Пакистан Ооганстандын Кабул баштаган шаарларына сокку урганын ырастады

Өкмөттүк расмий өкүлдүн айтымында, Пакистан мурунку чабуулдарга жооп катары Ооганстандын Кабул, Кандагар жана Пактика шаарларына абадан сокку урганын ырастады. Бул окуя ооган талибдеринин биргелешкен чек ара тилкесиндеги операциясынын натыйжасында эки пакистандык аскер каза болгону жарыялангандан бир нече саат өткөндөн кийин болду.

Пакистандын президенти Асиф Али Зардари өлкөсүнүн ооган талибдеринин чабуулдарына кайтарган жообун жогору баалады. Ал жума күнү эртең менен X (мурдагы Twitter) баракчасына: "Биздин куралдуу күчтөрдүн жообу ар тараптуу жана чечүүчү болду", — деп жазды. Ал ошондой эле: "Биздин тынчтыкты сүйүүбүздү алсыздык деп ойлогондор катуу жоопко туш болушат жана эч ким жазасыз калбайт", — деп кошумчалады.

Башка бир билдирүүсүндө президент Пакистан "зордук-зомбулукту пландаштыргандардын, көмөктөшкөндөрдүн жана колдоого алгандардын турган жерлерин жакшы билерин" айтып, чабуулга жооптуулар «өз аракеттеринин кесепеттерине туш болорун" эскертти.

Ошондой эле Пакистандын премьер-министри Шахбаз Шариф жума күнү коңшу Ооганстанга жасалган аба соккуларынан кийин өлкөсүнүн күчтөрү ар кандай агрессорду «талкалап» салууга кудуреттүү экенин билдирди. Шариф X платформасында: "Биздин күчтөр ар кандай агрессивдүү амбицияларды талкалоо үчүн толук потенциалга ээ", — деп жазып, "бүткүл улут Пакистандын куралдуу күчтөрү менен ийиндеш турат" деп кошумчалады.

Пакистандын премьер-министринин өкүлү Мушарраф Заидинин айтымында, Пакистан күчтөрү тарабынан ушул күнгө чейин ооган талибдеринин 133 мүчөсү өлтүрүлүп, 200дөн ашыгы жаракат алган. Ал эми ооган талибдеринин өкүлү Забихулла Мужахид X баракчасына Пакистандын акыркы соккуларынан "эч ким жабыркаган жок" деп жазды.

Заиди ошондой эле Пакистандын соккулары ушул кезге чейин ооган талибдерине таандык 27 аскердик объектти талкалап, дагы тогуз объектти колго түшүргөнүн кабарлады. Анын айтымында, соккулардан 80ден ашык танк, артиллериялык куралдар жана брондолгон машиналар жок кылынган. Ал: "Агрессияга каршы Пакистандын тез жана натыйжалуу жообу уланууда", — деп кошумчалады.

Буга карабастан, "Талибандын" Коргоо министрлиги бейшемби күнү кечинде Пакистандын 19 аскердик постун жана эки аскер базасын басып алганын, ошондой эле 55 пакистандык аскер каза болгонун жарыялады.

Пакистандын Коргоо министри Хаважа Мухаммед Асиф X (мурдагы Twitter) социалдык тармагындагы кескин билдирүүсү менен Ооганстандын "Талибан" өкмөтүнө каршы "ачык согуш" жарыялады. Бул билдирүү талиб күчтөрүнүн Пакистан аскерлерине жасаган чабуулунан кийин Ооганстандын негизги шаарларына жасалган бир катар аба соккуларынан кийин чыкты.

"Пакистан түз каналдар жана дос мамлекеттер аркылуу кырдаалды калыбына келтирүү үчүн болгон күчүн жумшады. Биз кеңири дипломатиялык аракеттерди көрдүк. Бирок биздин чыдамыбыз түгөндү. Эми биз менен силердин ортоңордо ачык согуш башталды", — деп жазды Хаважа Асиф.

Эки тарап октябрь айындагы кандуу кагылышуулардан кийин убактылуу ок атышууну токтотууну макулдашкан болчу, бирок андан бери атышуулар токтогон жок.

Чек арадагы кагылышуулар жана өз ара айыптоолор

Бейшемби күнү Ооганстан Пакистанга каршы аскердик чабуул жасап, муну бир нече күн мурун өз аймагына жасалган кандуу аба соккуларына жооп катары негиздеди. Талибдер пакистандык аскерлер өлтүрүлгөнүн жана туткунга алынганын жарыялашса, Исламабад бул маалыматты четке какты.

Ооган өкмөтүнүн басма сөз катчысы Забихулла Мужахид X платформасында: "Пакистан армиясынын кайталанган мыйзам бузууларына жооп катары, Пакистандын аскердик базаларына жана объекттерине каршы кеңири масштабдуу чабуул операциялары башталды", — деп билдирди.

Ооган бийлиги аскерлер чек арадагы 15тен ашык Пакистандын аскердик пунктун эки сааттын ичинде көзөмөлгө алганын ырастады. "Ондогон пакистандык аскерлер өлтүрүлдү, биз 10 сөөктү Кунар жана башка аймактарга алып келдик. Ошондой эле жарадарлар жана туткундар бар", — деп кошумчалады Мужахид.

Ал эми Пакистандын премьер-министри Шахбаз Шарифтин өкүлү бир дагы аскердик пункт басып алынбаганын жана эч кандай зыян келтирилбегенин айтып, тескерисинче, ооган армиясы «чоң жоготууларга» учураганын билдирди.

Гуманитардык кырдаал жана соккулардын кесепети

Нангархар провинциясынын маалымат бөлүмүнүн башчысы Курайши Бадлун билдиргендей, Торхам чек ара бекетине жакын жердеги ооган качкындарынын лагерине снаряд түшүп, жети адам жаракат алган, алардын ичинде бир аялдын абалы оор.

Пакистандын маалымат министри Аттаулла Тарар кийинчерээк Кабул, Пактия жана Кандагардагы «Талибандын» коргонуу объектилери бутага алынганын тастыктады. AFP агенттигинин кабарчылары Кабулда жардыруулардын үнү угулуп, истребителдер учуп жүргөнүн кабарлашты.

Бул чыңалуу жекшемби күнү кечинде Пакистандын Нангархар жана Пактия провинцияларына жасаган соккуларынан кийин күчөдү. БУУнун Ооганстандагы миссиясынын маалыматы боюнча, ал соккулардан кеминде 13 жай тургун каза болгон. Талибан өкмөтү каза болгондордун саны 18ден ашканын айтса, Пакистан 80ден ашык согушкер жок кылынганын ырастоодо.