Malaayiin bog oo feylasha Epstein ah oo la sii daayay

Tebin toos ah

1. 31 Jannaayo 2026Israa'iil oo duqeymo cirka ah ku dishay 28 Falastiiniyiin ah

   

   Xigashada Sawirka, Getty Images

   Ugu yaraan 28 qof ayaa ku dhintay mowjado diyaaradeed oo Israa’iil ay ka geysatay Marinka Qasa Sabtidii, sida ay sheegeen maamulka deegaanka.

   Hay’adda difaaca madaniga ah oo ay maamusho Xamaas ayaa sheegtay in carruur iyo haween ay ku jiraan dadka la dilay. Waxa ay intaa ku dartay in hal weerar ay diyaaradaha qumaatiga u kaca ay garaaceen teendho ay gabbaad ka dhiganayeen dad barakacayaal ah oo ku sugnaa magaalada Khan Younis ee koonfurta dalkaasi.

   Falastiiniyiinta ayaa ku tilmaamay duqaymahan kuwii ugu cuslaa tan iyo wejigii labaad ee xabbad joojinta, oo uu garwadeen ka ahaa Madaxweyne Trump bishii Oktoobar, isla markaana hirgashay horaantii bishan.

   Milateriga Israa’iil ayaa xaqiijiyay in tiro duqeymo ah ay fuliyeen, taasoo jawaab u ah waxa ay ku sheegeen in Xamaas ay jabisay heshiiskii Jimcihii.

   Israa'iil iyo Xamaas ayaa midba midka kale ku eedeeyay in uu jabiyay xabbad joojinta tan iyo markii uu dhaqan galay sannadkii hore.

2. 31 Jannaayo 2026Iraan oo faahfaahin ka bixisay waxa uu ahaa qaraxii wayn ee la maqlay

   

   Xigashada Sawirka, more

   Ku-xigeenka mas’uulka amniga ee gobolka Khuzestan ayaa sheegay in “shan qof ay ku dhinteen, laba kalena ay ku dhaawacmeen” qaraxii maanta ka dhacay Kianshahr, magaalada Ahvaz.

   Valiullah Hayati ayaa sheegay in baaritaannadii hore ay muujinayaan in qaraxa uu ka dhashay “cilad ku timid nidaamka gaaska ama dayacnaan ku saabsan isticmaalka qalabka ku shaqeeya gaaska.”

   Saacado ka hor, muuqaallo muujinaya qaraxyo aad u xooggan ayaa laga sii daayay Bandar Abbas iyo Ahvaz.

   Kaddib qaraxyadan, wakaaladda wararka Tasnim ayaa ku dhawaaqday in “wararka xan ah” ee ku saabsan dilka Alireza Tangsiri, taliyaha ciidanka badda ee Ilaalada Kacaanka Islaamiga ah (IRGC), ay yihiin “kuwa aan sax ahayn.”

   Laba mas’uul oo Israa’iili ah ayaa, iyagoo ka jawaabaya qaraxyada, u sheegay Reuters in … (warbixintu halkaas ayay ku go’an tahay).

3. 31 Jannaayo 2026Israa'iil oo ka hadshay Qaraxyadii laga maqlay Iraan

   Laba mas’uul oo Israa’iili ah ayaa u sheegay wakaalada wararka ee Reuters in Israa’iil aysan wax lug ah ku lahayn qaraxyadii ka dhacay Iiraan maanta.

   Saacado ka hor, wakaaladaha wararka Iiraan ayaa soo sheegay “qarax weyn” oo ka dhacay Bandar Abbas. Waxaa sidoo kale jiray warar sheegaya qarax sababay dhimasho oo ka dhacay magaalada Ahvaz.

   Xafiiska Guddoomiyaha Gobolka Hormozgan ayaa sheegay in qaraxa uu la xiriiray dhisme la deggan yahay.

   Sida ay sheegeen mas’uuliyiinta gobolka Hormozgan, “hal qof ayaa ku dhintay, 14 kalena way ku dhaawacmeen” qaraxa ka dhacay Bandar Abbas.

   Faahfaahin dheeraad ah oo ku saabsan qaraxyadan weli lama shaacin.

4. 31 Jannaayo 2026Maxaa ka jira in la dilay taliyaha ciidanka badda ee Ilaalada Kacaanka Iran?

   Kaddib markii muuqaallo muujinaya baaxadda qaraxa Bandar Abbas la faafiyay, wakaaladda wararka ee Tasnim ayaa sheegtay in “wararka xan ah” ee ku saabsan in la dilay Alireza Tangsiri, oo ah taliyaha ciidanka badda ee Ilaalada Kacaanka Islaamiga ah (IRGC), ay yihiin “kuwa aan run ahayn.”

   Hadalka madaxda Iraan ayaa ka dambeeyay ka dib markii ay soo baxeen warar sheegayay in la dilay taliyaha ciidanka badda ee Ilaalada Kacaanka Iran taasi oo ay imika xukuumada Iran beenisay

5. 31 Jannaayo 2026War degdeg ah:Qarax xooggan oo laga maqlay magaalo ka tirsan dalka Iran

   

   Wakaaladaha wararka Iiraan ayaa sheegtay “qarax aad u weyn” uu ka dhacay Bandar Abbas. Waxa kale oo jiray warar sheegaya qarax ka dhacay magaalada Ahvaz.

   Horey, Amiir Hatami, oo ah taliyaha guud ee ciidanka Iiraan, ayaa isagoo ka jawaabaya suurtagalnimada weerar Mareykanku ku qaado Jamhuuriyadda Islaamiga ah yiri: “Gacantayadu waxay saaran tahay qori diyaar u ah inay rasaas ka dhaco.”

   Taliska Dhexe ee Ciidamada Mareykanka (CENTCOM) ayaa isna uga digay ilaalada kacaanak Iraan inay ka fogaadaan “falal aan ammaan ahayn.”

6. 31 Jannaayo 2026Muxuu ka yari Madaxwayne Xasan sheekh, 10 sano ka dib booqashadiisii Jigjiga ee maanta?

   

   Xigashada Sawirka, Xasan Sheekh Maxamuud

   Madaxwaynaha dowladda federaalka ee Soomaaliya Xasan Sheekh Maxamuud oo ka mid ahaa madaxdii maanta ka qeyb gashay xafladdii furitaanka mashruuc dalxiis oo laga hirgaliyay duleedak Jigjiga.

   Madaxwaynaha ayaa ku ammaanay maamulka deegaanka iyo dowladad federaalka ee Itoobiya hormarka ka muuqda Jigjiga.

   Waxaa uu sheegay in 10 snao ka hor booqashadii uu Jigjiga ku tagay ay maanta magaalada ka muuqato isbadal gaar ahaan dhanka kaabayaasha dhaqaalaha.

   "10 snao ka hor ayaan imid magaaladan sidan iyo si u dhaw midna ma aysan ahayn, isbadal aad iyo aad u wayn ayaa ka muuqda magaaladan gaar ahaan dhanka kaabayaasha dhaqaalaha"

   Jigjiga, oo ah caasimadda Deegaanka Soomaalida Itoobiya, ayaa ah goob caan ku ah dhaqanka iyo dalxiiska.

7. 31 Jannaayo 2026Maxay tahay sababta uusan 100 sano ka dib isku beddelin maydka hoggaamiyahan mar laga yaqaanay Soomaaliy

   

   Xigashada Sawirka, Getty Images

   Xusuusta Vladimir Ilyich Lenin, hoggaamiyihii Kacaankii weynaa ee Ruushka, ayaa loogu dabaaldegay sannad-guuradii 100-aad ee ka soo wareegtay markii la aasaasay.

   Waxaa jira munaasabo lagu maamuuso oo la qabto kuwaas oo ay ku jiraan xus ciidan, ayadoo lagu qabto goobtiisa xasuusta.

   Faahfaahinta lifaaqa hoose ku dhufo

   Maxay tahay sababta uusan 100 sano ka dib isku beddelin maydka hoggaamiyahan mar laga yaqaanay Soomaaliya

8. 31 Jannaayo 2026Mala sii daayay dhammaan feylasha Epstein mise wax baa harsan?

   

   Xigashada Sawirka, US Department of Justice

   Ku xigeenka xeer ilaaliyaha guud ee Maraykanka Todd Blanche ayaa jimcihii sheegay in sii deynta feylashan "ay muujinayso dhamaadka habraaca aqoonsiga dukumentiga iyo dib u eegista dukumeentiyada" - taasoo muujineysa in ilaa iyo inta ay khuseyso waaxda caddaaladda ee Mareykanka, ay shaqadii dhammaatay.

   Si kastaba ha ahaatee, Dimuqraadiyiintu waxay sii wadaan inay ku doodaan in wasaaraddu ay hakisay dukumeentiyo aad u badan - laga yaabee ku dhawaad ​​​​laba milyan iyo bar - iyada oo aan loo haysan sabab sax ah.

   DoJ ayaa si weyn isha loogu hayay ka dib markii ay seegeen inay kusii daayaan muddada kama dambeysta loo qabtay oo ahayd 19-kii Diseembar, taasoo la doonayay in la sii daayay dhammaan faylasha sida uu dhigayo Xeerka Daah-furnaanta Faylasha Epstein, kaasoo uu ansixiyay Congress-ka oo la saxiixay bishii Nofembar.

   Laakiin in sheekadani dhammaatay iyo in kale ayaa la arki doonaa.

   Qaar badan - oo uu ku jiro Madaxweyne Donald Trump - waxay muddo dheer rumaysnaayeen inuu jiro shirqool lagu ilaalinayo taajiriinta iyo kuwa xoogga leh ee ku xirnaa Epstein.

   Blanche waxa uu qiray in siidaynta dukumentiyadan aysan dabooli doonin baahida loo qabo macluumaad dheeraad ah. Waxa uu sheegay in faylalkaasi aysan ku jirin magacyo rag gaar ah oo dumarka ku xad-gudbay, wuxuuna sheegay in haddii waaxdu magacyadaas heyn lahayd raggan sharciga lala tiigsan lahaa.

9. 31 Jannaayo 2026Madaxweynaha Iiraan oo kale eedeyn ujeediyay Netanyahu, Trump iyo Yurub

   

   Xigashada Sawirka, Reuters

   Madaxweynaha Iran Masoud Pezeshkian ayaa maanta sheegay in hoggaamiyeyaasha Mareykanka, Israa’iil iyo Yurub ay ka faa’iideysteen dhibaatooyinka dhaqaale ee Iran, ay hurinayaan qalalaase iyo inay muwaadiniinta siiyaan qaab ay ku “burburiyaan qaranka” dibad baxyadii ugu dambeeyay.

   Labo toddobaad oo mudaaharaadyo waddanka oo dhan ah, oo bilaabmay dabayaaqadii bishii Disembar ee ka dhashay xiisad dhaqaale oo salka ku haysa sicir-bararka sii kordhaya iyo sare u kaca maciishadda, ayaa hoos u dhacay ka dib markii ay hawl-gal ka sameeyeen maamulka diinta oo ay hay’adda xuquuqul insaanka ee HRANA ee fadhigeedu yahay Maraykanka ay sheegtay in ay ku dhinteen ugu yaraan 6,563 qof, oo ay ku jiraan 6,170 mudaaharaadayaal ah iyo 214 ciidammada ammaanka ah.

   Wasiirka arrimaha dibadda Iran Cabbaas Arakchi ayaa u sheegay CNN Turk in 3,100 oo qof oo ay ku jiraan 2,000 oo ciidamada ammaanka ah ay dhinteen.

   Hoggaamiyeyaasha Maraykanka, Israa’iil iyo Yurub waxay isku dayeen inay kiciyaan oo ay sababaan kala qaybsanaan si ay u soo jiitaan dadka aan waxba galabsan ee wada dhaqdhaqaaqyadan,” Pezeshkian ayaa sidaa ku sheegtay barnaamij si toos ah looga sii daayay telefishanka dawladda.

   Madaxweynaha Mareykanka Donald Trump ayaa mar kale ku celiyay mowqifkiisa ku aaddan taageeridda dibadbaxayaasha, isagoo sheegay in Mareykanka uu diyaar u yahay inuu tallaabo qaado haddii Iran ay sii waddo dilka dadka dibadbaxa dhigaya.

10. 31 Jannaayo 2026Dagaalo ka dhacay aagagga xuduudaha gobolada Tigray, Amhara iyo Canfarta

    

    Xigashada Sawirka, Ethiopian Human Rights Commission

    Guddiga Xuquuqal Insaanka Itoobiya (EHRC) ayaa sheegay in tan iyo Axaddii la soo dhaafay, isku dhacyo ka dhex qarxeen “qaar ka mid ah aagagga xuduudaha” ee u dhexeeya gobollada Tigray, Amhara iyo Afar. Waxay sheegtay in isku dhacyada, gaar ahaan Tselemet, Megale iyo Abala, “ay halis ku yihiin nolosha iyo badqabka dadka.”

    Ururka xuquuqal insaanka ee aan dawliga ahayn, ISEMKO, ayaa jimcadii, soo saaray bayaan ku saabsan khilaafka dhawaan dhacay, kaas oo weli aan si rasmi ah loo xaqiijin marka ay timaado dowladda federaalka, midna maamulka gobolka Tigray.

    Sida ku xusan bayaan ka ISEMKO, khilaafka ka socda aagagga xuduudaha saddexda gobol ayaa socday tan iyo Axaddii, 17-ka Janaayo. Mid ka mid ah meelaha bayaan-ku-xusan uu ku sheegay in uu ka dhacay khilaafka waa Tselemet, halkaas oo gobollada Tigray iyo Amhara ay isku dhaceen.

    Wakaalada wararka ee Reuters iyo AFP ayaa soo weriyay in ciidamada Tigray ay la dagaallamayaan “ciidamada dowlada Itoobiya iyo maleeshiyaadka Amhara” aaggaas, iyaga oo soo xiganaya ilo amni iyo diblomaasiyadeed.

    Bayaanka ISEMKO ayaa sidoo kale xusay meelaha sida Megale iyo Abala, kuwaas oo ku yaalla xadka gobollada Tigray iyo Afar ay wax ka dhaceen. Degmada Megale ee gobolka Afar, oo sidoo kale la soo sheegay in ay ahayd goob isku dhacyo toddobaadkan ay ka qarxeen, ayaa xaalad la mid ah soo martay dhamaadkii October la soo dhaafay.

11. 31 Jannaayo 2026Duqeyn ka dhacday gobolka Tigray ee waqooyiga Itoobiya

    

    Xigashada Sawirka, Enticho Town Communication

    Weerarro loo adeegsaday diyaaradaha aan duuliyaha lahayn (drone) ayaa laga fuliyay laba magaalo iyo hal degmo oo ka tirsan aagga bartamaha ee gobolka Tigray habeenkii Jimcaha iyo saakay aroortii, sida ay BBC-du ku heshay xog.

    Hal qof ayaa ku dhintay, mid kalena waa ku dhaawacmay weerarka drone-ka ee ka dhacay magaalada Entcho, sida ay booliiska magaaladaasi u sheegeen BBC Tigrinya.

    Weerarka drone-ka ayaa dhacay shalay, Jimce, xilli ay jiraan warar sheegaya in dowladda federaalka iyo ciidamada Tigray ay mar kale isku dhaceen.

    Booliiska iyo ilo kale ayaa sheegay in weerarradu ay ka dhaceen magaalooyinka Entcho iyo Gendebeta, iyo sidoo kale degmada Ahferom.

    Waxaa la sheegay in weerarrada drone-ka ee ka dhacay magaalooyinka Entcho iyo Gendebeta lagu bartilmaameedsaday gaadiid.

    Taliyaha booliiska magaalada Entcho, Tesfay Amare, ayaa sheegay in laba gaari oo ku sugnaa magaalada lagu beegsaday weerar drone ah. Weerarka ayaa la sheegay inuu dhacay intii u dhaxaysay 9:00 ilaa 10:00 habeenimo.

    Waaxda isgaarsiinta ee magaalada ayaa Facebook ku baahisay sawir muujinaya laba gaari xamuul ah.

    Mid ka mid ah gaadiidkaas ayaa lagu arkayaa isagoo waxyeello ka soo gaartay qaybtashukaanta. Qayb ka mid ah xamuulka gaariga oo ku daboolnaa teendho ayaa bannaanka u soo baxay, waxaana si cad loo arkayaa moos cayriin oo yaalla qaybtaas furan.

12. 31 Jannaayo 2026Kumuu ahaa Jeffrey Epstein?

    

    Xigashada Sawirka, Getty Images

    Jeffrey Epstein wuxuu ku dhashay magaalada New York wuxuuna ahaa macallin inta uu maalqabeen noqon. Inta dambiyada loo haysto lagu soo oogin wuxuu ahaa nin caan ku ahaa maalkiisaa iyo xiriirada ganacsi uu leeyahay.

    Epstein wuxuu ku geeriyooday xabsi ku yaalla New York 10-kii Agoosto, isaga oo sugayay maxkamadeyntiisa eedeymo la xiriira ka ganacsiga galmo.

    Wuxuuna ahaa ninkaasi nin xiriirkiisa ganacsi uu u fududeeyey in shaqsiyaad caan ah oo ay ka mid yihiin Madaxweynaha Mareykanka ee hadda Donald Trump, Madaxweynihi hore Bill Clinton iyo Amiir UK Amiir Andrew uu la kulmo.

    Wargeyska New York oo soo xiganaya madaxweyne Trump wuxuu Epstein uu ku tilmaamay "Shaqsi cabsi badan". Balse sanadkan wuxuu Mr Trump uu sheegay "inuusan ahayn taageerada Epstein".

    Ninkan oo ahaa maalgeliye hore dhammaan lacagihi akaawunkiisa ugu jirtay wuxuu ku shubay akaawunka sanduuqa 1953, sida ay sheegeyso nuqul warqadda dardaaranka ninkaasi oo waregeyska New York Post lagu daabacay, wuxuuna warqadda dardaaranka uu saxiixay 8-dda August.

    Balse meelna laguma sheegin cidda deeqdaasi lacageed ka faa'ideysaneyso, lacagahaasi oo isugu jira $56 milyan oo doolar oo caddaan ah, hanti ma guurta ah oo u dhiganta $14 milyan oo doolar iyo $18 milyan oo doolar oo gaadiid iyo hanti kale lagu qiimeeyey.

    Epstein maxaa lagu soo eedeeyey?

    Epstein waxaa lagu soo eedeeyey inuu gabdhaha yaryar oo ay da'dooda ka hooseyso 18 jirka uu galmo la sameeyey iyo inuu tahriibiyey inta u dhaxeysay 2002 - 2005.

    Waxaana xabsiga loo taxaabay 6-da July isaga oo diyaaraddiisa qaaska ah safar ku tagay New Jersey. Wuxuuna sida oo kale diiday dacwadda la xiriirta heshiisyo uu 2008-ddi si khaldan u galay, iyada oo marki dambe lagu helay dambi aad u yar.

    Xeer-ilaaliyayaashu waxaa kale oo ay Epstein ku eedeeyeen inuu lacaga badan siiyey laba qof oo kiiska dacwadda loo haysto oo lagu wado iney sanadka dambe billaabato uga markhaati furaan.

    Akhriso:

    Muxuu ahaa xiriirkii ka dhaxeeyay Elon Musk iyo Jeffrey Epstein?

    Faylasha Epstein: Afhayeen u hadlay Bill Gates oo beeniyay inuu gabdho Ruush ah ka qaaday Cudur

    Magaca Trump oo boqolaal jeer lagu arkay faylasha cusub ee Epstein

13. 31 Jannaayo 2026Ra'iisul Wasaare Abiy Axmed ''Kusoo dhowaada Itoobiya walaalahayga Geeska Afrika''

    

    Xigashada Sawirka, Abiy Axmed Cali

    Ra'iisul wasaaraha Itoobiya Abiy Axmed Cali oo qayb ka ahaa madaxda gaartay xarunta DDS ee Jigjiga ayaa bartiisa bulshada ku qoray inuu soo dhoweynayo walaalihiisa geeska Afrika.

    ''Kusoo dhowaada Itoobiya, Walaalaheyga Geeska Afrika''

14. 31 Jannaayo 2026Maxkamad si ku-meel-gaar ah u joojisay musaafurinta in ka badan 5,000 oo Itoobiyaan

    

    Xigashada Sawirka, Getty Images

    Garsoore federaal ah ayaa si ku-meel-gaar ah u hakiyay go’aankii maamulka Trump ee lagu joojin lahaa nidaamka sharci ee lagu masaafurinayo muwaadiniinta Itoobiyaanka ah ee aan u qalmin magangelyo ka helidda Maraykanka.

    Go’aankan ayaa kordhiyay muddada joogitaanka in ka badan 5,000 oo Itoobiyaan ah oo ay ka harsan tahay laba toddobaad oo keliya si ay uga baxaan Maraykanka.

    Garsooraha federaalka ah ee Brian Murphy, oo fadhigiisu yahay Boston, Maraykanka, ayaa soo saaray xukunkan Jimcihii, 22-ka Janaayo 2018, sida ay werisay Reuters.

    Garsooraha Maxkamadda Degmada ee Maraykanka ayaa arrintan qaaday kaddib markii saddex Itoobiyaan ah, oo ay weheliyaan urur u dooda xuquuqda muhaajiriinta Afrikaanka ah oo lagu magacaabo Africa Communities Together, ay toddobaadkii hore dacwad u gudbiyeen maxkamadda.

    Dacwadda maxkamadda la hor geeyay ayaa ka hor imaanaysa go’aankii Waaxda Amniga Gudaha ee Maraykanka (U.S. Department of Homeland Security) ay horraantii Diseembar ku joojisay ilaalintii sharci ee ku-meel-gaarka ahayd ee dawladda Maraykanku siinaysay magangelyo-doonka Itoobiyaanka ah.

15. 31 Jannaayo 2026Madaxda dalalka Jabuuti, Itoobiya iyo Soomaaliya oo lagu soo dhoweeyay Jigjiga

    

    Xigashada Sawirka, SRTV Somali

    Madaxweynayaasha Soomaaliya iyo Jabuuti Xasan Sheekh Maxamuud iyo Ismaaciil Cumar Geele iyo Ra'iisul wasaaraha Itoobiya ayaa lagu soo dhoweeyay Jabuuti.

    Ujeedka socdaalka Jigjiga ayaa lagu sheegay furitaanka mashaariic dowlad deegaanka Soomaalida laga hirgaliyay

16. 31 Jannaayo 2026Isbarbardhigga awoodda militari ee Soomaaliya, Kenya iyo Itoobiya

    

    Xigashada Sawirka, SHK/VS/OPI

    Wargeyska Global FirePower, ayaa dhawaan soo bandhigay liiska muujinaya awoodaha milatari ee waddamada caalamka. Warbixintan waxaan ku eegeynaa farqiga awoodaha milatari ee dalalka Soomaaliya, Kenya iyo Itoobiya.

    Inkastoo arrimo badan lagu eegayo xogta waddamada, Soomaaliya ayaa tirada ciidanka u dhiganta ama wax yar ka hooseysa Kenya.

    Waxaan isbarbardhig ku sameyneynaa awoodaha Soomaaliya, Kenya iyo Itoobiya ee dhinaca milatariga.

    Sii akhri warbixinta

17. 31 Jannaayo 2026Xildhibaan dalka Mali oo lagu xiray Ivory Coats ka dib markii uu caayay madaxweynaha dalkaasi

    

    Xigashada Sawirka, AFP/Getty Images

    Xildhibaan ka tirsan Mali ayaa lagu xukumay saddex sano oo xabsi ah gudaha dalka ay deriska yihiin ee Ivory Coast, ka dib markii lagu eedeeyay inuu aflagaadeeyay hoggaamiyaha 84-jirka ah ee dalkaasi, kaas oo dhawaan ku guuleystay xilkiisa afaraad.

    Mamadou Hawa Gassama, oo ka tirsan baarlamaanka ku-meel-gaarka ah ee ay aasaaseen milatariga Mali, ayaa la xiray bishii Luulyo ee la soo dhaafay intii uu booqashada ku joogay Ivory Coast.

    Xeer-ilaaliyayaashu waxay sheegeen inuu Madaxweynaha Alassane Ouattara ku tilmaamay “kaligii-taliye”, “cadowga Mali” isla markaana uu si xooggan ugu dhaliilay hoggaamintiisa baraha bulshada iyo wareysiyo.

    Tan iyo markii ciidamada Mali ay xukunka la wareegeen 2020, xiriirka u dhexeeya Mali iyo Ivory Coast ayaa sii xumaanayay. Ouattara, oo ah xulafo Faransiiska ayaa si weyn u dhaleeceeyay afgambi-qaadista iyo afgambiyo kale oo ka dhacay Galbeedka Afrika.

18. 31 Jannaayo 2026Koox lagu tuhunsan yahay Argagixiso oo weerartay garoonka diyaaradaha ee u dhow caasimadda Niger

    

    Xigashada Sawirka, AFP via Getty Images

    Wasaaradda difaaca Niger ayaa sheegtay in afar askari la dhaawacay lana dilay 20 weerar-yahan, iyada oo telefishinka dowladda uu sheegay in qof Faransiis ah uu ku jiro dadkaas la dilay.

    Waxaa sidoo kale la xiray 11 qof oo la xiriira weerarka ka dhacay Garoonka Diyaaradaha Caalamiga ah ee Diori Hamani habeenkii Arbacada ilaa Khamiista, halkaas oo rasaas culus iyo qaraxyo waaweyn laga maqlayay agagaarka garoonka.

    Jimcaha, kooxda Islaamiga ah ee ISIS, iyada oo adeegsanaysa adeegga wararka Amaq, ayaa sheegtay in ay ka dambeysay “weerar isku-duwan oo lama filaan ah” oo lagu bartilmaameedsaday “saldhigga militariga” ee ciidanka Niger.

19. 31 Jannaayo 2026Qaramada Midoobey oo khatar ugu jirta burbur dhaqaale oo degdeg ah

    

    Xigashada Sawirka, AP

    Madaxa Qaramada Midoobay ayaa sheegay in hay’adda ay halis ugu jirto burbur dhaqaale oo degdeg ah sababo la xiriira khidmadaha aan la bixin iyo xeerarka miisaaniyadda oo qasba inay soo celiso lacag aan la isticmaalin oo laga yaabo in aysan marnaba helin.

    Warqad uu u diray safiirada QM, Antonio Guterres ayaa sheegay in fulinta barnaamijyada Qaramada Midoobay ay khatar ku jirto.

    Afhayeen ku-xigeenka QM, Farhan Haq, ayaa sheegay in in ka badan boqol iyo konton dowladood oo xubno ah ay bixiyeen khidmadahooda. Laakiin wuxuu intaas ku daray in weli hal bilyan iyo lix boqol oo milyan oo doollar ay ka dhiman tahay.

    Dowladda ugu deeqda badan QM oo ah Maraykanka ayaa diiday inay bixiso lacagaha waajibka ah isla markaana hoos u dhigtay taageerada iskaa-wax-u-qabso ee hay’adaha QM.

20. 31 Jannaayo 2026Xilli ay jirto xiisadda Iiraan, Maraykanka ayaa hub ka iibinaya Sacuudiga iyo Israa'iil

    

    Xigashada Sawirka, REUTERS/Ahmed Yosri

    Waaxda Arrimaha Dibadda ee Maraykanka ayaa sheegtay in Israa’iil ay iibsan doonto 30 helikobtar oo dagaal nooca Apache ah oo qiimahoodu ku dhow yahay afar bilyan oo dollar iyo gaadiid gaashaaman oo lagu qaado ciidanka.

    Sidoo kale, Maraykanku wuxuu ansixiyay iib hub oo qiimihiisu yahay sagaal bilyan oo doollar oo loo dirayo Sacuudi Carabiya, kaas oo ka kooban in ka badan 700 gantaal oo difaaca la yiraahdo Patriot, si ay iskaga difaacdo weerarro imaan kara.

    Xiisadaha gobolka Bariga Dhexe ayaa aad u sarreeya, iyadoo Maraykanku uu ku daad-gureeyay ciidamo militari oo ballaaran biyaha u dhow Iiran.