ላዕለዋይ መራሒ ኢራን ንምቕታል ኣዋርሕ ዝወሰደ ውጥን ኣመሪካን እስራኤልን

እቲ ንላዕለዋይ መራሒ ኢራን ኣያቶላህ ዓሊ ኻመኒ ዝቐተለ መጥቃዕቲ፡ ከምቲ ዝተገመተ ፍርቂ ለይቲ ዘይኰነስ ረፋድ'ዩ ተፈጺሙ።

እዚ ዝዀነሉ ምኽንያት ድማ ኣመሪካን እስራኤልን ቅድሚ ሰዓታት ኣብ ኢደን ዝበጽሐ ወሳኒ ስለያዊ ሓበሬታ ክጥቀማሉ ስለ ዝወሰና እዩ።

ላዕለዎት መራሕቲ ኢራን መዓስ ክራኸቡ ይኽእሉ ንምፍላጥ ንኣዋርሕ ክከታተሉ ጸኒሖም። ላዕለዋይ መራሒ ኢራን ኣያቶላህ ኻመኒ ሰንበት ንግሆ ኣብ ማእከላይ ቴህራን ኣብ ዝርከብ ቀጽሪ ከም ዝኸውን ድማ ፈሊጦም።

ካልኦት ላዕለዎት ወተሃደራውን ስለያውን ሓበሬታታት ኣብ ሓደ እዋን ዝራኸብሉ ቦታ እውን ብልክዕ ፈሊጦም ነይሮም።

ኣመሪካን እስራኤልን ንኣዋርሕ ምንቅስቓሳት እቲ ላዕለዋይ መራሒ ክከታተላ ጸኒሐን እየን።

ፕረዚደንት ኣመሪካ ዶናልድ ትራምፕ ኣብ ማሕበራዊ መራኸቢታት ኣብ ዝዘርግሖ ጽሑፍ፡ እንታይ ዓይነት ሜላ ከም ዝተጠቕሙ ኣፋፍኖት እኳ እንተ ሃበ፡ እቲ ዝተጠቀምሉ ሜላታት ግን ገና ምስጢር እዩ ዘሎ።

"ካብ ስለያናን ኣዝዩ ረቂቕ ስርዓተ ክትትልናን ከምልጥ ኣይከኣለን።"

እቲ ምንጪ ሓበሬታ፡ ሰብ ክኸውን ይኽእል እዩ። እንተዀነ፡ ቴክኒካዊ ምክትታል ክኸውን ግን ዝያዳ ተኽእሎ ኣሎ።

ኣብ ዝሓለፈ ሰነ ኣብ ዝተኻየደ ናይ 12 መዓልታት ኲናት እስራኤልን ኢራንን፡ ምስ ንዩክለሳዊ መደብ ኢራን ዝተኣሳሰሩ ተመራመርትን ሰበስልጣንን ዒላማ ኰይኖም ነይሮም።

እስራኤል፡ ምንቅስቓስ ውልቀሰባት ንምክትታል ተለኮምን ሞባይል ተለፎንን ከም ዝተጠቕመት ተገሊጹ'ዩ።

እዚ ድማ ሓሓሊፉ፡ ምክትታል ምንቅስቓሳት ምስ ወሰንቲ ሰበስልጣን ዝተኣሳሰሩ ሓለውቲ የጠቓልል።

ኣብ ነዊሕ ግዜ፡ እዚ ንጥፈታት ንምግማትን ምርዳእን ከምኡ'ውን ናይ ተቓላዕነት ህሞታት ንምልላይ ክሕግዝ ይኽእል።

ኢራን፡ እቲ ላዕለዋይ መራሒኣ ኣብ ዓይኒ ጸላእታ ከም ዝኣተወ ትፈልጥ ስለ ዝነበረት፡ ንኣዋርሕ ነዞም ተቓላዕነት ምልላይን ምግጣምን ዘይምኽኣላ፡ ንጸጥታን ጸረ-ስለያኣን ዓቢይ ውድቀት እዩ።

ኢራናውያን፡ ብጨው-ቀትሪ መጥቃዕቲ ንምፍጻም ዘሎ ተኽእሎ ትሑት እዩ ኢሎም ገሚቶም ክዀኑ ይኽእሉ።

ኣብዚ ጉዳይ'ዚ፡ ስለያዊ ሓበሬታ ካብ ሲኣይኤ ዝመጽአ ኰይኑ፡ እቲ መጥቃዕቲ ናይ ምፍጻም ሓላፍነት ግን ናብ እስራኤል ከም ዝተሰጋገረ ኒውዮርክ ታይምስ ይሕብር።

እስራኤል ንመሪሕነት ዒላማ ኣብ ምግባር ትዅረት ክትገብር፡ ኣመሪካ ድማ ዝያዳ ኣብ ወተሃደራዊ ዒላማታት ከተተኵር ምክፍፋል ዕዮ ከም ዝነበረ እዩ ዘርኢ።

ብወሳኒ መልክዑ፡ እቲ ስለያ ብዛዕባ ምንቅስቓስ ላዕለዋይ መራሕን ካልኦት ሰበስልጣንን እኹል ሓበሬታ ክህብ እንከሎ፡ ነዊሕ ርሕቀት ሚሳይላት ክትኵሳ ዝኽእላ ጀት ተጠቒሞም መጥቃዕቲ ንምውጣን ኣኽኢሉዎም።

እዚ መጥቃዕቲ ዝሰፍሐ ወፍሪ ብምጅማር፡ ነቲ ዝተረኽበ ዕድል ንምጥቃም ዝዓለመ'ዩ ነይሩ።

ጀት እስራኤል ናብ ቴህራን ክበጽሓ ኣስታት ክልተ ሰዓታት ክወስደለን ይኽእል፤ እንተዀነ ክሳብ ክንደይ ርሒቐን ተተኰስቲ ከም ዝውንጭፋ ንጹር ኣይኰነን።

እቲ ውሳነ ኣብ ዝውሰደሉ እዋን፡ ጀት እስራኤል፡ ከባቢ ሰዓት 09፡40 ቅድሚ-ቐትሪ (ብኣቆጻጽራ ሰዓት እታ ሃገር ) ነቲ ቀጽሪ ንምጥቃዕ 30 ቦምባታት ከም ዝተጠቕማ ይግለጽ።

እዚ ዝዀነሉ ምኽንያት ድማ እቲ ላዕለዋይ መራሒ ንነብሱ ንምክልኻል፡ ኣብ ውሽጢ'ቲ ቀጽሪ ዝርከብ ትሕተ- መሬት ዝነበረ ዕርዲ ይጥቀም ስለ ዝነበረ ክኸውን ይኽእል እዩ።

ነቲ ዒላማ ከም ዝተወቕዐ ንምርግጋጽ እኹል ዕምቈት ንምፍሓር ብዙሕ ተተኰስቲ የድሊ ነይሩ ክኸውን ይኽእል እዩ።

ካልኦት ቦታታት ከም ርእሰ ከተማ ኢራን ዝኣመሰሉ'ውን ተሃስዮም እዮም። ቤትጽሕፈት ፕረዚደንት ማሱድ ፔዘሽክያን ሓደ ካብኣቶም ኰይኑ፡ ድሒሩ ዝወጽአ መግለጺ ውሑስ ምዃኑ ሓቢሩ።

ጸሓፊ ቤትምኽሪ ምክልኻል ዓሊ ሻምካኒ፡ ምኒስተር ምክልኻል ብርጋደር ጀነራል ዓዚዝ ናሲርዛደህን፡ ኣዛዚ ሓለዋ እስላማዊ ሰውራ ጀነራል መሓመድ ፓክፑርን ዝርከብዎም ሰለስተ ላዕለዎት ሰበስልጣን ምክልኻል ኢራን ከም ዝሞቱ ተረጋጊጹ።

እተን ነፈርቲ ኣብ ዝተጸግዓሉ እዋን፡ ፍርቂ ለይቲ ኰይኑ ፕረዚደንት ትራምፕ ምስ ገለ ላዕለዎት ሰበስልጣኑ ተኣኪቡ ነቲ ምዕባለታት ንምክትታል ኣብ ፍሎሪዳ ኣብ ዝርከብ ገዛኡ ነይሩ።

ኢራን ግን ነዚ ተኽእሎ ተዳልያ ነይራ፤ ንኻመኒ ጥራይ ዘይኰነስ ንብዙሓት ላዕለዎት ሰበስልጣን እውን ናይ ምትኽኻእ መደባት ከም ዝተገብረ ጸብጻባት ይሕብሩ።

እዚ ማለት፡ እቲ ቅትለት ኣብ ምዕባለ እዚ ግጭት እንታይ ትርጕም ከም ዝህልዎ ኣብ መጻኢ ዝርአ ክኸውን ይኽእል እዩ።