Tiraamp gaggeessaan waliigalaa Iraan, Ayaatolaa Alii Kameenii, ajjeefamuu beeksise

Haguuggii Tamsaasa Kallattii

1. 1 Bitooteessa 2026Amma nu gahe, Tiraamp gaggeessaan waliigalaa Iraan, Ayaatolaa Alii Kameenii, ajjeefamuu beeksise

   

   Madda suuraa, EPA

   Pirezidantiin Ameerikaa Doonaald Tiraamp gaggeessaan waliigalaa Iraan, Ayaatolaa Alii Kameenii, haleellaa US fi Israa’el Teehiraan irratti gaggeessaniin ajjeefameera jedhe.

   Netaaniyaahuun waa’ee haleellaa mooraa hogganaa waliigalaa Iraan, Ayaatolaa Alii Kameenii, Teehraan keessa jiruu kan ibse yoo ta’u, “abbaan irree” kun “ ajjeefamuu” isaa mallattoon agarsiisan dabalaa jiru jedhe.

   Suuraawwan saatelaayitiirraa argaman akka mul’isanitti mooraan hogganaa waliigalaa Iraan Ayaatolaa Alii Kameenii haleellaan miidhameera.

   Doonaald Tiraamp ergaa ajjeefamuu Ayaatolaa Alii Kameenii beeksisuuf fuula miidiyaa hawaasaa isaa Truth Social irratti baaseen, "Seenaa keessatti namoota hunda caalaa hamoo ta'an keessaa tokko kan ta'e, Alii Kameenii, du'eera. Kun ammoo haqa ummmata Iraan qofa osoo hin taane Ameerikaanota hundaaf, namoota biyyoota addunyaa baayyeerraa Kameeniifi garee isaa dhiiga namaa dheebotaniin ajjeefamaniif ykn qaaaa hir'ataniif. Sisteema Hordoffii keenyaa baayyee akkaan cimaa ta'eefi interejensii keenyaa jalaa ba'uu hin dandeenye," jedhe.

2. 1 Bitooteessa 2026Tiraamp waa'ee Gaggeessaa Waliigalaa Iraan waan beeku gaafatame

   

   Madda suuraa, White House

   Pirezidantiin Ameerikaa Doonaald Tiraamp waa'ee Gaggeessaa Waliigalaa Iraan Ayaatilaa Alii Kameenii du'uu isaa 'sirriitti' beeka yoo ta'eef gaafatanee deebii kenneera.

   ABC News irratti gabaastuun buleettii siyaasaa Raachel Iskoot, Doonaald Tiraamp "gaggeessaan waliigalaa Iraan du'eera jedhee" akka amanu natti himeera jette.

   "Sirriitti" kan beeku yoo ta'e yeroo gaafatame, "waan tokkollee hangan argutti sirriitti jechuu hin barbaadu, garuu akkasuma [du'eera] jennee amanna' jedhe.

   "Hoggantoonni isaanii hedduun deemaniiru [ajjeefamaniiru]. Gama tokko qofaan miti, nutis haleelamneerra. Nuti tika jabaa qabna, kanaaf hoggantoonni baayyeen isaanii sokkaniiru."

3. 1 Bitooteessa 2026Waraanni Israa'el hoggansa humna ittisaa Iraan 'dhabamsiisuu' hime

   Humni waraaanaa Israa'el hangansa ittisaa Iraan 'dhabamsiisuu' himee, garuu maqaa gaggeessaa waliigalaa Iraan hin dhoofne.

   Humni Ittisaa Israa'el (IDF) hoggansa humni ittisaa mootummaa Iraan oppereesjhinii 'opening salvo' jedheen ibse.

   Akka ergaa miidiyaa hawaasaarratti baheetti, hoggantoonni dhabamsiifaman Alii Alii Shamkhaanii, gorsaa dhimma nageenyaa, Mohaammad Paakpuur, Ajajaa Loltoota Eegumsa Warraaqsaa Iraan, akkasumas Aziiz Naasirzadeeh, ministira ittisaa.

   Akka ergaa miidiyaa hawaasaarratti maxxanfame kanaatti, IDF suuraafi odeeffannoo qondaalota kanneeniifi aanga'oota biroo ajjeefaman jedhamanii ni jira.

   Kanneen keessatti garuu Gaggeessaan Waliigalaa Iraan Ayaatolaa Alii Kameenii hin ibsamne, haata'u malee Ministirri Muummee Israa'el Beniyaamiin Netaaniyaahuu diirama "ajjeefamuu isaa mallattoon agarsiisan dabalaa jiru" jedheera.

   

   Madda suuraa, IDF

4. 28 Guraandhala 2026Daawwadhaa: Magaalaa guddoo Baahireen keessatti dirooniin yeroo gamoo haleelutti

5. 28 Guraandhala 2026Daawwadhaa: Iraanitti Viidiyoo haleellaan booda gadhiifaman waan agarsiisan

6. 28 Guraandhala 2026Reeffi Ayaatolaa Kameenii argamuu miidiyaaleen gabaasan

   

   Madda suuraa, EPA

   Gaggeessaa olaanan Iraan Ayaatolaa Alii Kameenii ajjeefamuufi reeffisaanii argamuu miidiyaaleen gabaasan.

   Rooyitars qondaala olaanaa Israa'el irraa odeeffadhe jechuun akka gabaasetti, reeffi gaggeessaa Iraan bakka haleellan itti gaggeeffamee argame.

   Miidiyaaleen Israa'el heddus Ayaatolaan du'uu mirkaneeffachuu gabaasan.

   Miidiyaan US Axios ammoo, maddeen irraa odeeffadhe jechuun, UStti ambaasaaddarri Israa'el Yechi'eel Liitar Ayaatolaa Kameenii du'uusaa qondaalota UStiif insiteetti.

   Ministiirri Muummee Israa'el Beeniyaamiin Netaaniyaahuu sa'aatii muraasa dura ibsa kenneen, Ayaatolaa Kameenii ajjeefamuu mallattooleen agarsiisan heddu ta'uu ibsee ture. Garuu jaala muree ajjeefameera hin jenne.

7. 28 Guraandhala 2026Mooraan Ayaatolaa Alii Kameenii haleelame waan fakkaatu

   

   Madda suuraa, Airbus DS 2026

   Ministirri Muummee Israa'el Beeniyaamiin Netaaniyaahuu hogganaan waliigalaa Iraan Ayaatolaa Alii Kameenii 'ajjeefamuu' mallattoon agarsiisan dabalaa jiru jedheera.

   Suuraawwan saatelaayitiirraa argaman BBC Verify mirkaneesse akka mul’isanitti mooraan Ayaatolaa Alii Kameenii haleellaan miidhameera.

   Israa'el mooraa gaggeessaa olaanaa Iraan Ayaatolaa Kameenii qofa osoo hin taane, waajjira pirezidaantii biyyattiis haleeltee turte.

   Miidiyaaleen Iraan Pirezidaant Maasuud Pezeeshkiyaan nagaa ta'uusaanii gabaasanii ture.

   Aangawaan olaanaa Iraan Israa'el ajjeesuuf dhaadattu, Ayaatolaah Ali Kameenii, eenyu?

8. 28 Guraandhala 2026Hogganaan waliigalaa Iraan 'ajjeefamuu' mallattoon agarsiisan dabalaa jiru -Netaaniyaahuu

   

   Madda suuraa, Getty Images

   Netaaniyaahuun waa’ee haleellaa mooraa hogganaa waliigalaa Iraan, Ayaatolaa Alii Kameenii, Teehraan keessa jiruu kan ibse yoo ta’u, “abbaan irree” kun “ ajjeefamuu” isaa mallattoon agarsiisan dabalaa jiru jedhe.

   Suuraawwan saatelaayitiirraa argaman akka mul’isanitti mooraan hogganaa waliigalaa Iraan Ayaatolaa Alii Kameenii haleellaan miidhameera.

   Aangawaan olaanaa Iraan Israa'el ajjeesuuf dhaadattu, Ayaatolaah Ali Kameenii, eenyu?

9. 28 Guraandhala 2026Israa'el xayyaarota waraanaa 200 bobbaasuun Iraan haleeluu beeksiste

   

   Madda suuraa, AFP

   Israa'el xayyaarota waraanaa 200 ta'an fayyadamuun Iraan haleeluu beeksifte.

   Haleellaa US waliin ta'uun Iraanirratti bananiin, xayyaarotta waraanaa hedduu bobbaasuun bakkeewwan qiyyaafannoowwan 500 ta'an haleeluu ibsite.

   Israa'eel seenaa waraanaa gaggeessite keessatti xayyaarota hanga kana guyyaa tokkotti bobbaasuun kan jalqabaa ta'uutu himame.

   Humni Waraanaa Israa'el ibsa baaseen kutaalee Iraan garaa garaa haleellaa qilleensarraan haleelera.

   Xayyaaronni waraanaa "dhukaatawwan dhibbaan lakkaa'aman fayyadamaniiru," jechuun dandeettii waraanaa Iraan akkaan dadhabsiisuu beeksise.

   Humni Waraanaa Israa'el ibsa baase kanaan, misaa'eloota, sirna ittisa haleellaa qilleensaafi buufataalee waraanaa Iraan heddu mancaasuus beeksise.

10. 28 Guraandhala 2026'Haleellaa US fi Israa'el Iraan irratti gaggeessaniin namoonni 200 ol ajjeefaman'

    

    Madda suuraa, ISNA/WANA/Reuters

    USfi Israa'el haleellaa Iraanirratti gaggeessaniin hanga ammaa namoonni 200 ol du'uu Dhaabbanni Addeessa Diimaa Iraan beeksise.

    Dubbi himaan dhaabbatichaa Mojtaabaa Khaleedii akka jedhanitti, haleellaa guutummaa Iraanitti gaggeeffameen hanga ammaa namoonni 2001 ajjeefamaniiru.

    Bulchiinsawwan Iraan 31 keessaa 24 keessatti haleellaa gaggeeffameen kanneen du'aniin alatti namoonni 747 madaa'us ibse.

    Israa'el qiyyaafannoowwan waraanafi buufataalee misaa'elli irraa dhuka'an irratti xiyyeeffachuun haleellaa gaggeessaa jiraachuu beeksifte.

11. 28 Guraandhala 2026Daawwadhaa: Dirooniin yeroo Baahireen keessatti kufee dhohetti

12. 28 Guraandhala 2026Daawwadhaa: Haleellaa Iraan hordofee Baahireen misaa'el ittisaa dhukaaste

    Haleellaa Iraan hordofee Baahireen misaa'el ittisaa dhukaaste.

13. 28 Guraandhala 2026Daawwadhaa: Qaataar Dohaa keessatti wanti samiirraa kufe abidda kaasnaan namoonni naasuun baqatan

    Qaataar Dohaa keessatti wanti samiirraa kufe abidda kaasnaan namoonni naasuun baqatan.

    Kun ammoo miira sodaa haleellaa Iraan haaloo ba'uuf naannicha keessatti taasisaa jirtuunidha.

14. 28 Guraandhala 2026Haleellaan kan irratti raawwatme Iraan, "weerartootaaf barumsa akka kennitu" dhaadatte

    

    Madda suuraa, Reuters

    Haleellaan Israa’el fi Ameerikaan kutaalee Iraan garagaraa fi magaalota irratti raawwatan hoggantoota biyyattiirratti kan xiyyeeffate ta’uu Israa’el mirkaneessiteetti.

    Iraan ammoo haaloo bahuun deebii akka kennitu ibsiteetti.

    Haleellaa Israa’el foi US irratti banan hordofee Iraan Israa’el fi biyyoota Baha Giddugaleessaa Galoo Galaanaa ta’an akka Yunaayitid Arab Emireetis, Qaataar, Baahireen fi Quweet irratti haleellaa haaloo bahu raawwachuun tarknaafii yaaliidha jette fudhachuu beeksisteetti.

    Mariiwwan Ameerikaa waliin taasifamanirratti bakka bu’aa ijoo ta’uun hirmaachaa kan turee ministirri dhimma alaa Iraan Abbaas Araagchii halleellaa biyyasaarratti raawwatameef tarkaanfii deebii kennuu fudhatamuun, “Iraan weerartootaaf barumsa kenniti” jechuun dhaadate.

    Ministirri dhimma alaa kun haleellaa irratti raawwatame kanaaf humna waraanaa Iraan dandeettii qaba jedheen, “guyyaa kanaaf qophaa’eera, weerartootaaf barnoota isaaniif malu kennaaf,” jedheera.

    Odeeffannoo dabalataa dhimma kanarratti:

    'Haleelaan US fi Israa'el Ayatolaa Alii Kameenii dabalatee gaggeessitoota Iraan olaanoorratti kan xiyyeeffatedha'

    Haleellaa US fi Israa'el Iraan irratti banan ilaalchisee hanga ammaa kan beeknu

15. 28 Guraandhala 2026Ayaatolaa Alii Kaameenii lubbuun jiru- Qondaala Iraan

    

    Madda suuraa, EPA

    Qaajjirri Gaggeessaa Olaanaa Iraan Ataatolaa Alii Kameenii haleelamus isaan garuu lubbuun jiraachuu Ministiirri dhimma alaa biyyattii ibsan.

    Abbaas Araagchii NBCtti akka himanitti, Ayaatolaan lubbuudhaan jiraachuu himan.

    "Amman beekutti Ayaatolaa Ali Kameenii lubbuun jiru," jechuun qondaalonni waraanaa tokko ykn lama du'uu akka hin oole dubbatan.

    Israa'el waajjira Ayaatolaa Kameeniifi waajjira Pireezidaant Maasuuf Pezeeshkiyaan haleeluu beeksiftee turte.

    Haleellaa USfi Israa'eel qindoominaan gaggeessaa jiran kanaan qondaalonni waraanafi siyaasaa olaanon ajjeefaman jedhamus miidiyaaleen Iraan garu dhara jechuun gabaasan.

    Dhimma kanarratti odeeffannoo dabalataa:

    Tiraamp sirna Ayaatolaa Alii Haminii buqqisuurratti yaada kenne

    Aangawaan olaanaa Iraan Israa'el ajjeesuuf dhaadattu, Ayaatolaah Ali Kameenii, eenyu?

    Keessoon mootummaa Ayaatolaa Alii Kameenii akkamiin Israa'eliin nyaatame

16. 28 Guraandhala 2026Ministiirri Ittisaa Iraan haleellaa Israa'eliin ajjeefame - Gabaasa

    

    Madda suuraa, Haaretz

    Haleellaa Israa'el gaggeessiteen Ministiirri Ittisaa Iraan Amiir Naasizaadeh ajjeefamuu miidiyaan Israa'el Haaretz madda oduu Rooyitars waabeffachuun gabaase.

    Ajajaan waraana biyyattii qofa osoo hin taane, ajajaan Humnoota Eegumsa Warraaqsaa Islaamaa Iraan (IRGC) Mahaammad Paakpuur ajjeefamuu ibsa gabaasi kun.

    Israa'el bakka qondaalonni waraanafi tikaa olaanoon Iraan itti wal-gahanii jiranitti haleellaa gaggeessuu ibsitee turte.

    Haa ta'u garuu haleellaa gaggeessiteen eenyu fa'aa akka ajjeefaman odeeffannoo qulqulleeffataa akka jiru Humni Waraanaa Israa'eel beeksisee ture.

    Israa'el waraana guyyaa 12 ganna darbe Iraan waliin gaggeessiteen qondaalota waraanaafi saayintistoota nikularaa Iraan heddu ajjeessuun ishee ni yaadatama.

17. 28 Guraandhala 2026Daawwadhaa: Haleellaan Iraan, magaalaa Teehraan yeroo raawwatametti

    Akeekkachiisa - Viidyoon kun isin rifasisuu danda'a.

    Viidiyoon kun haleellaan Iraan, magaalaa Teehraan yeroo raawwatametti konkolaataa dabalatee abiddi qabate

18. 28 Guraandhala 2026Israa'el wal-gahii qondaalota waraanaafi tikaa olaanoo Iraan irratti xiyyeeffachuun haleeluu ibsite

    

    Madda suuraa, Reuters

    Israa'el qondaalonni tikaafi waraanaa olaanoon Iraan bakka isaan walitti qabamanii jiranitti haleellaa gaggeessuu ibsite.

    Humni Waraanaa Israa'el ibsa baaseen, magaalaa Tehraan bakka qondaalonni olaanoon Iraan itti wal-gah haleeluu beeksise.

    Haleellaa US waliin ta'uun Iraan irratti gaggeessa jiru kanaaf ammoo ji'ootaf itti qophaafi odeeffannoo sassaabataa turuus ibse.

    Qondaalonni olaanoon Iraan yeroo bifa kanaan walitti qabaman arguuf eegaa turuus beeksise.

    Haleellaa gaggeeffame kanaan qondaalonni ajjeefaman jiraachufi dhiisuus odeeffannoo qulqulleessaa akka jirus beesksie.

    Iraan gamasheen, haleellaa haaloo bahuu eegalteen buufataalee US Baha Giddugaleessaa keessa qabdu irratti fuulleeffachuun haleellaa gaggeessaa jirtu.

    Israa'el irrattis marsaa sadi kan ta'u misaa'ela dhukaastee jirti.

    Dhimma kanarratti odeeffannoo dabalataa:

    Ajajoonni fi saayintistoonni Iraan haleellaa Israa'eliin ajjeefaman eenyu fa'i?

    Milkaa'innii fi dadhabbiin dhaabbata basaasaa Israa'el-Mosaad maali?

    Waraanni Israa'el xiqqaafi hammayyaa'aan Iraan guddittiin lolu hanga ammaa maal galmaan geesse?

19. 28 Guraandhala 2026Daawwadhaa: Viidiyoo yeroo Baahireen keessatti haleellaan gaggeeffamu agarsiisu

    Yeroo misaa'eliin [Iraan] Baahireen rukkute viidiyoo konkolaataa keessa taa'amee waraabamedha.

20. 28 Guraandhala 2026US fi Israa'eel Baha Giddugalaa 'qiyaamatti' jijjiiraa jiru'- Raashiyaa

    

    Madda suuraa, Getty

    US fi Israa'el wal-ta'uun Iraan haleeluu hordofee Raashiyaan ibsa baasteen tarkaanfii waraanaa kana mormiteetti.

    Biyyoonni lamaan Baha Giddugaleessaa gara badii hin malleetti geessaa akka jiranis akeekkachiiste.

    Ministeerri Dhimma Alaa "Waashingtaniifi Tel Aviiv [Baha Giddugaleessaa] goolama diinagdee, namoomaatti geessaa jiru" jechuun ibsa baasuu isaa miidiyaan Israa'el Haaretz gabaase.

    "Baha Giddugaleessaa qiyaamatti geessuun haalli to'atamuu hin daneenye akka uumamu gochaa jiru," jechuun biyyoonni addunyaa keessumaa kan Baha Giddugalaa jiran naannichi to'annaan ala akka akka hin taanef tumsuu akka qaban waamicha dhiyeessite.

    Haleellaa USfi Israa'el Iraanirratti gaggeessan hordofee Iraan of-ittisuuf waan dandeessu hunda ni gooti jechuun ibsa baastetti.

    USfi Israa'el haleellaa irratti banu taanan, Iraan qofaa osoo hin taane Baha Giddugaleessatti waraanni akka babal'atu Iraan akeekkachiisaa turte.