د امریکا کېنټاکي کې سېلابونه؛ ۳۷ کسان وژل شوي، سلګونه لادرکه دي
د عکس سرچینه، Getty Images
د امریکا په سویل ختېځ کېنټاکي ایالت کې سېلابونو لږترلږه ۳۷ کسان وژلي دي.
دا سېلابونه دغه ایالت کې د پرله پسې سختو ورښتونو پایله کې راوتلي.
چارواکو ویلي وژل شویو کې لږترلږه ۶ ماشومان هم شامل دي چې څلور پکې خویندې او وروڼه دي.
د کېنټاکي والي انډي بېشیېر ویلي د دغو سېلابونو د قربانیانو شمېر ښايي نور هم لوړ شي ځکه "سلګونه" کسان لا نادرکه دي.
سېلابونو د دغه اېالت ختیزې سیمې ډېرې ځپلې.
د عکس سرچینه، Reuters
د عکس سرچینه، Getty Images
ویل کېږي هلته سلګونه کورونه، هټۍ او پلورنځي اوبو وړي او پر څه باندې ۱۲ زره کورونو برېښنا پرې شوې.
والي انډې بېشیېر وايي د زیانمنو شویو پلونو، سړکونو او نورو زېربناوو روغول به میلیونونه ډالر لګښت وغواړي.
دا په څو لسیزو کې دې سیمه کې تر ټولو ویجاړوونکي سېلابونه بلل شوي.
د عکس سرچینه، Reuters
سلګونه کسان خوندي سیمو ته لېږدول شوي او په لنډمهاله سرپناه ځایونو کې ځای پر ځای شوي دي.
له دې سره سېلاب ځپلو سیمو کې د هغو کورونو او هټیو د لوټل کېدو د امکان اندېښنه ښودل شوې چې خاوندان یې خوندي ځایونو ته وتلي.
چارواکو ویلي د غلاوو مخنیوي لپاره ګرځبندیز نه اعلانوي خو لوټ تالان هم نه زغمي.
د عکس سرچینه، Getty Images
د عکس سرچینه، Getty Images
د امریکا ولسمشر جو بایډن دا سېلابونه ستر ناورین بللی او د زیانمنو لاسنیوي لپاره یې د فدرال مرسته اعلان کړې ده.
