د خوړو نړیوال پروګرام: افغانستان کې ګڼ ماشومان هر سهار وږي ښوونځیو ته ځي
د عکس سرچینه، WFP
د ملګرو ملتونو د خوړو نړیوال پروګرام دغه خبره د پوهنې نړیوالې ورځې په مناسبت کړې ده.
ډبلیو ایف پي وایي غواړي نړۍ ته ور په یاد کړي چې " د ښوونځي خواړه د زده کړو لپاره اړین دي."
د خوړو نړیوال پروګرام چې دا مهال د افغانستان په ځينو ښوونځیو کې په زده کوونکو د ورځې یو بیسکویټ ویشي وایي دا یو ډبلی بیسکویټ ددې ماشومان د ټولې ورځې خواړه دي.
د ملګرو ملتونو د خوړو نړیوال پروګرام په وینا یاده اداره هره ورځ نږدې په اووه سوه زره نجونو او هلکانو زده کوونکو بیسکویټ ویشي چې د ورځي خوړو په توګه یې وخوري.
دغه نړیوالې مرستندویه ادارې د لومړني ښوونځي یوې افغانې زده کوونکې "مدینې" خبرې هم خپرې کړې چې وایي "هر سهار چې ښوونځي ته ځي څه نه خوري."
مدینه وایي: " دغه بیسکویټ ماسره مرسته کوي چې په مړه کېډه سبق ووایم، چې وږې وم درس نه شم ویلای."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
په ښوونځیو کې په ماشومان د بیسکویټ ویشلو یوه موخه هم دا بلل شوې چې اړې کورنۍ دېته وهڅول شي چې خپل ماشومان ښوونځیو ته واستوي.
وړاندې په افغانستان کې د خوړو نړیوال سازمان مشر هم ویلي وو چې افغانستان کې له ژمي وړاندې اړتیاوې ډېرې دي او د خوارځواکۍ په لوړه کچه کې لوږه هم له هرو دریو یو کس اغېزمنوي.
د ماشومانو د خوندیتوب نړیوال سازمان (سېو ده چلډرېن) څه موده مخکې خبرداری ورکړی چې د ۲۰۲۴ کال په پیل کې به د خوړو د کړکېچ له امله له هرو دریو ماشومانو څخه یو له لوږې سره مخ شي.
ملګرو متلونو په وار وار له نړیوال مرستندویانو غوښتي چې په افغانستان کې د اړو خلکو د لاس نیوي لپاره مرسته وکړي، ځکه د دوی په وینا په دې هېواد کې لویه برخه خلک نه پوهېږي چې په یوه ورځ کې د بل ځاښت خواړه له کومه کړي.
