اسراییلو د بریتانیا یو مرستیال وزیر نیم ساعت له اقصا جوماته بهر درولی و

د اسراییلو د لږ تر لږه دېرش دقیقو لپاره د بریتانیا یو مرستیال وزیر طارق احمد د بیت المقدس په اقصا جومات کې ننوتو ته نه وو پريښی.

لرد احمد چې په منځني ختیځ کې د بریتانیا د بهرنیو چارو وزیر مرستیال او مسلمان دی داسې حال کې جومات ته نه وو پرېښودل شوی چې د لمونځ کولو لپاره ننوتو.

بیت المقدس کې د بي بي سي خبریال ټام بیټمن وايي،‌ احمد او ورسره مل پلاوی یې سیمې ته تللي و او تمه وه چې د دغه ځای والي سره وګوري.

اقصا جومات په مکه کې له مسجد الحرم او په مدینه کې د مسجدالنبوي نه وروسته په اسلام کې تر ټولو سپیڅلی ځای دی.

د دغه جومات مشري د وقف بنسټ په غاړه ده او د بیت المقدس لوی مفتي یې مشري کوي.

دا سیمه چې د مسلمانانو لپاره حرم شریف او د یهوانو تر منځ د معبد غره په نامه پېژندل کېږي په نیول شوي ختیځ بیت المقدس کې پرته ده او د ښار تر ټولو سپیڅلی ځای دی.

بریتانوي چارواکو د اسراییلو سرحدي پولیسو ته ویلي چې، طارق احمد د بریتانیا د حکومت مرستیال وزیر و او سفر په اړه یې له وړاندې همغږي شوې وه خو ظاهرا دا خبره نه ده منل شوې.

پر ټوېټر یوه خپور شوي تصویر کې هم ښکاري چې د بریتانیا د بهرنیو چارو مرستیال بیا د اسراییلو د بهرنیو چارو له وزیر الي کوهن سره هم کتلي.

د اقصا له جوماته د وتلو پر مهال احمد بي بي سره خبرو کې دا پېښه "کم ارزښته" وبلله او دا یې د امنیتي چېک مسله یاده کړه او ټینګار یې وکړ چې "مهمه خبره د سپیڅلو ځایونو لیدل دي."

اسراییلي چارواکو احمد سره د لیدنې پر مهال پر دوه اړخیزو او نړیوالو اړیکو خبرې کړي دي.

بریتانوي چارواکو ويلي چې په دغه غونډه کې د ازادې سوداګرۍ پر تړون او د سیمې او امنیت په مسلو تمرکز شوی دی.

احمد طارق ویلي، د دواړو هېوادونو تر منځ دوه اړخیزې اړیکې او سوداګریز شراکت مخ په ښه کېدو دی او په وینا یې"اړیکې یې پراخې شوي دي."

خو هغه ډله چې د بریتانیا او عربو اړیکو ته وده ورکوي بریتانیا تورنه کړې چې د اسراییلو د نوي حکومت "توکمپالي دریځ" ته یې سترګې پټې کړې دي.

تېره میاشت د بریتانیا د پارلمان یوې ډلې بریتانیا حکومت ته د اسراییلو د نوي حکومت د "دوه ګوني او ناقانونه" چلند په اړه خپلې اندېښنې وړاندې کړې وې.

اسراییلي چارواکو ویلي چې له احمد سره یې د لیدو پر مهال د بریتانیا له هغه ملاتړ هم مننه کړې چې وروستیو کې یې ملګرو ملتونو کې ترې کړی و.

بریتانیا ملګرو ملتونو کې د عدالت نړیوالې محکمې ته د اسراییلو له خوا د فلسطیني سیمو د نیولو په اړه منفي رایه ورکړه.