Ilhaan Cumar: Hayaankayga xero qaxooti ee ilaa Aqalka Congress-ka ayaa ka cadhaysiinaya Donald Trump

Tebin toos ah

1. 30 Jannaayo 2026Miltariga Israa'iil oo ka hadlay tirada ay ku dileen Qaza

   

   Xigashada Sawirka, Reuters

   Warbaahinta Israa’iil ayaa ku warrantay, iyagoo soo xiganaya ilo amni oo sare oo dalkaas ka tirsan, in ciidanka Israa’iil ay qirteen in ku dhowaad 70,000 oo Falastiiniyiin ah lagu dilay dagaalkii ka socday Qasa.

   Israaiil ayaa horey dhowr jeer su'aal u galisay saxnaanta tirakoobka ay soo saarto wasaaradda caafimaadka Qasa, oo ay maamusho Xamaas, iyagoo ku tilmaamay mid aan sax ahayn.

   Iyadoo ka jawaabaysa warbixin uu daabacay The Times of Israel, militariga Israa’iil ayaa sheegay in tiradaasi aysan ahayn qiyaas rasmi ah oo ay iyagu soo saareen.

   Isha amniga ah ayaa u sheegtay suxufiyiinta Israa’iil in tirada ay shaacisay Xamaas, oo muujinaysa in ka badan 71,000 oo qof ay dhinteen, ay inta badan sax tahay, balse ciidanka Israa’iil aysan weli awoodin inay xaqiijiyaan inta ka mid ah dadka la dilay ee ahaa dagaalyahanno Xamaas ah ama rayid.

   Warbixintan ayaa timid wax yar kaddib bilowga wejiga labaad ee qorshaha xabbad-joojinta Qasa, kaas oo ay dhexdhexaadiyeen Mareykanka iyo dalal kale oo gobolka ah. Qorshuhu wuxuu ka kooban yahay dib-u-dhis buuxa iyo hub-ka-dhigis lagu sameeyo Marinka Qasa, oo ay ku jirto hub ka qaadista Xamaas iyo kooxaha kale ee Falastiiniyiinta ah.

2. 30 Jannaayo 2026Jacob Frey oo Soomaalida Maraykanka ka raalligeliyay xaaladda ay wajahayaan

   

   Xigashada Sawirka, CNN

   Maayerka helay codka Soomaali badan oo ku nool Maraykanka ee Jacon Frey ayaa bulshada Soomaalida ee ku nool halkaasi ka raalli geliyay xaaladda ay wajhayaan. Waxa uu sheegay in uu aad uga xun yahay waxa dhacaya. Jacob Frey oo ka qaybgalayay kulan dadweyne ayaa sidan kaga jawaabay su'aal ay weyddiisay ardayad barata culuunta sharciga oo la yidhaahdo Munira Cali-Mire

3. 30 Jannaayo 2026Ilhaan oo hadashay hayaankeedii nolosha

   

   Xigashada Sawirka, ABC

   Xildhibaannada Soomaaliga ah ee Ilhaan Cumar oo waraysi sinaysay CNN ayaa ka warbixisay hayaankeeda ka soo bilowda xero qaxooti ilaa Aqalka Congress-ka Maraykanka. "Waa hubaal in aan ka badbaaday dagaal sokeeye. Waa hubaal in aan mar ku noolaa xero qaxooti. Waa dhab in aan Maraykanka imid aniga oo jira 12 sano oo aan aqoon xitaa luuqadda Ingiriisiga. Riyadayda waxaan ku matalaa dadka Maraykanka, waana midda ka cadhaysiinaysa Donald Trump.

4. 30 Jannaayo 2026Maxaa ka dhaxeeya hawlgalka ICE iyo kii dhawaan ka dhacay Venezuela?

   

   Xigashada Sawirka, EPA

   Guddoomiyaha Minnesota Tim Walz ayaa sheegay in Madaxweyne Donald Trump uu hawlgalka ICE ee Minneapolis barbardhigay hawlgalkii millitari oo ka dhacay Venezuela intii ay ku guda jireen wadahadal dhawaan ay yeesheen.

   Walz ayaa u sheegay warbaahinta MS Now in Trump uu weydiiyay “maxaa idinka qaldan” isaga oo xusay in aysan wax dhibaato ah ka dhicin hawlgallada socdaalka ee Louisville iyo New Orleans.

   Guddoomiyaha Minnesota ayaa sheegay inuu tilmaamay inaysan dad ku dhiman magaalooyinkaas — isagoo ku dooday in hawlgalku aad uga duwan yahay gobolkiisa. Wuxuuna sheegay in Trump uu uga jawaabay isagoo leh “Venezuela waa lagu guuleystay.”

5. 29 Jannaayo 2026Deegaan Soomaaliyeed oo jaangooyey kharashka ku baxa guurka. Ciddii diidda maxay mutaysan kartaa?

   

   Xigashada Sawirka, Getty Images

   Odayaasha dhaqanka iyo maamulka degmada Xamaro ee gobolka Erer ee Dowlad Deegaanka Soomaalida iyo qaybo ka tirsan bulshada deegaanka ayaa soo saaray go'aanno ku saabsan qiimaha iyo lacagaha ku baxa guurka. Go'aannadaas ayaa lagu mamnuucay waxyaabo badan oo laga bixiyo gabadha loo geed-fadhiisanayo

   Sheekh Cabdiraxmaan Rashiid waa madaxa golaha arrimaha Islaamka ee degmadaasi waxa uu BBC-da uga warramay sababta keentay go'aanada la soo saaray iyo waxa ku soo kordhay bulshada.

   "Waxa jiray in muddo ah waxyaabo ku soo kordhay guurkii caadiga ahaa ee la yaqiinay, marka taas ayaa saldhig u ahayd in aan shirno oo aan go'aamo ka soo saarno guur xumada iyo waxyaabaha waayadan dambe ku soo kordhay bulshada gaar ahaan degmada Xamaro".Halkan ka akhriso:

6. 29 Jannaayo 2026Maxaa ka soo kordhay hawlgalkii ICE ee Minneapolis?

   

   Xigashada Sawirka, Getty Images

   Dhawaan, Duqa Magaalada Minneapolis Jacob Frey ayaa shir ay isugu imaanayaan duqayda magaalooyinka oo ka dhacaya Washington DC kaga dhawaaqi doona baaq ku saabsan in la joojiyo hawlgallada fulinta sharciga socdaalka ee ka socda magaalada Minneapolis.

   Ka hor safarkiisa, wuxuu bayaan ku yidhi: “Minneapolis waxay noqon kartaa meesha aan ku aragnay hawlgallada ICE ee ugu ballaaran dalka, balse ma noqon doonto tii ugu dambeysay haddii aan ku guuldarreysanno inaan tallaabo qaadno.

7. 29 Jannaayo 2026Ninkii weeraray Ilhan Cumar oo dacwad lagu soo oogay

   Maxkamad federaal ah ayaa dacwad ku soo oogtay nin lagu eedeeyay in uu weeraray xildhibaanad Ilhaan Cumar oo oo maalintii Salaasada ka qayb galaysay kulan dadweyne. Ninkaas ayaa ku buufiyay dareere isagoo isticmaalaya irbad.

   Eedeysanaha waxaa maxkamadda degmada Minnesota u aqoonsatay in uu ahaa Anthony Kazmierczak.

   

   Xigashada Sawirka, Getty Images

8. 29 Jannaayo 2026Iran oo u yeertay safiirka Jarmalka

   Iran ayaa u yeertay safiirka Jarmalka u fadhiya dalkeeda sababo la xiriira "hadallada faragelinta" ee ka soo yeeray Chancellor Friedrich Mertz.

   wararka ayaa sheegay in Iran ay ku dhawaaqay in safiirka Jarmalka Axel Dittmann looga yeeray Wasaaradda Arrimaha Dibadda maanta oo Khamiis ah (Janaayo 29/30 Febraayo).

   Sida laga soo xigtay ilo-wareedkan, Wasaaradda Arrimaha Dibadda ee Iran ayaa u gudbisay safiirka Jarmalka "heerkii ugu xoogganaa ee cambaaraynta Jamhuuriyadda Islaamiga ah ee Iran" taas oo ku saabsan "faragelin iyo mas'uuliyad darrada" hadallo ka soo baxay saraakiisha Jarmalka.

   Hogaamiyaha Jarmalka ayaa mowqif cad ka qaatay cadaadiska dhiiga badan ku daatay ee lagu hayo dibadbaxayaasha Iran.

9. 29 Jannaayo 2026Iran oo si kulul uga jawaabtay go'aankii Yurub ee ahaa in ilaalaad kacaanka yihiin argagixiso

   

   Xigashada Sawirka, ABEDIN TAHERKENAREH/EPA

   Iyadoo uu ka falcelinayo go’aanka Midowga Yurub ee lagu daray Ciidamada Ilaalada Kacaanka Iiraan (IRGC) liiska ururrada argagixisada, Wasiirka Arrimaha Dibadda ee Iiraan, Cabbaas Araqchi, ayaa yiri:“Yurub waxay gashay qalad istiraatiiji ah oo kale oo weyn, kaddib markii ay ciidamadeenna hubeysan ku dartay liiska waxa ay ugu yeereen ‘ururro argagixiso’.”

   Wuxuu intaas ku daray: “Waqtigan xaadirka ah, dalal dhowr ah ayaa isku dayaya inay ka hortagaan in dagaal ballaaran uu ka qarxo gobolkeenna, waxaana xiiso leh in midkoodna uusan ahayn dal Yurub ah; halka Yurub, dhankeeda, ay ku mashquulsan tahay hurinta colaadda iyo sii kicinta qalalaasaha.”

   Mr. Araqchi ayaa ku tilmaamay mowqifka Midowga Yurub ee ku aaddan dhacdooyinka ka socda Iiraan “hab xulasho ah iyo munaafaqnimo cad,”

   “Iyagoo wax tallaabo ah ka qaadin xasuuqa Israa’iil ka waddo Gaza, ayay si degdeg ah u sheeganayaan inay difaacayaan xuquuqda aadanaha ee Iiraan. Bandhiggan dacaayadeed wuxuu ka badan yahay wax kasta isku day lagu qarinayo xaqiiqda hoos u dhaca weyn ee …”

10. 29 Jannaayo 2026'Mar kale ayaan neefsan karaa' qisada mid ka mid ah dadkii ay qafaasheen Xamaas iyo shucuurtiisa

    

    Xigashada Sawirka, Lee Durant/BBC

    Mid ka mid ah la haystayaashii hore ee Israa’iil, oo ku dhowaad 500 maalmood lagu hayay Gaza, ayaa sheegay in soo celinta meydka la haystihii ugu dambeeyay toddobaadkan ay ka dhigan tahay in dhammaan dadkii la sii daayay ay “hadda neefsan karaan oo ay dib u bilaabi karaan noloshooda.”

    Sasha Troufanov, oo 30 jir ah kana shaqeeya shirkadda Amazon isagoo ah injineer dhanka elektaroonigga ah, ayaa la qafaashay 7-dii Oktoobar 2023 kaddib markii ay afduubteen dabley ka tirsan Ururka Jihaadka Islaamiga Falastiin. Gabadha uu guursan lahaa ee Sapir Cohen, hooyadii iyo ayeeyadiis ayaa sidoo kale la afduubtay lana geeyay Gaza. Haweenkaas ayaa la sii daayay kaddib markii ay in ka badan 50 maalmood haysteen.

    Isaga laftiisa ayaa la sii daayay hal sano ka hor, kaddib markii uu ku qaatay 498 maalmood oo maxaabiis ah.

    Wareysiisii ugu horreeyay ee caalami ah, Troufanov oo booqasho ku jooga London, ayaa u sheegay BBC News in soo celinta meydka Ran Gvili Isniintii, taas oo ka dhigtay in dhammaan la haystayaashii dib loo soo celiyay, ay ahayd arrin farxad weyn leh. Wuxuu yiri:“Waxay ahayd dareen cajiib ah. Muddo dheer ayaan sugeynay in tani ay dhacdo.”

11. 29 Jannaayo 2026Dagaal ka dhex qarxay ciidamada Itoobiya iyo kuwa Tigray ga - ilo

    

    Xigashada Sawirka, Getty Images

    Iska horimaadyo ayaa u dhexeeya dowladda Itoobiya iyo ciidamada Tigrayga, sida ay ku warrantay wakaaladda wararka Faransiiska ee AFP iyo Reuters oo soo xiganaysa ilo amni iyo kuwo diblomaasiyadeed.

    Inkastoo tan iyo bilowgii todobaadkan ay soo baxayeen warar sheegaya in iska hor imaadyo ay ka dhaceen deegaanada xuduuda ee gobolada Axmaarada iyo Tigrayga ee waqooyiga dalka Itoobiya, hadana waxaa adkeyd in xog dhab ah laga helo.

    Wakaalada wararka ayaa sheegtay in iska horimaadku uu ka qarxay deegaanka lagu muransan yahay ee Tselemet oo ay kala maamulaan gobolada Axmaarada iyo Tigrayga, waxaana ilo dhanka amaanka ah ay u sheegeen in xaaladu ay sii xumaanayso.

    Ilo diblomaasiyadeed oo codsaday inaan la magacaabin, ayaa sidoo kale u sheegay wakaalada wararka ee AFP in ciidamada Tigray-ga ay la dagaalamayaan "ciidamada Itoobiya iyo maleeshiyaadka Axmaarada."

    Warku wuxuu intaa ku daray, "Waxaa hubaal ah in maalmihii la soo dhaafay ay dhaceen dagaallo, balse ma jirto wax ka og xaaladda maanta [Khamiistii]."

    Lataliyaha Ra'iisul Wasaare Abiy Ahmed ee arrimaha Bariga Afrika, Getachew Reda, ayaa Arbacadii ku soo qoray bogga uu ku leeyahay baraha bulshada, "Shaqsiyaad ka tirsan awoodda kooxda TPLF... waxay isku dayayaan inay Tigreega u jiidaan dagaal kale."

    Madaxwaynihii hore ee maamulka kumeel gaadhka ah ee dawlad deegaanka Tigreega Ato Getachew ayaa ugu baaqay madaxda TPLF in ay mudaharaadkiina ku dhawaaqaan in aydaan wax huro ah oo aan loo baahnayn samayn doonin hadii ay dhacdo xaalad muujinaysa khilaaf.

    Mid kamid ah dadka deegaanka oo magaciisa qariyay ayaa xaqiijiyay iska hor imaadka, balse wakaalada wararka ee AFP ayaa jawaab ka sugaysa dowlada federaalka iyo kooxda TPLF.

12. 29 Jannaayo 2026Saraakiil Maraykan ah oo Israa'iil iyo Sucuudiga kala tashanaya weerar lagu qaado Iran

    

    Xigashada Sawirka, Reuters

    Warbixin lagu daabacay shabagga wararka Axios ayaa sheegtay in labada saraakiil ee sare ee Mareykanka ay kulmayaan madaxda ammaanka iyo difaaca ee Israa’iil iyo Sacuudi Carabiya si ay uga wada hadlaan xaaladda ku saabsan Iiraan, iyadoo ay jirto welwel sii kordhaya in Mareykanku uu weerar ku qaado Iiraan.

    Kulamada oo ka dhacay Washington, DC, ayaa qayb ka ah dadaallada maamulka Madaxweyne Donald Trump uu ku qiimeynayo khiyaarada u furan ee ku aadan dagaal milateri ee ka dhan ah Iiraan, iyadoo la rumeysan yahay in Trump weli go’aan kama dambeys ah aanu gaarin.

    Saraakiisha Israa’iil ayaa la sheegay inay la wadaageen Washington macluumaad sirdoon ah oo ku saabsan bartilmaameedyada suurtagalka ah ee Iiraan gudaheeda, halka Sacuudi Carabiya ay dhinaca kale diiradda saareyso xalka diblomaasiyadeed si loo ka fogaado dagaal ballaaran oo gobolka ka dhaca.

    Warbixintu waxay intaas ku dartay in Sacuudi Carabiya aysan oggolaan doonin in hawadaheeda ama dhulkeeda loo isticmaalo howlgal milateri oo ka dhan ah Tehran, iyadoo Sacuudiya waxay isku dayaysaa inay u gudbiso fariimo u dhexeeya Washington iyo Tehran si loo dejiyo xiisadaha.

    Waxaa xusid mudan in ilaa hadda aysan jirin diblomaasiyad rasmi ah oo toos ah oo dhexmartay Washington iyo Tehran, isla markaana Iiraan ay ku hanjabtay in wax kasta oo tallaabo milateri ah loo qaado ay jawaab adag ka bixin doonto.

13. 29 Jannaayo 2026Afar qaab oo si sharci ah qofka uu ugu geli karo dalalka Yurub

    Waxaa muddooyinkii u dambeeyay kor u sii kacday dadka soogalootiga ah ee gaaaraya dallaka Yurub.

    Waxaa sanad kasta badaha dhulka saxaaraha ku dhinta dad badan oo muhaajiriin ah oo doonaya in ay gaaraan qaybo kamid ah dalalka Yurub

    Ku dhufo lifaaqa hoose si ada faahfaahinta u akhriso

    Afar qaab oo si sharci ah qofka uu ugu geli karo dalalka Yurub

    

    Xigashada Sawirka, Getty Images

14. 29 Jannaayo 2026Midowga Yurub oo ku dhawaaqay tallaabo ka dhan ah Iran

    

    Xigashada Sawirka, Getty Images

    Iyadoo lagu jawaabayo rabshadaha dhiiggaka ku daatay ee ka dhacay dibadbaxyada Iiraan, Midowga Yurub ayaa soo rogay cunaqabateyn cusub oo ka dhan ah saraakiil sare oo dalkaas ka tirsan.

    Golaha Yurub ayaa ku dhawaaqay in cunaqabateynta ay beegsanayaan:

    • Wasiirka Arrimaha Gudaha Eskandar Moemenni
    • Xeer-ilaaliyaha Guud Mohammad Movahedi Azad
    • Garsooraha Iman Afshari ee Laanta 26aad ee Maxkamadda Kacaanka Tehran

    War-saxaafadeedka Golaha Yurub ayaa sheegay in sadexdan qof ay ku lug lahaayeen "cuburintii rabshadaha watay ee dibadbaxyada lagula kacay".

15. 29 Jannaayo 2026Tom Homan oo ah sargaalka cusub ee hogaaminaya howlgalada Minnesota oo ka hadlay xaaladda

    

    Xigashada Sawirka, Reuters

    Ka dib markii uu Tom Homan, oo ah madaxa howlaha xuduudaha ee Aqalka Cad, uu afartii maalmood ee la soo dhaafay la wareegay howlgalka ka socda Minnesota, hadda wuxuu sheegay inuu la shaqeynayo hogaamiyayaasha maxalliga ah iyo ciidanka amniga si loo yareeyo dhibaatooyinka uu gobolkaasi la kulmay usbuucyadan dambe.

    Homan ayaa sheegay in aysan isla meel dhigin wax walba, isla markaana aysan filayn in wax walba laga heshiin doono, balse waxa uu intaa ku daray: “Waxaan halkan u imid inaan raadiyo xalal.”

    Isagoo ka hadlayay Minnesota, Homan ayaa tilmaamay in wada hadallada uu la yeeshay madaxda gobolka, booliiska iyo saraakiisha maxalliga ah ay yihiin tallaabooyin bilow ah oo wax ku ool ah, isagoo sheegay in ujeedadu tahay in la helo wada shaqeyn si xaaladda loo xalliyo.

16. 29 Jannaayo 2026Ruushka oo ka hadlay xiisadda Iran

    Madaxweynaha Ruushka Vladimir Putin ayaa u sheegay Madaxweynaha Imaaraadka Carabta Maxamed bin Zayed Al Nahyan in Moscow ay si dhow ula socoto isbedelada ka socda Iran, isagoo intaa ku daray inuu diyaar u yahay inuu kala hadlo arrintan wadahadalka Kremlin.

    Mohamed bin Zayed Al Nahyan ayaa maanta booqasho rasmi ah ku tagay magaalada Moscow ee dalka Ruushka.

    Imaaraatka Carabta ayaa marti galiyay wadahadal saddex geesood ah oo lagu soo afjarayo dagaalka Ukraine Jimcihii iyo sabtidii, iyadoo ay joogeen wakiilo ka kala socday Ruushka, Ukraine iyo Mareykanka.

    Wajigii labaad ee wadahadalka ayaa lagu wadaa inuu ka furmo Abu Dhabi Sabtida soo socota.

17. 29 Jannaayo 2026Maxkamad heer federaal oo soo saartay amar farxad galiyay qaxootiga ku sugan Minnesota

    

    Xigashada Sawirka, Getty Images

    Maxkamad heer federaal ah ayaa joojisay xiritaanka qaxootiga sharciyeysan ee Minnesota. Garsoore federaal ah ayaa soo saaray amar hakad ku meel gaar ah kaas oo mamnuucaya in la xiro qaxootiga sharciyeysan ee Minnesota ee aan weli helin kaarar cagaaran (green cards).

    Amarkani waxa uu sidoo kale dalbanayaa in si degdeg ah loo sii daayo wixii qaxooti ah ee haatan xabsiga ku jira.

    Dhanka kale, wakaaladda wararka ee Reuters ayaa ku warantay in saraakiisha ICE la faray inay ka fogaadaan inay la falgalaan "dadka wax kicinaya" xilli ay sii wadaan ololaha Trump ee soogalootiga ee gobolka Minnesota, ka dib markii toogasho lagu dilay laba mudaaharaad oo Maraykan ah oo ka dhacay magaalada Minneapolis.

18. 29 Jannaayo 2026Iran oo ka jawaabtay hanjabaadda Maraykanka

    

    Xigashada Sawirka, Getty Images

    Isagoo ka jawaabaya hanjabaada cusub ee ka soo yeertay Madaxweynaha Mareykanka, Wasiirka Arrimaha Dibadda ee Iran ayaa sheegay in ciidamada dalkiisa ay diyaar u yihiin inay ka jawaabaan "gardarrada kasta."

    Cabbaas Araqchi ayaa fariin ku qoran luuqada English-ka oo uu soo gaarsiiyay X-Net waxa uu ku yiri: “Ciidankeena hubaysan ee geesiyaasha ahi ay si buuxda ayay u diyaar garoobeen, iyaga oo farahooda ku haya keebka, si ay si degdeg ah oo go’aan leh uga jawaabaan gardaro kasta oo ka dhan ah ciidda, hawada, iyo dhul-badeedka dalkeena aynu jecelnahay”.

    Waxa uu sidoo kale ku celceliyay in Iran ay soo dhawaynayso heshiis “caddaalad” ah oo aan “khatar lahayn” oo ah heshiiska Nukliyeerka.

19. 29 Jannaayo 2026Markab dagaal oo kale oo Mareykan ah oo gaaray xeebaha dalalka Gacanka

    

    Xigashada Sawirka, Getty Images

    Markale markab dagaal oo Mareykan leeyahay ayaa yimid Bariga Dhexe, sida ay muujinayaan xogaha raadka maraakiibta, iyadoo ay sii kordhen malaha ah in Mareykanku uu qaadi karo weerarro cusub oo Iiraan lagu beegsado.

    Maraakiib burburiyaha ay ku rakiban yihiin gantaallada la hago ee USS Delbert D Black ayaa lagu arkay iyagoo maraya Kanaalka Suez kuna sii jeeda gacanka Arbacadii, sida ay muujisay goobta raad-raaca maraakiibta MarineTraffic.

    Waxaa la rumeysan yahay in ugu yaraan 10 maraakiib Mareykan ah ay hadda joogaan Bariga Dhexe, oo ay ku jirto markabka diyaaradaha ee USS Abraham Lincoln.

    Sarkaal Mareykan ah ayaa BBC Verify u xaqiijiyay Talaadadii in markabkan diyaaradaha ku sugan yahay gobolka, hase yeeshee ma muuqaato goobaha raadka maraakiibta muddo ka badan toddobaad.

    Si kastaba, subaxnimadii hore BBC Verify waxay raad-raacday diyaaradda Mareykanka ee Osprey, oo lagu arkay gacanka iyada oo ku sii jeedda Cumaan.

20. 29 Jannaayo 2026Diyaaradda militariga Mareykanka ay leeyihiin oo dul haadeysa xeebaha Iran

    

    Xigashada Sawirka, Getty Images

    Drone ka tirsan Marines-ka Mareykanka ayaa tan iyo saqda dhexe ee xalay dul-heehabeysa dalalka agagaarka xeebta Iiraan, sida ay muujinayaan xogta raadka diyaaradaha ee FlightRadar24.

    MQ-4C Triton – oo ah drone aan la wadin oo lagu sameeyo hawlgallo kormeereed – ayaa ka baxay saldhig ku yaalla Abu Dhabi habeenkii xalay, waxaana uu saacado badan ka duulaysay gacanka hurmuz.

    Drones-ka Triton ayaa si maalinle ah uga howlgelaysay gacankaasi tan iyo Isniintii. Sidoo kale, diyaaradaha kormeereedka US Navy P-8 Poseidon ayaa dhowaanahan lagu arkayay goobaha khadadka diyaaradaha ee u dhow, iyagoo howlgallo ka fulinaya aagga.