Gọọmentị agwaala ndị ọbaego wepụta ụgwọ ndị nkuzi Mahadum - Ngige

Abụbụọrụ nke ndị nkuzi Mahadum agafeela ọnwa ise ugbua dịka ASUU bụ otu jikọrọ ha kwụ chịm n'ihe ha na-ana gọọmentị etiti n'aka.

N'ihi nke a, onyeisiala Muhammadu Buhari enyela ndị Minista ihe a metụtara iwu ka ebie abụbụ ọrụ a kpam kpam n'izu úka abụọ.

Otu Minista nke a metụtara bụ Chris Ngige ekwuola ihe pụtara dịka ya na onyeisiala Buhari nakwa Minista agụmakwụkwọ mechara nzụkọ n'Abuja.

Ọ gwara BBC Igbo na gọọmentị etiti agwaala ndị ọbaego wepụta ego a ga-eji kwụ ndị Mahadum ahụ ụgwọ.

O kwukwara na Minista agụmakwụkwọ rịọrọ ka enye ya izuụka abụo iji kpọ otu ndị ọrụ Mahadum niile oku ma nwee nzụkọ iji bi ya bụ abụbụ ọrụ.