Tha Cathraiche WIIGA, Norrie Dòmhnallach, ag ràdh gum feum miann a bhith ann na geamannan a thoirt dha na Eileanan an Iar far nach robh iad fhathast.
Thuirt e gur e "pipedream" a th' ann aig an ìre seo ach gum bu chòir bruidhinn mu dheidhinn.
Tha còig buinn aig sgioba nan Eilean Siar aig an ìre seo ann an Arcaibh - trì buinn òir, aon bhonn airgid agus aon bhonn umha.
Tùs an deilbh, Orkney2025Cuairt dheireannach eile do Khara Hanlon anns an 100m breaststroke.
Bha an uair as luaithe aice anns na heats, còrr air dà dhiog air thoiseach air Laura Kinley à Eilean Mhanainn.
Bidh a' chuairt dheireannach sin ann a-nochd fhathast.
Mar a tha gu leòr eile, tha cathraiche WIGA Norrie Tomsh Dòmhnallach a' dèanamh moladh mòr madainn an-diugh air Kara Hanlon.
Rinn Kara eachdraidh san amar-snàimh a-raoir is i a' buannachadh dà bhonn eile - òr is umha.
Thug sin gu 3 i ann an Arcaibh agus 15 uile gu lèir ann an Geamannan nan Eilean thairis nam bliadhnnaichean - barrachd na neach sam bith eile às na h-Eileanan an Iar.
"'S i Kara an neach-spòrs a b'fheàrr a-riamh às na h-Eileanan an Iar", thuirt Norrie.
"Chan eil e gu diofar dè tha thu a' smaoineachdainn mu dheidhinn ball-coise, snàmh, ruith, a h-uile seòrsa rud, chan eil duine a' tighinn faisg air Kara.
"Multiple champion ann an Alba is ann am Breatainn agus a-nise tha 15 bonn aice anns na Geamannan.
"'S e ambassador mìorbhaileach a th' innte cuideachd, gu h-àraidh 'son an fheadhainn òga. Tha i a' cur air ais a cheart uimhir a fhuair i.
"Cha choveraig exceptional i - tha i sgoinneil".
Tha cothrom aig Kara an tuilleadh eachdraidh a dhèanamh cuideachd.
Bidh i san 100m breaststroke an-diugh is an 100m medley a-màireach.
Cluichidh sgioba nam ban aig na h-Eileanan an Iar an aghaidh Eilean Mhanainn ann an iar-chuairt dheireannach farpais a' bhuill-coise. Thèid an geama sin a chluich aig 12:00f a-màireach (Diardaoin) air a' phrìomh phàirce de na farpaisean aig Sgoil Ghràmar Khirkwall.
Cluichidh na fir geama airson dearbhadh fhaighinn air an 7mh no 8mh àite an aghaidh Gozo. Sin ann an Dounby aig 3:30f.
Bhruidhinn Kara Hanlon ri Ailean MacLeòid an deidh dhì da bhonn eile a ghlèidheadh aig Geamannan nan Eilean ann an Arcaibh.
Tha i a-nis air 15 bonn a bhuannachadh thar nam bliadhnaichean, barrachd na neach sam bith eile às na h-Eileannan an Iar.
Bhuannaich sgioba luth-chleasachd nan Eilean Siar an dàrna bonn aca ann an dà là is Abbie Stiùbhart a' tighinn san dàrna àite san rèis 1500 meatair.
Chrìochnaich Abbie ann an 4.35.77, gu math faisg air Beca Bown à Ynys Môn a bhuannaich an rèis ann an 4.34.85.
Bha Anna Dhòmhnallach cuideachd san rèis is chrìochnaich i san 11mh àite.
Tha Kara Hanlon a-nis air barrachd bhonn a ghlèidheadh aig Geamannan nan Eilean na neach sam bith eile às na h-Eileannan an Iar.
Chrìochnaich i san treas àite san rèis 200IM oidhche Mhàirt gus an treas bonn aice aig geamannan Arcaibh a chosnadh.
'S i Chloe Brown is Oriana Wheeler à Guernsey a bha sa chiad is dàrna àite.
Bha Kara mar-tha air buinn òir a bhuannachadh anns na rèisean breaststroke thar 50 agus 200 meatair ann an Arcaibh.
Tha sin ga toirt gu 15 buinn thar nam bliadhnaichean, aonan air thoiseach air Kerry Nic a' Phì.
Bidh cothrom aig Kara cur ris an àireimh sin a-màireach.
Bhuannaich Kara Hanlon bonn òir san rèis 200m breaststroke aig Geamannan nan Eilean ann an Arcaibh.
'S e seo an dàrna bonn òir aice aig na geamaichean thuige seo.
Stèidhich i clùr ùr is i ga dhèanamh.
Chrìochnaich i ann an 2.24.74 gus bonn a ghlèidheadh aig na geamaichean seo 'son a' 14mh turas thar nam bliadhnaichean.
Bha Kara an ìre mhath diog nas luaithe na an clar a bh' ann 'son na rèis seo, clàr a bh' aice fhein.
Chrìochnaich i faisg air còig diogan air thoiseach air càch san rèis.
Tha Spòrscast a' tighinn thugaibh beò bho Gheamannan nan Eilean 2025 ann an Arcaibh.
Bha deagh mhadainn aig Eva NicSuain agus cuideachd aig Kara Hanlon
Feuchaidh Kara Hanlon ann an dà chuairt dheireannach a-nochd fhathast aig Geamannan nan Eilean.
'S i a bu luaithe anns na rèisean dearbhaidh 'son an 200m breaststroke, a' crìochnachadh ann an 2.32.30.
Agus bha an dara àm as luaithe aice ann an rèis an 200IM air cùlaibh Chloe Brown à Guernsey.
Cha deach aig gin do na snàmhaidearan eile cuairtean deireannach a ruighinn ach chaidh aig seachdnar air clàran ùra pearsanta a stèidheachadh.
Sa bhutterfly thar 100 meatair, bha Kyle Dòmhnallach mu thrì diogan nas luaithe na bha e riamh. Bha cuideachd agus Mata Hanlon.
Bha Eva NicSuain dà dhiog gu leth nas luaithe na riamh roimhe sa 100m backstroke, agus rinn Keira Dhòmhnallach an dearbh rud thar an aon astar.
Chaidh aig Eva air16 diog a ghearradh far a' chlàir aice san 200M IM, sìos bho 3.00.78 gu 2.44.83.
Bha clàran ùra pearsanta ann cuideachd do Mark Moireasdan san 50m backstroke, Aleah agus Keira Dhòmhnallach san 50m butterfly, agus 'son Ruaraidh Ovenstone agus Kyle Domhnallach san 200m freestyle.
Cluinnear barrachd mun t-snàmh agus an còrr à Arcaibh air prògram sònraichte air BBC Radio nan Gàidheal aig 3:30f.
Gheibh sgioba ball-coise nam ban aig WIIGA dà là fois a-nise agus àite aca air a ghlèidheadh anns an iar-chuairt dheireannaich.
Thuige seo rinn iad an gnothach 3-0 air Hitra is 4-2 air Ynys Môn, gan dearbhadh aig mullach na buidhne aca, taobh a-muigh.
Bha an coidse aca air a radh aig toiseach na farpais gum faigheadh iad bonn òir le ceithir geamaichean a bhuannachadh.
Tha iad mar sin lethach slighe a dh'ionnsaigh na targaid a tha sin.
Kara a' bruidhinn ri BBC Spòrs oidhche Luain
Tha Kara Hanlon air tòiseachadh gu làidir a-rithist madainn Dimàirt.
Bha i sa chiad àite sa chuairt dearbhaidh aice san 200m breaststroke is i a' cur crìche air ann an 2.32:30.
Thàinig seo às dèidh dhi bonn òir san 50m breaststroke a bhuannachadh oidhche Luain.
Bha Coinneach Dòmhnallach, iar-choidse na sgioba lùth-chleasachd, gu math moiteil às na rinn Amie.
Is tha Coinneach cuideachd dòchasach mu chothroman na sgioba Dimàirt.
Abair gun robh deagh là aig sgioba nan Eilean Siar Diluain.
Bhuannaich Amie Ringstead bonn òir san javelin, a' chiad bhonn aig sgioba WIIGA.
'S i a bha air a dòigh.
Tha frasan trom air a bhith ann ach dùil ri là brèagha eile ann an Arcaibh.
Tha sgioba nan Eilean Siar a' coimhead uair eile air an raon lùth-chleasachd agus an amar-snàimh airson cothrom air buinn an-diugh.
Tha diofar lùth-chleasaichean air an trac feasgar, ach 's ann air Abbie Stiùbhart as motha ann an rèis an 1,500m a tha aire an luchd-coidsidh.
Aig an amar, tha an 200m breaststroke agus an 200m medley shingilte aig Kara Hanlon agus mòran an dùil ri dà bhonn dhi ro dheireadh an là.
Na Hearadh agus am Bac a bhios a' cluich ann an cuairt dheireannach Cupa ABC aig Cnoc nan Gobhar ann an Steòrnabhagh oidhche Haoine.
Bhuannaich na Hearaich 4-3 an aghaidh Athletic Steòrnabhaigh às dèidh ùine a bharrachd nuair a chrìochnaich iad aig 3-3 taobh a-staigh ùine àbhaistich.
Sa gheama eile bhuannaich am Bac 5-0 an aghaidh an Rubha.
Tha an dàrna là de dh'fharpaisean aig Geamannan nan Eilean 2025 ann an Arcaibh seachad.
Seo mar a chaidh do sgioba nan Eilean Siar:
Bhuannaich Amie Ringstead bonn òr san javelin, a' chiad bhonn aig sgioba WIIGA.
Cha b' ann fada às dèidh sin a ghlèidh Kara Hanlon bonn òr san 50m breaststroke. Tha i a-nis air 13 buinn a bhuannachadh aig na geamannan thar nam bliadhnaichean.
Tha sgioba ball-coise nam ban troimhe chun nan iar chuairtean deireannach an dèidh dhaibh an gnothach a dhèanamh air Ynys Môn 4-2 feasgar.
Chaill sgioba nam fear an dara geama acasan 1-0 an aghaidh Ynys Môn agus chrìochnaich iad an geama le deichnear le Harry Bray ga chur far na pairce.
Chrìochnaich Tony Wesley san ochdamh aite ann an cuairt dheireannach 100m nam fear.
Tùs an deilbh, wiigaBhuannaich Kara Hanlon bonn òir san rèis 50m breaststroke ann an Arcaibh.
Bha i beagan na bu shlaodaiche na bha i san rèis deabhaidh madainn Diluain, ach chrìochnaich i fhathast faisg air diog air thoiseach air Laura Kiney à Eilean Mhanainn a bha san dàrna àite.
Chrìochnaich Kara ann 30.82 gus bonn a ghlèidheadh aig na geamaichean seo 'son an treas turas deug.
Bidh i a' feuchainn san rèis 200m agus ag amas air bonn òir eile.
Tùs an deilbh, WIIGATha sgioba ball-coise nam ban aig na h-Eileanan an Iar troimhe chun na h-iar chuairtean deireannach den fharpais. Sin as dèidh dhaibh a chùis a dhèanamh air Ynys Môn 4-2 ann an Dounby.
Chaidh sgioba WIIGA tadhal air dheireadh tràth, ach thill iad gu làidir le ceithir tadhail anns a' chiad leth bho Shana NicPhàil, Kyla McMurdo, Jessica NicLeòid agus tadhal a chuir cluicheadair dìon Ynys Môn dhan lìon aice fhèin.
Tha dà là dheth aca a-nis air thoiseach air an ath chuairt de gheamaichean.
Tùs an deilbh, WIIGABhon sgioba lùth-chleasachd a thàinig a' chiad bhonn òr de Gheamannan nan Eilean 2025 do sgioba nan Eilean Siar is Amie Ringstead a' buannachadh anns an javelin.
Chaith i 40.46m, an oidhirp a b'fheàrr aice a-riamh, is bha i faisg air meatar gu leth air thoiseach air Sunniva Bogadottir a bha san dara àite.
Seo a' chiad turas a tha sgioba nan Eilean Siar air bonn a' ghlèidheadh san javelin, agus bha Amie air a doigh na h-amasan aice a choileanadh.
"Tha e do-chreidsinneach, bha fiosam gun robh cothrom ann gun tachradh e, ach a-nis tha e air tachairt agus tha e a' faireachdainn gu math eadar-dhealaichte."
Chaidh an taghadh a dhèanamh Diluain airson iar-chuairt dheireannach Chupa na Camanachd.
Thèid Ceann a' Ghiùthsaich, a th' air buannachadh sna trì bliadhnaichean mu dheireadh, an aghaidh a' Ghearasdain a thog an cupa mu dheireadh ann an 2010.
Choinnich an dà sgioba aig an aon ìre den fharpais an-uiridh cuideachd nuair a thàinig Ceann a' Ghiùthsaich am bàrr 3-2.
Anns a' gheama eile thèid Camanachd an Òbain an aghaidh Bhail' Ùr an t-Slèibh.
Tha sgioba an Òbain ag amas air a' chuairt dheireannach a' ruighinn airson an dàrna turas ann an trì bliadhna às dèidh dhaibh call ri Ceann a' Ghiùthsaich an 2023.
Agus ged a tha am Bail' Ùr air Cupa na Camanachd a bhuannachadh barrachd na sgioba sam bith eile, tha iad a' feuchainn ris a' chuairt mu dheireadh a ruighinn airson a' chiad uair bho 2019 - an turas mu dheireadh a bhuannaich iad an fharpais.
Thèid Ceann a' Ghiùthsaich an aghaidh a' Ghearasdain air an 2na den Lùnastal aig Pàirce a' Bhucht ann an Inbhir Nis.
Cluichidh an uairsin Camanachd an Òbain agus Baile Ùr an t-Slèibh seachdain às dèidh sin, air an 9mh den Lùnastal, aig An Àird sa Ghearasdan.
Bidh an dà gheama beò air BBC Alba.
Tha iad ag ullachadh airson rèis fhosgailte an time trial san rothaireachd aig Bun-Sgoil Firth air taobh siar Arcaibh.
Thèid lùth-chleasaichean às a seo timcheall air cùrsa a bheir iad air ais an seo aig deireadh 45km.
Fàgaidh Brian Mac a' Phì aig sgioba WIIGA aig 1:24f le Iain MacArtair a' dèanamh a shlighe aig 1:36f.
'S i Kara Hanlon a bha sa chiad àite ann an rèisean dearbhaidh an 50m breaststroke aig Geamannan nan Eilean ann an Arcaibh.
Bhrist Kara clàr nan Geamannan le uair de 30.70 diog - clàr a bh' aice fhèin roimhe aig 31.00.
Thèid i sa chuairt dheireannaich a-nochd fhathast mu 7:00f.
A bharrachd air soirbheachas Kara, chaidh sianair bho sgioba snàimh nan Eilean Siar nas luaithe na chaidh iad roimhe.
Ghearr Kyle Dòmhnallach 35 diog far an àm as luaithe aigesan riamh san rèis 200m butterfly, chriochnaich e ann an 2.20.60.
Rinn Aleah NicDhòmhnaill an aon rud, a' toirt 16 diog far an àm as luaithe aice thar 100m butterfly, chaidh i ann an 1.18.67, agus chaidh Mark Moireasdain sia diogan nas luaithe na chaidh e roimhe san 100m breastroke.
Chrìochnaich esan ann an 1.13.67.
San aon fharpais ri Kara, bha Eva NicSuain diog nas luaithe na an clàr aicesa aig 38.69.
Agus ann an rèis 200m freestyle nam fear bha Ruaraidh Ovenstone an ìre mhath còig diogan nas luaithe na roimhe, aig 2.37.41 agus bha Mata Hanlon diog na luaithe na rinn e ron seo aig 2.23.86.
Ach a dh'aoindeoin an t-soirbheachais sin, 's i Kara an aon neach a bhios a' farpais anns na cuairtean deireannach a-nochd.
