'Ameerikaa fi Israa'el irratti balballi si'ool banamuuf jira' - Iraan

Haguuggii Tamsaasa Kallattii

1. 3 Bitooteessa 2026Tarkaanfii Neetaaniyaahuu lubbuu Ameerikaanotaa gaaga'aa jira- Taker Karlisan

   

   Madda suuraa, Getty Images

   Dhimma Ameerikaa irratti yaada kennuun kan beekamu, michuun Tiraamp sirna duriitti cichu, Taker Karlisan US ''Beenjaamiin Neetaniyaahuu akka olaantummaa irratti hin qabaanne ykn akka fedhetti akka biyyattii hin ajajne gochuu qabdi,'' jedhe.

   ''Dhiifama, kun faallaa Semetizimii miti. Tarkaanfiin bulchaa biyyaa kanaa lubbuu Ameerikaanotaa gaaga'aa jira. Carraa fi seenaa egeree addunyaa jijiiraa jira. Keessattuu ammoo egeree US miidhaa jira,'' jechuun Tucker Carlson Network irratti dubbate.

   Duraan Fox News irratti keessummeessaa sagantaa kan ture namni kun ''US mootummaa Israa'eliin 'kan nu hoogganu si miti' jechuu qabdi.

   Kan akka bulchiinsa kanaa murtee mootummaa Israa'eliin oofamu hin turre jechuun bulchiinsa Tiraamp qeeqe.

   Michuu Tiraamp kan ta'e Karlisan akka US tarkaanfii waraanaa hin fudhanne dhiibbaa uumaa tureera.

   New York Times akka gabaasetti namni kun inumaa Waayit Haawusitti Tiraamp waliin yeroo baayyee walarguun haleellaarraa akka of qusatu gorseera.

2. 3 Bitooteessa 2026Faransaayi lakkoofsa boombii nikularaa qabdu akka dabaltu ibsite

   

   Madda suuraa, Getty Images

   Faransaayi boombii nikularaa amma qabdu caala dabaltee akka omishyti beeksifte. Ardii Awurooppaa keessattis humna jabaa ittiin of ittistu akka ijaartu ibsite.

   Pirezidaantiin Faransaayi Imaanu'eel Maakiroon haasaa taasisaniin, addunyaan yeroo gara yerotti tasgabbii dhabuurraa kan ka'e humna jabaa ijaarrachuun barbaachisee ta'uu ibsan.

   "Waggoonni 50 dhufan bara boombii nikularaa ta'u," jechuun lakkoofsa boombii nikularaa Fraansaayi amma qabdu akka dabalamu dubbatan.

   Faransaayi yeroo ammaa boombii nikularaa 300 ta'u akka qabdutu himama.

   Dabaluunis, bara 2036tti dooniin waraanaa galaana jalaa nikulara hidhate kan namni kamuu hin argine ta'a jechuun loltoota humna galaanaa biyyattii yeroo daawwatanitti dubbatan.

   Biyyoonni Awurooppaa saddeet sagantaa haraa humna waraanaa jabaa ijaaruu kanatti waliigaluus himan Pirezidaant Imaanu'eel.

   Biyyoonni kunneenis: UK, Jarman, Poolaand, Neezarlaandis, Beeljiyeem, Giriik, Siwiidiinifi Deenmaark ta'uus ibsan.

3. 3 Bitooteessa 2026Buufanni waraanaa US Bahreen jiru guutummaan manca'e- miidiyaalee Iraan

   Buufanni humna qilleensaa US Bahreen keessatti argamu manca'uu miidiyaalen Iraan gabaasaa jiru.

   Viidiyoon miidiyaan Iraan Fars News agarsiise irraa akka mul'atutti, rokkeettiwwan buufata kanarratti qiyyaafatan jedhaman yeroo dhohan agarsiisa.

   Humnoonni Eegumsaa Warraaqsaa Iraan (IRGC) misaa'elaafi dirooniin haleellaa gaggeessaniin wiirtuun ajaja buufata humna qilleensaa US Bahreen jiru haleelamuutu ibsame.

   Haleellaa buufata waraanaasheerratti gaggeeffame jedhame kana ilaalchisee US deebii hin kennine.

   Ministeerri Dhimma Alaa US lammiileen biyyattii Bahreen dabaatee biyyoota Baha Giddugaleessaa keessaa akka bahan ajajeera.

4. 3 Bitooteessa 2026Akkam bultan?

   Tamsaasa kallattii keenya eegalleerra. Haleellaa US-ISraa'el fi Iraan irratti odeeffannoo jiran karaa kanaan isiniif dhiheessina.

   Tamsaasa kallattii duraan ture karaa kanaan argattu.

   Odeessaalee nuti qixeessine dabalataan argachuuf marsariitii,

   YouTube, WhatsApp fi Facebook keenya seenaa