” Afar maalmood ka hor, saacadaha hore ee bilowgii dagaalka Israa’iil iyo Maraykanka, xafiiska iyo guriga Cali Khamenei ayaa la duqeeyay, waxaana la dilay Mr. Khamenei.

    Warbaahinta Iiraan ayaa shalay ku dhawaaqday in Mansoureh Khojasteh Bagherzadeh, oo ahayd xaaska Cali Khamenei, isla markaana saddex maalmood ka dib weerarka ku jirtay xanuunka miyir-beelka, ay geeriyootay.

    Weerarkaasi, waxaa sidoo kale ku dhintay Zahra Haddad Adel, xaaCali Khamenei. Magaciisa ayaa lagu sheegay inuu yahay dhaxal-sugaha aabihiis sanadihii ugu dambeeyay.