Cymru'n gobeithio creu mwy o hanes a chyrraedd Cwpan y Byd

Mi oedd Euro 2025 yn brofiad bythgofiadwy i chwaraewyr Cymru.

Cyrraedd un o'r prif gystadlaethau rhyngwladol am y tro cyntaf erioed a chwarae'n erbyn rhai o dimau gorau'r byd.

Ac ar ôl cael blas o wneud hynny - maen nhw'n awyddus am fwy.

Felly ydi'r criw yma o chwaraewyr yn gallu creu mwy o hanes a chyrraedd Cwpan y Byd ym Mrasil yn 2027?

Mi fydd Cwpan y Byd yn cael ei gynnal ym Mrasil. Ond tydi'r llwybr i gyrraedd yno ddim yn un hawdd.

Mae fformat y rowndiau rhagbrofol yn debyg iawn i Gynghrair y Cenhedloedd.

Mae Cymru yn yr ail haen - yn Adran B - felly tydyn nhw ddim yn gallu cyrraedd y rowndiau rhagbrofol yn awtomatig. Mi fydden nhw'n dibynnu ar y gemau ail-gyfle.

Maen nhw yn yr un grŵp a Czechia, Montenegro ac Albania.

Gorffen ar frig y grŵp - ac mi fydd eu llwybr nhw yn y gemau ail-gyfle yn fwy ffafriol.

Ond haws dweud na gwneud, yn enwedig gan gofio fod Czechia yn uwch na Chymru ar restr detholion y byd.

Er nad yw Czechia erioed wedi chwarae'n un o'r cystadlaethau mawr mi oedden nhw'n agos iawn at gyrraedd Euro 2025, gan golli o un gôl yn erbyn Portiwgal yn ffeinal y gemau ail-gyfle.

Maen nhw'n dîm sydd gwella lot dros y blynyddoedd diwethaf, ac mi fydd yn rhaid bod yn wyliadwrus o'u capten Klára Cahynová sy'n chwarae i Real Sociedad yn Sbaen.

Mae 'na lot yn y fantol felly yn y gêm ragbrofol gyntaf pan fydd Cymru oddi cartref yn Czechia.

Mi fydd hi'n olygfa ryfedd gweld Jess Fishlock yn sefyll ar ochr y cae yn Czechia yn ei rôl newydd fel hyfforddwr.

Yn cael ei chydnabod fel y chwaraewr gorau yn hanes y tîm - fe benderfynodd ymddeol o bêl-droed rhyngwladol ar ôl Euro 2025.

Ond mae hi nôl gyda'r garfan ar ôl i Rhian Wilkinson ei pherswadio i ymuno â'r tîm hyfforddi ar gyfer y gêm yn Czechia.

Tydan ni ddim yn gwybod eto a fydd y rôl yn datblygu i fod yn rhywbeth mwy parhaol - ond mae ei phresenoldeb yn siŵr o helpu paratoadau'r garfan.

"I fod yn onest does 'na ddim lot o wahaniaeth rhwng cael Jess yn hyfforddwr yn hytrach na chwaraewr," yn ôl yr ymosodwr Carrie Jones.

"Pan oedd hi'n chwarae mi oedd hi'n arwain y ffordd ar y cae be' bynnag.

"Mae'n grêt ei chael hi yma yn ei rôl newydd."

Am y tro cyntaf ers dros 20 mlynedd mi fydd yn rhaid i Gymru ymdopi heb Fishlock ar y cae - felly sut fydd Rhian Wilkinson yn mynd ati i lenwi'r bwlch yna?

Y newyddion da ydi fod 'na berfformiadau addawol wedi bod gan Gymru yn dilyn ymddeoliad Fishlock.

Fe enillon nhw 3-2 mewn gêm gyfeillgar yn erbyn Y Swistir yn Sbaen nôl ym mis Rhagfyr, gyda Carrie Jones yn chwarae'n dda mewn safle fwy canolog, a Hannah Cain yn sgorio gôl wych.

Mae 'na dal lot o brofiad yn y tîm hefyd gyda chwaraewyr fel Angharad James, Sophie Ingle a Hayley Ladd i gyd wedi ennill dros 100 o gapiau.

Ers Euro 2025 ac ymddeoliad Fishlock mae Rhian Wilkinson wedi defnyddio gemau cyfeillgar i roi cyfleoedd i chwaraewyr iau.

Un sydd wedu creu argraff fawr dros y misoedd diwethaf ydi Mared Griffiths o glwb Manchester United.

Yn 18 oed fe sgoriodd ei gôl rhyngwladol gyntaf yn erbyn Awstralia yng ngêm olaf Fishlock dros Gymru.

Mi oedd 'na berfformiad gwych arall yn erbyn Y Swistir ym mis Rhagfyr, a hi bellach sy'n gwisgo'r rhif 10 - sef hen grys Fishlock.

Er ei bod hi dal yn ifanc mae hi'n siŵr o chwarae rhan flaenllaw yn yr ymgyrch ragbrofol.

Mae hi newydd ymuno â Sunderland ar fenthyg tan ddiwedd y tymor, a fe sgoriodd ei gôl gyntaf drostyn nhw mewn buddugoliaeth o 3-2 yn erbyn Durham wythnos diwethaf.

Mi fydd chwarae'n rheolaidd ar lefel clwb yn helpu ei datblygiad fel chwaraewr, ac y gobaith yw y bydd Cymru yn elwa o hynny.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.