M23 yemeje urupfu rwa Lt Col Willy Ngoma
Ahavuye isanamu, AFP via Getty Images
- Umwanditsi, Didier Bikorimana
- Igikorwa, BBC News Gahuzamiryango
- Igihe co gusoma: iminota 3
Umutwe w'inyeshyamba wa AFC/M23 urwanya ubutegetsi bwa Repubulika ya Demokarasi ya Congo (DRC) wemeje urupfu rw'uwari umuvugizi wa gisirikare wawo, Lt Col Willy Ngoma, uvuga ko yishwe ku itariki ya 24 y'ukwezi gushize kwa Gashyantare (2) mu "ntambara isesuye" ushinja Kinshasa gusubukura.
Ni bwo bwa mbere M23 itangaje mu buryo bweruye urupfu rwa Lt Col Ngoma, nyuma yuko amakuru avuze ko yiciwe mu gitero cy'indege nto itajyamo umupilote (drone) cy'ingabo za DRC (FARDC) ku wa kabiri w'iki cyumweru, hafi y'i Rubaya, mu ntara ya Kivu ya Ruguru.
Icyo gitero cyiciwemo abantu nibura icyenda ariko gihushaho gato umukuru wa gisirikare w'uwo mutwe, Jenerali Sultani Makenga, wahunze nta nkomyi, nkuko abantu bane babibwiye ibiro ntaramakuru Reuters.
FARDC yakomeje guhakana kurenga ku gahenge – impande zombi zemeranyijeho kenshi ariko zigashinjanya kukarengaho – ariko leta ya DRC ivuga ko ifite uburenganzira bwo kurengera ubusugire bw'igihugu.
Mu itangazo yasohoye ku wa gatandatu, umuvugizi wa M23 Lawrence Kanyuka yavuze ko "ubutegetsi bwa Kinshasa bwarenze ku bushake ku gahenge buteza intambara isesuye kuri AFC/M23, bugambiriye mu buryo bw'ibanze abasirikare bacu n'abaturage bacu b'abasivile bukoresheje 'drone' zabwo hanze y'imirongo y'imbere yo ku rugamba".
"Uko kurenga [ku byemeranyijweho] kugaragara kwatwaye ubuzima umwe mu basirikare bakuru b'igisirikare giharanira impinduramatwara cya Congo (ARC), Colonel Willy Ngoma..." ARC ni irindi zina ry'impine yo mu Gifaransa M23 yiyita.
Kanyuka yavuze ko ibyo bikorwa bya leta ya Kinshasa bikomeje "kwambura ubuzima abo dusangiye igihugu benshi b'inzirakarengane". Ati: "Ibi byaha ntibizagenda tubirebera gutyo gusa kandi ntibizagenda bidahanwe.
"Kwibuka abishwe bigira icyo bidutegeka kandi biha umukoro inshingano yacu duhuriyeho."
Nta cyo leta ya DRC yari yatangaza ku mugaragaro kuri iri tangazo rya M23 cyangwa ku rupfu rwa Lt Col Ngoma.
M23 ivuga ko imaze ibyumweru imenyesha abafatanyabikorwa bo muri gahunda igamije kugera ku mahoro ko agahenge kakomeje kurengwaho n'uruhande rwa leta mu ntara ya Kivu y'Epfo na Kivu ya Ruguru ariko bakabyirengagiza.
Yavuze ko nubwo igikomeje kwiyemeza gahunda y'amahoro, ishimangira "umurava wo kurinda abasivile n'ibyabo".
M23 igenzura ibice byinshi byo muri Kivu y'Epfo na Kivu ya Ruguru, birimo n'imijyi ikomeye ya Goma na Bukavu yafashe mu mwaka ushize.
Inzobere za ONU, DRC n'ibihugu byinshi byo mu burengerazuba bw'isi bashinja u Rwanda gufasha umutwe wa M23 mu kuwuha abasirikare, ibikoresho n'amategeko.
U Rwanda ruhakana gufasha M23 ariko rukemera ko rufitanye ubufatanye na yo mu by'umutekano kandi ko rwashyizeho "ingamba z'ubwirinzi".
Kuva mu byumweru bishize, imirwano yarakomeje mu bice byinshi byo mu burasirazuba bw'igihugu hagati ya M23 na FARDC n'abafatanya na yo nubwo hari ibikorwa by'abahuza banyuranye, barimo Angola, Qatar n'Amerika, biherutse no gutuma izo mpande zemeranya ku gahenge.
Intambara mu burasirazuba bwa DRC yongeye kwaduka kuva mu mpera y'umwaka wa 2021 nubwo imaze imyaka hafi 30 ihagarara ikongera ikubura.
Ku wa kabiri, mu ijambo yagejeje ku gihugu, Perezida w'Amerika Donald Trump yongeye kuvuga ko "mu mezi 10 ya mbere" y'ubutegetsi bwe mu mwaka ushize, yarangije "intambara umunani" ku isi zirimo n'intambara hagati ya "[DR] Congo n'u Rwanda", binyuze mu masezerano y'amahoro Perezida wa DRC Félix Tshisekedi na Perezida w'u Rwanda Paul Kagame bagiranye i Washington DC mu Kuboza (12) kw'uwo mwaka.
