Spòrs

Theid Ceann a' Ghiuthsaich an aghaidh sgioba a' Ghearasdain sa chiad iar chuairt dheireannach do Chupa na Camanachd Disathairne ann an Inbhir Nis.

Tha an Gearasdan aig mullach na lìog le Ceann a' Ghiuthsaich dà phuing air an cùlaibh le gèam a' bharrachd ri chluich.

Chrìochnaich an aon ghèam eatorra am bliadhna co-ionnan, mar sin tha dùil ri gèam teann aig Pairc a' Bhucht.

Bhruidhinn Iain Friseal agus Jack Friseal rinn air thoiseach air a' ghèam.

Thèid sgioba an Taobh Siar an aghaidh an Rubha sa chuairt dheireannach de Chupa Eilean an Fhraoich.

Rinn an Taobh Siar a' chùis air sgioba a' Bhac 2-0 Diciadain gus buannachadh 5-4 thar an dà gheam. Ali 'Barvas' MacLeòid leis a' chiad tadhal agus Scott MacArtair a' faighinn an dara fear.

Thèid cuairt dheireannach Chupa Eilean an Fhraoich a' chumail air an 8mh den Lùnastal ann an Garrabost.

Dealbhan bhon gheama bho 'Islandfootie'.

Tha Tour de France nam fear seachad, ach de seòrsa rèis a bh'ann? Tha Dòmhnall MacLaomainn agus Gòrdan Camshron a' coimhead air ais air agus a deasbad na puingean as cudromaiche.

Tùs an deilbh, Camanachd Association

'S e Ailean MacRath àrd-chòidse ùr sgioba iomain na h-Alba.

Tha e a'gabhail àite Garry Reid a bha os ceann an sgioba son an dà gheama eadar-nàiseanta mu dheireadh.

Tha MacRath na mhanaidsear air Glaschu Meadhan Earra-Ghàidheal san lìog nàiseanta cuideachd, agus an sgioba aige an-dràsta seachd puingean bho mhullach na lìg, le dà gheama a bharrachd aca ri chluich.

Thuirt è gu bheil e air a dhòigh, is Alba a' dèanamh deiseil airson geama le Èirinn aig an taigh airson a' chiad turas o 2018.

Chan eil Alba air an gnothach a dhèanamh air Èirinn a' dol air ais gu 2019 agus tha MacRath den bheachd gu bheil obair mhòr air thoiseach air.

Thuirt e: "Tha deagh fhios agam cho cudromach sa tha an geama, agus an t-uallachadh a dh'fheumas sinn dèanamh ma tha sinn airson an tiotal a thoirt air ais."

Tha geama na bliadhna-sa ann an Inbhir Nis air an 25mh den Dàmhair aig Pàirc a' Bhucht.

Tha Rangers sa Ghrèig air thoiseach air an dara geama aca le Panathinaikos san dara cuairt dearbhaidh de Lìog na h-Eòrpa.

Bhuannaich sgioba Russell Martin a' chiad gheam 2-0 aig Ibrox agus tha luchd-taic Rangers, nam measg Eòghann MacAnndrais, misneachail mu na cothroman aca.

'S iad an Rubha a tha feitheamh air sgioba a' Bhac neo an Taobh Siar sa chuairt dheireannaich de Chupa Eilean an Fhraoich.

Chaill an Rubha 3-2 ri Càrlabhagh oidhche Luain ach chaidh iad troimhe leis gun do bhuannaich iad a' chiad gheama 2-0.

Bha an Rubha 2-0 air thoiseach tràth sa gheama is Josh Mac a' Ghobhainn agus Luke MacAoidh a' faighinn nan tadhal.

Chaidh aig Càrlabhagh air tilleadh gus buannachadh air an oidhche, ach cha robh gu leòr an sin gus a dhol troimhe.

San iar-chuairt dheireannaich eile tha am Bac 4-3 air thoiseach ron dàrna geama -ann am Barbhas.

Thuirt manaidsear Loch Abair gu bheil e air a dhòigh glan gun do bhuannaich iad Cupa a' Bhaile Mhòir Disathairne.

Rinn iad a' chùis air Inbhir Aora 3-0 ann an Drochaid an Aonachain gus an fharpais a ghlèidheadh.

Le tuilleadh, seo Javen Houston.

Thèid Camanachd an Òbain an aghaidh Cheann a' Ghiùthsaich sa cuairt dheireannach de Cupa MhicAmhlaigh an ath-mhios.

Thàinig an dà sgioba sin am bàrr sna h-iar chuairtean deireannach a chaidh a chluich Disathairne.

Rinn Camanachd an Òbain a' chùis air Glaschu Meadhan Earra-Ghàidheil 3-1 airson faighinn troimhe.

Anns a' gheam eadar naimhdean Bhàideanaich 's iad Ceann a' Ghiùthsaich a thàinig am bàrr 3-0 an aghaidh Bhail' Ùr an t-Slèibh.

'S e seo an ceathramh bliadhna ann an sreath a' choinnicheas an dà sgioba seo ann an cuairt dheireannach Cupa MhicAmhlaigh.

Bha dà gheam ann am Prìomh Lìog na h-Iomain Disathairne cuideachd, le Ceann Loch Seile a' dèanamh a' chùis 2-0 air Lòbhat agus Cabar Fèidh a' tighinn am bàrr 4-2 an aghaidh Chaol Bhòid.

'S e oidhche "iongantach ris nach robh duine an dùil" a bh' ann ann an Lìog Leòdhais agus na Hearadh Dihaoine, a rèir Choinnich MhicLeòid.

Cha deach aig gin de na ceithir sgiobaidhean aig a bheil cothrom air an tiotal buannachadh.

Chaill sgioba a' Bhac 4-3 ann an Nis, bha an Taobh Siar agus an Rubha co-ionnan 3-3 agus chaill Càrlabhagh aig an taigh ris na Lochan.

Tha ceithir geamaichean aig sgioba a' Bhac agus an Taobh Siar ri chluich agus a rèir Choinnich 's ann eatorra a tha an tiotal.

"Tha mi a' smaoineachadh ge bith cò bhuannaicheas na ceithir geamaichean sin, 's iad a bhuannaicheas an lìog.

Chanadh tu gu bheil na geamaichean a th'air fhàgail aig sgioba a' Bhac beagan nas fhasa."

Tùs an deilbh, lhfa.org.uk

Tha ball-coise ionadail agus nàiseanta, iomain agus rugbaidh am measg nan cuspairean a th'aig Derek MacAoidh air prògram na seachdain-sa.

Bidh sgioba a' Bhac an dòchas an deireadh-sheachdain a chrìochnachadh co-dhiù dà phuing air thoiseach air chàch aig mullach Lìog Leòdhais agus na Hearadh. Tha iad a' cluich Nis air falbh bhon taigh oidhche Haoine.

Ma tha An Taobh Siar airson ceann a' mhaide a' chumail riutha, feumaidh iad na trì puingean a thogail an aghaidh an Rubha.

Tha Càrlabhagh còig puingean air cùlaibh A' Bhac, agus trì air cùlaibh nan Siarach, ach tha geam a bharrachd aca ri chluich agus shaoileadh tu gum biodh iad ro làidir do na Lochan aig an taigh.

San gheama eile ann an Lìog Leòdhais agus na Hearadh Dihaoine, tha an dà sgioba à Steòrnabhagh a' coinneachadh is Aths a' cur fàilte air United.

Chan eil geamannan ann an Lìog Uibhist is Bharraigh an deireadh-sheachdain sa idir, agus ann an Lìog Iar Thuath na Gaidhealtachd, tha Malaig a' cur fàilte air Slèite is an t-Srath agus an lìog air sgarradh. Chan eil ach trì puingean eadar na sgiobaidhean air fad, le Slèite is an t-Srath sa chiad àite le 22 puing agus Malaig dìreach air an cùlaibh air 20.

Chan eil ach trì sgiobaidhean sa bhuidheann, mar sin tha an Gearasdan, aig a' bheil 19 puingean, nan tàmh.

Tha na trì sgiobaidhean aig bonn na lìog a-nis a' farpais airson Cupa Chlann Dòmhnaill. Tha Iar Thuath an Eilein Sgitheanaich a' cur fàilte air Caol Àcainn le Port Rìgh aig fois. Tha na trì sgiobaidhean sin a' toiseachadh a-rithist gun phuing.

'S iad an Rubha a tha air thoiseach às deidh a' chiad gheam aca le Càrlabhagh ann an iar-chuairt dheireannach de Chupa Eilean an Fhraoich.

Thàinig na Rubhaich am bàrr 2-0 ann an Garrabost oidhche Chiadain.

Seo agaibh sùil air ais air mar a chaidh an geam.

Air Spòrscast na seachdain seo, tha Javen Houston is aoighean a' coimhead air adhart ri seusan ùr a' bhuill-coise. An tèid aig sgioba air stad a chuir air Celtic? Ciamar a thèid do Russell Martin? Dè an seorsa strì a bhios ann eadar Obar Dheathain, Hibs agus Hearts?

Gheibhear am prògram air fad an seo no air BBC Sounds.

Tùs an deilbh, BBC Sport

Thathar air na spòrsan a bhios nam pàirt de Gheamannan nan Eilean ann an 2027 fhoillseachadh.

Thèid na geamannan air adhart anns na h-Eileanan Fàrach agus tha 14 spòrs eadar-dhealaichte air a' chlàr.

Tha ball-basgaid, judo, losgadh, teanas agus volleyball uile a' tilleadh gu na geamannan.

Ach chan eil àite anns na geamannan airson bobhladh neo goilf, dà spòrs anns an do ghabh sgioba nan Eilean Siar pàirt aig Geamannan Arcaibh.

Thòisich linn Russell Martin aig Rangers le bhith a' dèanamh a' chùis air Panathinaikos 2-0 sa chiad gheam aca san dàrna cuairt dearbhaidh den Champions Lìog.

Le Findlay Curtis a' faighinn a' chiad tadhal tha fear de luchd-taic na sgioba, Ross Dòmhnallach, toilichte gu bheil cluicheadairean òga a' faighinn cothrom.

Cluinnear barrachd bho Ross air Spòrscast, is sinn a' coimhead air adhart ris an t-seusan ùr, air BBC Sounds bho 08:00m Diardaoin.

Tha bliadhna ri dhol gus an tòisich Geamaichean a' Cho-fhlaitheis ann an Glaschu.

Chaidh mascot nan geamaichean fhoillseachadh Diciadain - aon-adharcach leis an ainm Finnie.

Ged a bhios na geamaichean nas lugha an turas seo an coimeas ri 2014, tha Murchadh MacLeòid a bha ag obair gu saor-thoileach aig na geamaichean sin a' moladh do dhaoine eile a dhol an-sàs an ath-bhliadhna.

Tha làmh an uachdair aig a' Bhac san iar-chuairt dheireannach aca an aghaidh an Taobh Siar ann an Cupa Eilean an Fhraoich.

Bhuannaich Am Bac a' chiad gheama 4-3 ann an Col Uarach.

Thèid an dà sgioba an aghaidh a' chèile a-rithist an ath Dhiciadain ann am Barabhas.

Thèid An Rubha an aghaidh Càrlabhagh sa chiad gheama acasan san iar-chuairt dheireannach eile a-nochd.

Cluichidh Rangers an aghaidh Panathinaikos oidhche Mhàirt anns an dàrna cuairt dearbhaidh den Champions Lìog.

'S e seo a' chiad gheama farpaiseach aig Russell Martin os cionn an sgioba.

Às dèidh a' chiad gheama aig Ibrox cluichidh iad a-rithist an ath Dhiciadain thall sa Ghrèig.

Thèid an sgioba a bhuannaicheas an aghaidh Viktoria Plzen or Servette san ath chuairt.

Tha fear de luchd-leantainn Rangers, Colin George Moireasdan, den bheachd gum feum Rangers a bhith air thoiseach mus siubhal iad dhan Ghrèig.

Tùs an deilbh, RSAC Motorsport

Bha cùisean gu math teann eadar na prìomh fharpaisich aig Ralaidh RSAC na h-Alba ann an Dail Beithich aig an deireadh-sheachdain.

Thàinig Garry Pearson is Hannah NicFhilip am bàrr às dèidh dhaibh trì stèidsean a ghlèidheadh anns a' Fiesta Rally 2 aca.

B' e Dàibhidh Bogie agus Ciorstaidh Riddick, à Dùn Phris is Gall-Ghàidhealaibh a bhuannaich na trì stèidsean eile, gam fàgail dìreach 15 diogan air dheireadh air Pearson is NicFhilip.

Agus cha robh ach 28 diogan eadar na prìomh 3 chàraichean, le Mark McCulloch is Mìcheal Hendry san treas àite.

Bhuannaich Paddy Rothach às a' Chaol, agus Anndra Stevenson, à Baile nan Granndach, Rèis 2WD agus bha iad cuideachd anns an 10mh àite thairis air na roinnean air fad.

Ann am Prìomh Lìog na h-iomain aig an deireadh-seachdain, bhuannaich Ceann Loch Seile aig an taigh 2-1 an aghaidh Cheann a' Ghiùthsaich - a' chiad turas a chaill sgioba Bhàideanach ann an cha mhòr dà bhliadhna.

Chaidh aig na trì sgiobannan a th' aig mullach na lìog air buannachadh cuideachd, mar a leanas:

An Gearasdan 5-0 Lòbhat

Camanachd an Òbain 10-1 A' Mhanchainn

Bail' Ùr an t-Slèibh 6-1 Caol Bhòid

Bhuannaich Camanachd an Eilean Sgitheanaich 2-1 an aghaidh Chabar Fèidh aig Cùl Dà Leòthaid.

Tha An Gearasdan a-nise aig mullach a' Phrìomh Lìog.

Bhuannaich Ceiltich an Òbain Cupa a' Chinn-Fheadhna 4-2 an aghaidh Bhail' a' Chaolais ann an Canaich.

Thàinig Geamannan nan Eilean ann an Arcaibh gu ceann a-raoir.

Chrìochnaich sgioba nan Eilean Siar san ochdamh àite air clàr nam bonn le 11 duais a' dol dhachaigh leotha.

'S iad na h-Eileanan Fàrach a bh' aig mullach a' chlàir – dà bhliadhna mus bi na farpaisean a' tòiseachadh anns na h-eileanan sin fhèin.

Ag aithris à Arcaibh seo Ailean MacLeòid.

Rinn Am Bac a' chùis air Na Hearadh oidhche Haoine airson Cupa ABC a bhuannachadh.

Chrìochnaich an dà sgioba co-ionnan aig 3-3 às dèidh dhan a' Bhac tadhal fhaighinn ann an ùine a bharrachd aig deireadh a' gheam a' ciallachadh gun robh feum air breaban-peanais.

Thàinig Am Bac am bàrr 4-1 anns na breaban-peanais.

Ann an geam iongantach aig Pàirc Chnoc nan Gobhar chaidh Am Bac air thoiseach tràth tro Sheumas Moireach.

Fhuair Na Hearadh co-ionnan ge-tà às dèidh bhreab-peanais bho Anndra Moireasdan agus chuir Tam Dudley air thoiseach iad beagan mhionaidean às dèidh sin.

Thìll Am Bac le tadhal tràth san dàrna leth bho Eòghann Dòmhnallach.

Ach le beagan mhionaidean ri dhol chuir Coinneach MacSuain Na Hearadh air thoiseach a-rithist.

Ach le cùisean air a dhol a-steach a dh'ùine a bharrachd aig deireadh a' gheam bha briseadh-cridhe ann dha Na Hearaich, is Louie Dòmhnallach a' toirt a' gheam co-ionnan uair eile bhon spot-pheanais.

Bha barrachd bhreaban-peanais a dhìth airson an geam a dhearbhadh agus 's iad Am Bac a bhuannaich sin 4-1.

Às dèidh briseadh-dùil an là an-dè, thog sgioba ball-coise nam ban aig WIIGA iad fhèin airson a' bhonn umha a bhuannachadh aig Geamannan nan Eilean.

Rinn iad a' chùis air Gozo an-diugh 3-0 airson deagh chrìoch a chur air an iomairt aca ann an Arcaibh.

Tha 11 bonn aig sgioba WIIGA uile gu lèir.

Bhuannaich Abbie Stiùbhart às na h-Eileanan an Iar bonn umha ann an rèis an 800m aig Geamannan nan Eilean.

Chrìochnaich i le uair de 2:14.11 a bha nas lugha na dà dhiog air cùlaibh Darcey Hodgson à Guernsey a bhuannaich am bonn òir le Emily NicArtair à Arcaibh a' togail am bonn airgid.

'S e seo an dàrna bonn aig Abbie às dèidh dhith bonn airgid a bhuannachadh san 1500m.