Spòrs

Chaidh na taghaidhean airson nan cupannan ann an seusan 2026 a dhèanamh aig AGM Lìog Ball-Coise Leòdhais is na Hearadh oidhche Mhàirt.

Tha na geamaichean mar a leanas:

Cupa ABC

Buidheann 1

• Nis - Aths

• Na Lochan - Nis

• Aths - Na Lochan

Buidheann 2

• United - Am Bac

• Càrlabhagh - United

• Am Bac - Càrlabhagh

Buidheann 3

• An Taobh Siar - Na Hearadh

• An Rubha - An Taobh Siar

• Na Hearadh - An Rubha

Cupa Eilean an Fhraoich

A' Chiad Chuairt

• Nis - An Rubha

• Càrlabhagh - An Taobh Siar

• Na Lochan - Na Hearadh

An Iar-Chuairt Dheireannach

• Na Lochan/Na Hearadh - Nis/An Rubha

• Càrlabhagh/An Taobh Siar - Am Bac

Cupa Moldobha

A' Chiad Chuairt

• Nis - Aths

An Dàrna Cuairt

• An Taobh Siar - Na Lochan

• United - Na Hearadh

• Am Bac - Càrlabhagh

• An Rubha - Nis/Aths

An Iar-Chuairt Dheireannach

• An Taobh Siar/Na Lochan - United/Na Hearadh

• Am Bac/Càrlabhagh - An Rubha/Nis/Aths

Cupa Jock Stein

A' Chiad Chuairt

• Na Lochan - United

An Dàrna Cuairt

• Na Hearadh - Am Bac

• Càrlabhagh - An Rubha

• Nis - Na Lochan/United

• Aths - An Taobh Siar

An Iar-Chuairt Dheireannach

• Nis/Na Lochan/United - Càrlabhagh/An Rubha

• Na Hearadh/Am Bac - Aths/An Taobh Siar

MalCivils Cupa nan Eilean Siar

A' Chiad Chuairt

• Barraigh - Na Hearadh

• Southend - Càrlabhagh

• Saints an Ìochdair - Na Lochan

• Am Bac - Uibhist a Tuath

• Nis - Èirisgeigh

• United - An Rubha

Tùs an deilbh, SNS

Thuirt manaidsear Ross County gu bheil e a' coimhead air rudan atharrachadh gu mòr às dèidh dhaibh call 3-0 ann am Fìobha an aghaidh Dhùn Phàrlain oidhche Mhàirt.

Chuir Callumn Moireasdan dà thadhal 'son na Pars sa chiad leth (15, 26) is Chris Kane a' cur crìoch air gnothaichean le deich mionaidean air fhàgail.

Tha seo a' fàgail na Staggies aig bonn an Championship le naoi geamaichean lìge air fhàgail.

"'S e barrachd na briseadh-dùil a bha seo às dèidh cho math 's a bha sinn aig an deireadh-sheachdain (nuair a bhuannaich iad 2-0 an aghaidh Raith)," thuirt Stuart Kettlewell.

"Tha e coltach gu bheil dùbhlan is duilgheadas againn a thaobh a bhith a' fuireach aig àrd-ìre - a bhith a' cluich aig an ìre sin geama às dèidh geama.

"Trì tursan bho thill mi dhan chluba tha sinn air cluich gu math is air buannachadh is an ath gheama tha sinn air a bhith truagh.

"Chan eil seo air tachairt rium ron seo ach tha mi a' smaointinn gum feum sinn atharrachadh mòr air choireigin a dhèanamh oir chan urrainn dhuinn leantainn mar a tha sinn."

Bidh County air an rathad Disathairne is iad a' cluich Obar Bhrothaig aig Gayfield.

Tha cothrom aig Ross County sreap far bhonn Championship na h-Alba nuair a thèid iad an aghaidh Dhùn Phàrlain oidhche Mhàirt.

Tha County an dràsta co-ionann leis an Àrd-Ruigh air puingean aig a' bhonn ach air an cùlaibh air sgaradh-thadhail.

Ma bhuannaicheas iad a-nochd ge-tà aig pàirc East End, leumadh iad suas chun an ochdamh àite.

Bidh sgioba Stuart Kettlewell an dòchas togail air an deagh bhuaidh a bh' aca air an deireadh-sheachdain nuair a rinn iad a' chùis air Raith Rovers 2-0.

Dh'fhàgadh sin iad cuideachd dìreach ceithir puingean air cùlaibh nam Pars a tha an dràsta sa cheathramh àite - an t-àite playoff mu dheireadh airson faighinn dhan Phrìomh Lìog.

Cuideachd a-nochd san Championship, cuiridh Obar Bhrothaig, a th' anns an treas àite fàilte air Ayr United a th' anns a' chòigeamh àite.

Tùs an deilbh, SNS

Thuirt manaidsear sgioba nam ban aig Alba Fo 23 gun do dh'ionnsaich iad na h-uimhir bhon gheama an aghaidh na h-Òlaind ann an Inbhir Nis oidhche Luain, ged a chaill iad 4-0 air a' cheann thall.

Thuirt Michael McArdle cuideachd gum bi barrachd gheamaichean aig tuath.

Bha tadhal bho Liz Rijsbergen air na Duitsich a chur 1-0 air thoiseach aig letheach-slighe, is chuir dà thadhal ann am beagan mhionaidean san dàrna leth bho Lynne Groenewegen is Rijsbergen a-rithist an geama seachad air Alba.

Chuir Addie Handley am ball dhan lìon aice fhèin anns na mionaidean mu dheireadh is an geama a' crìochnachadh 4-0.

"Bha fios againn gum biodh e doirbh agus 's e sin as coireach gun do chuir sinn na geamaichean seo air dòigh," thuirt McArdle.

"Chluich cuid de na nigheanan fìor mhath is 's e ceum air adhart a bh' ann dhaibh. Tha sin na thogail mòr dhuinn."

Nochd 1,042 aig Pàirc Chaledonian, an sluagh as motha thuige seo ann an Inbhir Nis 'son geama ann am ball-coise nam ban.

Thug sin misneachd do McArdle cuideachd.

"Tha an spòrs againn a' fàs is tha dleastanas oirnn feadhainn eile a bhrosnachadh.

"Bha sinn airson geama a thoirt chun na Gàidhealtachd is tillidh sinn.

"A bhith an seo is còrr is 1000 an làthair, fiù 's a bhith a' faicinn òigridh a' bruidhinn ris na cluicheadairean aig deireadh a' gheama, 's e sin an rud as cudromaiche a thaobh geama a bhith againn an seo."

Tùs an deilbh, SNS

Tha ball-coise eadar-nàiseanta a' tighinn chun na Gàidhealtachd oidhche Luain is sgioba nàiseanta nam ban Fo 23 a' cluich an aghaidh na h-Òlaind ann an Inbhir Nis.

Tha seo mar phàirt de dh'fharpais chàirdeil anns a bheil Alba a' cluich 'son a' chiad turas.

Thòisich e san Dàmhair nuair a chaill Alba 3-0 ris an t-Suain ann an Cair Chaladain is iad beagan làithean às dèidh sin a' dèanamh a' ghnothaich 3-1 air an Eadailt.

Rinn a' Bheilg an uairsin a' chùis air na h-Albannaich 2-0 san t-Samhain.

'S e an geama ann an Inbhir Nis oidhche Luain am fear mu dheireadh sa bhuidhinn.

Tha Eilidh Shore aig Hearts am measg na th' ann an sguad na h-Alba.

"Tha sinn a' farpais an aghaidh nan sgiobaidhean as fheàrr agus 's e sin a tha sinn ag iarraidh airson adhartas a dhèanamh," thuirt Eilidh.

"Chaidh cuid de na geamaichean gu seo gu math is cuid cha deach, ach tha e cudromach gu bheil sinn ag ionnsachadh bhuapa uile.

"'S e ceum suas a th' ann ach tha thu ag ionnsachadh tòrr mu do dheidhinn fhèin agus mun fheadhainn eile san sgioba."

'S ann à Obar Dheathain a tha Eilidh fhèin is tha i gu math toilichte gu bheil na geamaichean seo air an sgaoileadh air feadh na dùthcha.

Tha i an dòchas gun dèan e feum a thaobh ùidh nigheanan òga na Gàidhealtachd a ghlacadh.

"A bhith suas sa cheann a tuath, tha e a' toirt dhuinn cothrom sealltainn do nigheanan òga dè as urrainn dhaibh dèanamh.

"Tha mi an dòchas gun tig daoine a-mach ann an Inbhir Nis gus taic a thoirt dhuinn agus gun urrainn dhuinne ginealach ùr de chluicheadairean a bhrosnachadh."

Tòisichidh an geama aig Pàirc Chaledonian aig 7:00f oidhche Luain is bidh e saor an-asgaidh faighinn a-steach.

Tùs an deilbh, SPFL

Thèid cuairt dheireannach Cupa Dùbhlain na h-Alba (Cupa KDM Evolution) eadar Raith Rovers agus Caledonian Thistle Inbhir Nis a chluiche aig Pàirc Wyre aig Firhill ann an Glaschu.

Thèid an geama air adhart Là na Sàbainn 5mh den Ghiblean (Là na Càisge) aig 4.10f agus thèid a chraoladh beò air BBC ALBA.

Seo a' chiad bhliadhna a chaidh an fharpais a chumail ann an seadh lìg sa chiad ìre.

Thuirt àrd-stiùriche an SPFL Niall Doncaster gun robh e airson meal an naidheachd a chur air na sgiobannan airson a' chuairt dheireannach a ruighinn. Thuirt e cuideachd gun robh iad airson taing a thoirt do Phartick Thistle airson cead a thoirt seachad an geama a chluiche sa phàirc acasan.

Gheibh an sgioba a bhuannaicheas am-bliadhna £150,000 leis an dàrna sgioba a' faighinn £100,000.

Tùs an deilbh, Lloyd Wright

Air Spòrscast tha Kerry Nic a' Phì ag innse do dh'Eileen NicDhòmhnaill mar a chaidh dhi aig rèis nam beanntan Atlas.

'S e rèis rothaireachd a th'ann thar 1,350km tro na beanntan Atlas ann am Morogo agus chrìochnaich Kerry anns an dàrna àite.

Gheibh sibh an còmhradh air fad eadar Kerry agus Eileen an seo.

Tha Caley Thistle Inbhir Nis sa chuairt dheireannaich de Chupa Dùbhlain na h-Alba às dèidh dhaibh an gnothach a dhèanamh air Ayr United aig Pàirce Somerset oidhche Mhàirt.

Chuir Jordan Alonge ICT air thoiseach às dèidh 27 mionaidean is Luis Longstaff air loidhne dìon Ayr fhosgladh.

Ged a chuir George Finney Ayr co-ionnan tràth san dàrna leth, 's e an duine sin Alonge a fhuair an tadhal cudromach a bhuannaich an geama do dh'Inbhir Nis le ochd mionaidean air fhàgail.

Rinn Oscar Mac an t-Saoir obair air leth air a' chliathaich gus am ball a sguabadh a-steach dhan bhocsa is dh'èirich Alonge gus a stiùireadh dhan lìon le cheann.

Chrìochnaich an geama 2-1 is ICT a-nise sa chuairt dheireannaich far an tèid iad an aghaidh Airdrieonians no Raith Rovers.

Chìthear an geama sin beò air BBC ALBA oidhche Chiadain bho 7:35f.

Tùs an deilbh, SWF

Tha fàs a' tighinn air Lìog na Gàidhealtachd is nan Eilean ann am ball-coise nam ban is An Gearasdan air tighinn a-steach dhan fharpais.

'S e seo a' chiad turas bho thòisich an lìog ann an 2019 a bhios sgioba à Loch Abar a' farpais ann.

"Tha sinn gu math toilichte gu bheil sgioba ùr air a stèidheachadh agus ann an sgìre de dh'Alba far nach robh sgioba bhoireannach roimhe.

"Tha e a' tighinn às dèidh do Shealtainn cluich sa chupa an-uiridh agus an dà chuid Ross County agus Bucaidh gluasad gu ìre nas àirde."

Tòisichidh seusan ùr Lìog na Gàidhealtachd is nan Eilean Didòmhnaich seo tighinn leis na geamaichean seo:

• Nairn St Ninian - An Gearasdan

• Clach na Cùdainn - Boireannaich Arcaibh

• Gallaibh - Cataibh

Tùs an deilbh, Andrew Leinster

Thuirt an rothaiche Gàidhealach Fin Greumach gu bheil e air a dhòigh às dèidh dha a bhith air a thaghadh ann an sgioba na h-Alba 'son Geamaichean a' Cho-fhlaitheis ann an Glaschu.

Tha Fin, 26, a thogadh ann an Srath Pheofhair, air soirbheachadh gu mòr anns na bliadhnaichean mu dheireadh is e air bonn òir fhaighinn aig na Geamaichean Paralimpigeach ann an 2024 ann an rèis rathaid C1-3.

Tha e cuideachd air trì buinn airgid fhaighinn aig na Geamaichean Paralimpigeach, a thuilleadh air sreath de dhuaisean aig Farpaisean Para na Cruinne.

Cha robh Fin aig Geamaichean a' Cho-fhlaitheis gu seo is gu h-iongantach, chan eil e gu seo air Alba a riochdachadh nas motha.

"Cha robh mi an dùil gum faighinn cothrom rèiseadh airson Alba ann an Alba is tha e dìreach sònraichte," thuirt Fin.

"'S e seo an targaid mhòr a bh' agam is tha mi air mo dhòigh gu bheil e a-nise air a dhearbhadh."

• Para-lùth-chleasaiche na Bliadhna dha Fin Greumach

• Fàilte mhòr air Fin Greumach an Inbhir Pheofharain

• Bonn airgid dha Fin Greumach

Chaidh an rothaiche Neil Fachie a thaghadh cuideachd ann an sgioba na h-Alba.

Tha Fachie, 41, air soirbheachadh 19 tursan ann am Farpaisean Para na Cruinne is air ceithir buinn fhaighinn aig na Geamaichean Paralimpigeach.

Tha Fachie mar-thà air Alba a riochdachadh trì tursan roimhe aig Geamaichean a' Cho-fhlaitheis is e air còig buinn òir is bonn airgid a bhuannachadh.

Tha sin a' fàgail gur e an dàrna lùth-chleasaiche as soirbheachaile a-riamh aig Alba aig Geamaichean a' Cho-fhlaitheis.

Thuirt Fachie gun robh e a' smaointinn gur dòcha gun robh na làithean aige aig àrd-ìre seachad, ach nach b'urrainn dha cothrom eile air Geamaichean a' Cho-fhlaitheis a dhiùltadh.

Bidh na geamaichean ann eadar an 23mh den Iuchar agus an 2na den Lùnastal.

Tòisichidh Baile Ùr an t-Slèibh an oidhirp aca air Cupa na Camanachd a dhìon le geama duilich san dàrna chuairt an aghaidh Chaoil Bhòid ann an Taigh na Bruaich.

Bheir an geama sin còmhla a dhà de dh'fhuamhairean traidiseanta na spòrs.

Bidh a' chiad chuairt mar a leanas:

• Obar Dobhair - A' Mhanachainn

• Cill Mhàilidh - Gleann Urchadain

• Ceiltich an Òbain - Àird nam Murchan

• GMA - Srath Ghlais

• Eilean Bhòid - Inbhir Aora

• Inbhir Nis - Lòbhat

Agus seo an dàrna cuairt:

• Eilean Bhòid / Inbhir Aora - An t-Eilean Sgitheanach

• Loch Abar - Cill Mhàilidh / Gleann Urchadain

• Cabar Fèidh - Ceiltich an Òbain / Àird nam Murchan

• Obar Dobhair / A' Mhanachainn - Camanachd an Òbain

• GMA / Srath Ghlais - Ceann Loch Seile

• Inbhir Nis / Lòbhat - An Gearasdan

• Caol Bhòid - Baile Ùr an t-Slèibh

• Ceann a' Ghiùthsaich - Caol-Gleann

Gheibhear barrachd mun taghadh mar a thachair e an seo.

Tùs an deilbh, Getty Images

Stèidhich Megan Keith clàr ùr Eòrpach ann an 10k nam ban aig rèis Facsa Castellón san Spàinn.

Chuir an tè-ruith à Inbhir Nis crìoch air an rèis ann an 30:07 - diog nas luaithe na an clàr Eòrpach a bh' ann is a bha aig Eilish McColgan.

A dh'aindeoin gun d'fhuair i an clàr Eòrpach, chrìochnaich Keith sa cheathramh àite ann an Castellón.

'S i Caroline Gitonga à Ceinia a bhuannaich ann an 29:34 is Nelvin Jepkemboi, cuideachd à Ceinia, san dàrna àite ann an 29:45.

Bha Chaltu Dida à Etìopia san treas àite le àm 29:50.

Chrìochnaich Eilish McColgan san t-siathamh àite ann an 30:35.

Bha McColgan air clàr Eòrpach de 30:19 san 10k a stèidheachadh ann an 2022 ach chaidh a bhriseadh san Fhaoilleach am-bliadhna le Jana Van Lent às a' Bheilg.

Dìreach seachdain às dèidh sin ge-tà, stèidhich McColgan clàr ùr aig 30:08 ann am Valencia.

Tùs an deilbh, Aonghas Trinder/Cairngorm Mountain

Tha ionadan spòrs geamhraidh na h-Alba ag ràdh gu bheil an seusan as fheàrr ann an sia bliadhna air a bhith aca am-bliadhna.

Tha ionad Ghleann Sìth air a bhith fosgailte bho dheireadh na Dùbhlachd 2025 agus thuirt iad gu bheil cùisean air a bhith "mìorbhaileach" thar na trì seachdainean mu dheireadh.

Thuirt ionad Ghleann Comhainn gur e seo an seusan as fheàrr a th' air a bhith aca bho àm Chovid agus thuirt ionad a' Chàirn Ghuirm gur i "bliadhna sgoinneil" a th' air a bhith ann thuige seo.

Tha an sneachd cuideachd a' ciallachadh ge-tà, gu bheil cunnart a bharrachd ann bho mhaoimtean-sneachda ann an cuid de bheanntan na h-Alba. Chaidh cha mhòr 100 a chlàradh thairis air a' mhìos mu dheireadh.

Chaidh rabhaidhean fhoillseachadh airson beanntan a' Mhonaidh Ruaidh, Creag Meagaidh agus Loch Abar.

Tha sneachd agus aimsir chiùin o chionn ghoirid a' ciallachadh gun deach aig gach ionad spòrs geamhraidh ann an Alba air fosgladh airson spòrs sneachda.

Thuirt Andy Meldrum o ionad Ghleann Comhainn gun robh còrr air 1,000 luchd-sgithidh agus mu 600 luchd-sleidsidh aca Dimàirt 17mh den Ghearran.

Thuirt àrd-stiùiriche ionad Ghleann Sìth Daibhidh Farquharson gun robh cùisean air tighinn ri chèile aig deagh àm - le sgoilearan far na sgoile airson grunn làithean sa Ghearran.

"Air an là as trainge againn, tha 2500 air tadhal oirnn. Tha sin tòrr nas fheàrr na àm sam bith eile o bha sinn dùinte air sàileibh Covid," thuirt e.

Thuirt e cuideachd gun deach aca air mòran shlighean fhosgladh agus gun robh sin a' ciallachadh gum feumadh iad tòrr a bharrachd luchd-obrach - eadar 60 is 70 an taca ri 15 gu h-àbhaisteach.

Tùs an deilbh, Aonghas Trinder/Cairngorm Mountain

Thuirt ionad a' Chairn Ghuirm faisg air an Aghaidh Mhòir gu bheil iad fàilte a chuir air 23,000 luchd-sgithidh o dh' fhosgail iad air an 21mh den t-Samhainn.

Thuirt neach-labhairt gu bheil 68 là de spòrs sneachda air a bhith aca on uairsin agus gu bheil an sgioba aca air a' bheinn air a bhith ag obair o mhoch gu dubh airson na goireasan a chumail a' dol.

Tha Ionad Nibhis faisg air a' Ghearasdan agus an Lecht ann an Siorrachd Obar Dheathain cuideachd air a bhith fosgailte.

Nas tràithe an t-seachdain sa thuirt Sgioba Teasargain Bheanntan Loch Abair gun do lorg iad maoim-sneachda ann an sgìre An Uillt Ruaidh air Beinn Nibhis fhad's a bha iad a' dèanamh cobhair air daoine air a' bheinn.

San Spòrscast as ùire tha Iain Moireasdan a' toirt thugainn prògram sònraichte a chlàr e o chionn faisg air 20 bliadhna a' sealltainn ri mar a bha iomain gu mòr mar phàirt den choimhearsnachd ann an Uibhist.

Sa chriomag seo cluinnear DR MacDhòmhnaill agus Lachlann MacCuithein nach maireann.

Gheibhear an Spòrscast gu lèir an seo.

Bhuannaich an draibhear Scott MacBheatha a' chiad rèis aige mar phàirt de Championship Railidh na h-Alba is an 'Snowman' a' cur seusan ùr gu dol Disathairne 's a chaidh.

Rinn MacBheatha, a bhuinneas don Bhlàr Dhubh, a' chùis anns an Volkswagen Polo R5 aige le a cho-dhraibhear Anndra Falconer, a bhuinneas do dh'Inbhir Nis.

Chrìochnaich iad 17 diogan air thoiseach air dithis à Innis Tìle, Daniel Sigurðarson and Ásta Sigurðardóttir a bha san dàrna àite le Alexander Vassallo (York) agus Chris Lees (Glaschu) a' crìochnachadh san treas àite.

Tòisichidh Ceann a' Ghiùthsaich an oidhirp aca Cupa MhicThàmhais a bhuannachadh 'son an còigeamh turas ann an streath le geama doirbh air falbh an agaidh Chinn Loch Seile.

'S e Ceann Loch Seile an thog an cupa ann an 2021 - a' bhliadhna mus do thòisich sreath Chinn a' Ghiùthsaich.

'S iad cuideachd an aon sgioba a rinn a' chùis air Kings sa Phrìomh Lìog ann an 2025.

Bha seo am measg nan geamaichean a thàinig às an ad aig an taghadh aig Pàirc a' Bhucht Dihaoine.

Bidh sùil aig mòran cuideachd air Loch Abar an aghaidh nan nàbaidhean aca bhon Ghearasdan.

Tha an taghadh mar a leanas:

• Loch Abar - An Gearasdan

• Inbhir Nis - Cabar Fèidh

• Ceann Loch Seile - Ceann a' Ghiùthsaich

• An t-Eilean Sgitheanach - Cill Mhàilidh

• Srath Ghlais - Gleann Urchadain

Tha Lòbhat, a' Mhanachainn is Baile Ùr an t-Slèibh a' dol dìreach dhan dàrna cuairt.

Bidh na geamaichean sa chiad chuairt ann Disathairne an 4mh den Ghiblean.

Tùs an deilbh, Lloyd Wright

Thuirt an rothaiche Uibhisteach Kerry Nic a' Phì gur e rud cho iongantach 's a rinn i na beatha a bh' ann an Rèis Bheanntan Atlas ann am Moroco is i air crìochnachadh san dàrna àite.

Thòisich an rèis Dihaoine is slighe 1,350km ro na farpaisich is tro bheanntan àrda.

Rinn Kerry a' chùis air an dùbhlan ann an 5 là, 14 uairean a thìde is 5 mìonaidean.

'S i Cynthia Carson a rinn an gnothach ann an 5 là, 5 uairean a thìde is 2 mhionaid.

Tùs an deilbh, Lloyd Wright

A' bruidhinn ri làrach Facebook na rèise, taobh a-muigh, thuirt Kerry nach robh siognal fòn aice fad làithean is nach robh i fiù 's a' faireachdainn gun robh i ann an rèis.

Rinn an fheadhainn a chuir an rèis air dòigh moladh mòr oirre is iad ag ràdh gun robh i air oidhirp air leth a dhèanamh ann am-bliadhna nuair a bha na farpaisich san fharsaingeachd aig ìre fìor àrd.

Dhearbh iad cuideachd gum bi Kerry a' farpais aig an rèis mhòir aca Silk Road ann an Kyrgyzstan as t-samhradh.

Tha Spòrscast air a bhith a' coimhead air ais air Super Bowl 60 is mar a rinn na Seattle Seahawks an gnothach air na New England Patriots 29–13.

Bhiodh e fìor ri ràdh nach e sin an geama a bha na h-eòlaichean againn a' sùileachadh aig toiseach an t-seusain!

Gheibhear an còmhradh gu lèir eadar Calum Dòmhnallach agus Colin George Moireasdan ann an Spòrscast an seo.

Tha Kerry Nic a' Phì ri rothaireachd-beinne ann an sgìre Atlas de Mhoroco oidhche Haoine far a bheil i gu bhith a' siubhal fad còrr is 800 mìle thairis air nas lugha na seachdain.

Cluinnear tuilleadh bho Kherry air Spòrs na Seachdain Disathairne air BBC Radio nan Gàidheal agus air BBC Sounds