ኣሜሪካ፡ ሓደ ዓቢ ድልድል ብመርከብ ድሕሪ ምህራሙ ፈሪሱ፡ መካይን ጥሒለን

ኣብ ባልቲሞር ኣሜሪካ ሓንቲ መርከብ ጽዕነት ምስ ሓደ ክፋል ድልድል ‘ፍራንሲስ ስኮት ኪይ ብሪጅ’ ድሕሪ ምግጫዋ እቲ ድልድል ክፈርስ እንከሎ ብዙሓት መካይን ናብቲ ማይ ጥሒለን።

እቲ ሓደጋ ሎሚ ወጋሕታ ከባቢ ሰዓት 1፡30 ዘጋጠመ ኰይኑ እቲ ድልድል በታ መርከብ ድሕሪ ምህራሙ ብሓዊ እናተቓጸለ ጥሒሉ።

ኣብ ማሕበራዊ መራኸቢታት ኤክስ ዝተዘርግሐ ቪድዮ ካብቲ 3 ኪሜ ዝንውሓቱ ድልድል ዝዓበየ ክፋሉ ክፈርስን መካይን ናብቲ ማይ ክጸድፋን የርኢ።

በዓልመዚ መጓዓዝያ ሜሪላንድ ኣብ ኤክስ ኣብ ዝዘርግሖ ሓበሬታ፡ ኵሉ መስመራት እቲ ብ ኣይ-695 ኪይ ብሪጅ ዝፍለጥ ድልድል ተዓጽዩ ምህላው ኣፍሊጡ።

ከባቢ 20 ሰባት ኣብቲ ኣዝዩ ቈራሪ (-1 ዲግሪ ሴንቲግረድ) ማይ ክህልዉ ከምዝኽእሉ ክጥርጠር እንከሎ፡ ንምድሓኖም ጻዕርታት ይካየድ ከምዘሎ ዳይረክተር ኮሙኒኬሽን ክፍሊ ምክልኻል ባርዕ ሓዊ ከተማ ባልቲሞር ኬቨን ካርትራይት ገሊጹ።

ወደብ ባልቲሞር ንፍሉያት መራኽብ ጽዕነት ኣገልግሎት ዝህብ ኣብ ኣሜሪካ ዝዓበየ ወደብ እዩ።

እታ ‘ዳሊ’ ዝተሰመየት 300 ሜትር ዝቝመታ ኮንተይነራት እትጽዕን መርከብ፡ ባንዴራ ሲንጋፖር እተንበልብል ኰይና ናብ ኰሎምቦ ስሪላንካ ተምርሕ ምንባራ ተገሊጹ።

ኣብ ሰራሕተኛታት እታ መርከብ ዝወረደ ጉድኣት ከምዘየለ ኣካያዲ እታ መርከብ ዝዀነ ትካል ጽዕነት ‘ሲነርጂ ማሪን ግሩፕ’ ሓቢሩ።

በቲ ሓደጋ ዝወረደ ጕድኣት ዛጊት'ኳ እንተዘይተነጸረ፡ እቲ ኵነታት ቀዳምነት ተዋሂብዎ ህይወት ንምድሓን ጻዕርታት ይካየድ ከምዘሎ ዳይረክተር ኮሙኒኬሽን ክፍሊ ምክልኻል ባርዕ ሓዊ እታ ከተማ ገሊጹ።

እዞም ኣሳእል፡ "ሓንቲ ዓባይ መርከብ ኣብ ሜሪላንድ ከባቢ ሰዓት 1፡30 ምስ ድልድል 'ፍራንሲስ ስኮት ኪይ ብሪጅ' ክትጋጮ እንከላ ከምዘርኢ ክፍሊ ምክልኻል ባርዕ ሓዊ ባልቲሞር ሓቢሩ።