Aubameyang, Ayew, Lukaku... Lee ndị ọgba bọọlụ Afrịka nna ha bụkwa ọkaibe n'egwu bọọlụ

Egwuregwu bọọlụ ụkwụ bụ egwuregwu a ga-akpọ ọkaibe n'Afrịka n'ihi etu ndị mmadụ si akwado ya.

Mpaghara Afrịka enyekwala ụwa ọtụtụ ndị a ma ama na ya bụ egwuregwu nke mere na a kpọọ aha Afrịka n'eguregwu bọọlụ, ọtụtụ aha ndị ọkaibe ga-agbata ndị mmadụ n'obi.

Dịka ọtụtụ afọ na-agafe, mmụta egwuregwu bọọlụ esila n'aka ndị ọkaibe na-agafe n'aka ụmụ ha dịka ọtụtụ ụmụ ndị gbara bọọlụ n'oge gara aga, bụzịkwa ọkaibe nke onwe ha ugbua.

Lee ụfọdụ ụmụ Afrịka aha ha na-ewu ewu ugbua dịka aha nna ha si wuo ewu n'oge gboo:

Andre na Jordan Ayew

Andre Ayew na nwanne ya nwoke bụ Jordan bụ Abedi Ayew onye e ji Abedi Pele mara.

Abedi bụ onye a na-ahụta dịka ọkaibe n'egwuregwu bọọlụ n'Afrịka n'ihi ike ọ kpara oge ọ nọchitere anya mba ya bụ Ghana malite n'afọ 1982 ruo 1998.

O so na otu ndị Ghana buliri iko mba Afrịka nke afọ 1982, mana ọ gbaghị iko mba ụwa ọbụla tupu ọ laa ezumike.

Ụmụ ya atọ bụ Andre, Jordan na Rahim bụcha ndị ọgba bọọlụ, mana ọ bụ Andre na Jordan ka a kacha anụ aha ha.

Na Disemba 2011, Andre Ayew nwetara nturuugo onye kacha agba bọọlụ n'Afrịka nke BBC na-enye; nna ya bụ Abedi ritekwara nturuugo a n'afọ 1991.

Ugbua, Andre na-agbara otu bọọlụ Al Sadd nke mba Qatar ebe Jordan nọ n'otu bọọlụ Crystal Palace nke mba England.

Pierre-Emerick Aubameyang

Aubameyang agbaala bọọlụ n'ọtụtụ otu bọọlụ a ma aha ha na mpaghara Europe nke gụnyere: AC Milan, Borussia Dortmund, Arsenal, Barcelona, na Chelsea ebe ọ nọ ugbua.

Nwa amadị a agbakwaala asọmpi 72 maka mba ya bụ Gabon ma nye goolu 30 tupu ọ laa ezumike ịgbara mba ya bọọlụ n'ọnwa Mee afọ 2022.

Nna ya bụ Pierre-François Aubameyang gbwakwaara mba Gabon bọọlụ malite na 1985 ruo 1998.

O so mba Gabon gaa asọmpi iko mba Afrịka nke afọ 1994 (ebe ọ bụ kaptịn) nakwa nke 1996, mana o bughị iko bụla tupu ọ laa ezumike.

Aubameyang nke okenye gbakwaara otu bọọlụ Stade Lavallois na Le Havre nke mba France.

Romelu Lukaku

Romelu Lukaku bụ aha na-ada ụda n'egwuregwu bọọlụ na mpaghara Europe n'ihi ike nwa amadị a na-akpa, mana ọtụtụ amaghị na nna ya bụ Roger Lukaku gbakwaara mba Congo bọọlụ oge ha ka na-aza Zaire, malite n'afọ 1993 ruo 1996.

Roger Lukaku gbara bọọlụ n'otu egwu KV Oostende, KV Mechelen na Germinal Ekeren nke mba Belgium tupu ọ laa ezumike n'afọ 1999.

Romelu Lukaku na-agbara mba Belgium ugbua ma bụrụ onye kacha nye goolu n'otu bọọlụ mba ahụ, dịka o nyerela goolu 68.

Nwanne ya nwoke bụ Jordan Lukaku na-agbakwa bọọlụ n'otu SD Ponferradina nke mba Spain.

Timothy Tarpeh Weah

Kamgbe egwu bọọlụ malitere, naanị otu onye Afrịka nwetarala nturuugo onye kacha agba bọọlụ n'ụwa niile; onye ahụ bụ nwa amadi Liberia aha ya bụ George Weah, onye bụzi onyeisiala mba Liberia ugbua.

Mana otu ihe George Weah na-emenwughị bụ ịga asọmpi iko mba ụwa.

N'afọ 2022, nwa ya bụ Timothy Weah mere ihe ahụ nna ya emenwughị dịka o so mba USA gaa asọmpi iko mba ụwa na Qatar.

Tupu o sonye otu bọọlụ nke USA, Timothy Weah nwere ohere ịgbara mba anọ bọọlụ: Amerịka - ebe a mụrụ ya, Liberia - obodo nna ya, Jamaica - obodo nne ya, na France obodo ebe ọ nọ kamgbe ọ dị afọ 14.

Na Qatar 2022, Timothy nyere goolu n'asọmpi USA na Wales, nke bụ goolu mbụ ọ na-enye n'asọmpi Iko Mba ụwa.

Ndị ọzọ...