بریتانیا: روسیې د اپوزېسیون مشر الکسي نوالني د چونګښې په زهرو وژلی دی

د بریتانیا بهرنیو چارو وزارت وايي د روسیې د اپوزیسیون مشر الکسي نوالني د ډرات (زهري) چونګښې د زهرو د کارېدو په وسیله وژل شوی دی.

دا اعلان د سایبریا په یوه زندان کې د نوالني له مړینې دوه کاله وروسته کېږي.

مسکو تر اوسه دغه تور ته غبرګون نه دی ښودلی.

بریتانیا او متحدانو یې د نوموړي بدن کې د موندل شویو موادو د نمونو له تحلیل او تجزیې وروسته د پړې ګوته کرېملین ته نیولې ده.

لندن ویلي، چې د نوالني له بدنه اخیستل شویو نمونو کې د ایپیباتیډین په نوم د زهر موندل کېدو لپاره د بې‌ګناهۍ هېڅ توضیح نشته.

د بریتانیا بهرنیو چارو وزېرې یویټ کوپر مونخ امنیتي کنفرانس ته وویل: "یوازې د روسیې حکومت په روسیه کې د الکسي نوالني د بند پر مهال د هغه پر وړاندې د دغو وژونکو زهرو د کارولو وسیله، انګېزه او فرصت درلود."

هغې زیاته کړې "روسیې نوالني ته د یوه خطر په سترګه کتل."

اغلې کوپر روانه اوونۍ د مونیخ امنیتي کنفرانس پر مهال د نوالني له کونډې یولیا نوالنایا سره هم ولیدل.

سویډن، فرانسه، هالنډ او جرمني هم له بریتانیا سره د نوالني پر مسمومیت د روسیې تورنولو کې ملګري شوي دي.

الکسي نوالني د ۲۰۲۱ کال فبرورۍ کې بندي او د ۲۰۲۴ کال د فبرورۍ ۱۶مه یې ناڅاپه په زندان کې د مړینې خبر ورکړ شو.

هغه له مړینې یو کال مخکې سایبریا کې د روسیې ارکټیک سرکل زندان ته لېږدول شوی و، چې د روسیې له ډېرو سختو زندانونو بلل کېږي.

نوالني چې د روسیې پر ولسمشر ولادیمیر پوتین به یې سختې نیوکې کولې، د داسې تورونو له کبله پر ۱۹ کاله زندان محکوم شوی و، چې تر ډېر حده فکر کېده، سیاسي انګېزه یې درلوده.

الیکسي نوالنې څوک و؟

الیکسي نوالنې د مړینې پر مهال ۴۷ کلن و.

د پوتین له حکومت سره د هغه مخالفت د فساد پر ضد له یوه کمپاینه پیل شوی و.

نوموړي څو ځله ځان ټاکنو ته هم کاندید کړ، خو د ۲۰۱۸ کال په ولسمشریزو ټاکنو کې د ګډون اجازه ور نه کړ شوه.

په داسې حال کې چې د روسیې د ولسمشر ډېری منتقدین له دغه هېواده تښتېدلي دي، خو الیکسي نوالنې د ۲۰۲۱ کال په جنورۍ کې جرمني کې له څو میاشتو درملنې وروسته بېرته خپل هېواد ته ستون شو.

نوموړي ته هغه مهال هم د سایبریا د یوه سفر پر مهال زهر ورکړل شوي، خو ملګري یې توانېدلي وو، چې درملنې لپاره یې جرمني ته ورسوي.

هغه مسکو ته له ستنېدو سملاسي وروسته توقیف شوی و.