ਅਮਰੀਕਾ ਦਾ ਦਾਅਵਾ, ਟੋਰਪੀਡੋ ਨਾਲ ਈਰਾਨ ਦਾ ਜੰਗੀ ਜਹਾਜ਼ ਹਿੰਦ ਮਹਾਸਾਗਰ ਵਿੱਚ ਡੁਬੋਇਆ, ਜਾਣੋ ਹੁਣ ਤੱਕ ਕੀ-ਕੀ ਪਤਾ
ਤਸਵੀਰ ਸਰੋਤ, Reuters
ਅਮਰੀਕਾ ਦੇ ਰੱਖਿਆ ਮੰਤਰੀ ਪੀਟ ਹੇਗਸੇਥ ਨੇ ਦਾਅਵਾ ਕੀਤਾ ਹੈ ਕਿ ਹਿੰਦ ਮਹਾਸਾਗਰ ਵਿੱਚ ਈਰਾਨ ਦਾ ਇੱਕ ਜੰਗੀ ਜਹਾਜ਼ ਅਮਰੀਕਾ ਨੇ ਟੋਰਪੀਡੋ ਹਮਲੇ ਨਾਲ ਡੁੱਬੋ ਦਿੱਤਾ ਹੈ।
ਉਨ੍ਹਾਂ ਕਿਹਾ ਕਿ ਸਮੁੰਦਰੀ ਜਹਾਜ਼ ਨੂੰ ਤਬਾਹ ਕਰਨ ਲਈ ਪਣਡੁੱਬੀ ਤੋਂ ਟੋਰਪੀਡੋ ਦਾਗਿਆ ਗਿਆ। ਹਾਲਾਂਕਿ ਹੇਗਸੇਥ ਨੇ ਉਸ ਈਰਾਨੀ ਜਹਾਜ਼ ਦਾ ਨਾਮ ਨਹੀਂ ਦੱਸਿਆ ਜਿਸਨੂੰ ਡੁੱਬਾਇਆ ਗਿਆ ਹੈ।
ਇਸ ਤੋਂ ਪਹਿਲਾਂ ਸ੍ਰੀਲੰਕਾ ਦੀ ਨੌਸੈਨਾ ਨੇ ਜਾਣਕਾਰੀ ਦਿੱਤੀ ਸੀ ਕਿ ਈਰਾਨੀ ਨੌਸੈਨਾ ਦਾ ਜਹਾਜ਼ 'ਆਈਆਰਆਈਐੱਸ ਡੇਨਾ' ਹਿੰਦ ਮਹਾਸਾਗਰ ਵਿੱਚ ਡੁੱਬ ਗਿਆ ਹੈ ਅਤੇ ਇਸ ਵਿੱਚ ਸਵਾਰ ਕਰੀਬ 140 ਲੋਕ ਲਾਪਤਾ ਹਨ।
ਅਮਰੀਕੀ ਰੱਖਿਆ ਮੰਤਰੀ ਨੇ ਕਿਹਾ, "ਹਿੰਦ ਮਹਾਸਾਗਰ ਵਿੱਚ ਅਮਰੀਕਾ ਨੇ ਇੱਕ ਈਰਾਨੀ ਜੰਗੀ ਜਹਾਜ਼ ਨੂੰ ਡੁੱਬੋ ਦਿੱਤਾ, ਜਿਸਨੂੰ ਲੱਗਦਾ ਸੀ ਕਿ ਉਹ ਅੰਤਰਰਾਸ਼ਟਰੀ ਜਲਖੇਤਰ ਵਿੱਚ ਸੁਰੱਖਿਅਤ ਹੈ।"
ਇਸ ਤੋਂ ਪਹਿਲਾਂ ਸ੍ਰੀਲੰਕਾ ਦੀ ਨੌਸੈਨਾ ਨੇ ਪੁਸ਼ਟੀ ਕੀਤੀ ਸੀ ਕਿ ਬੁੱਧਵਾਰ ਸਵੇਰੇ ਈਰਾਨੀ ਨੌਸੈਨਾ ਦੇ ਜਹਾਜ਼ 'ਆਈਆਰਆਈਐਸ ਡੇਨਾ' ਵੱਲੋਂ ਐਮਰਜੈਂਸੀ ਕਾਲ ਮਿਲਣ ਤੋਂ ਬਾਅਦ 32 ਲੋਕਾਂ ਨੂੰ ਬਚਾਇਆ ਗਿਆ ਹੈ।
ਤਸਵੀਰ ਸਰੋਤ, Reuters
ਬੀਬੀਸੀ ਪੱਤਰਕਾਰ ਯੋਗਿਤਾ ਲਿਮਾਏ ਨੂੰ ਸ੍ਰੀਲੰਕਾ ਨੌਸੈਨਾ ਦੇ ਬੁਲਾਰੇ ਬੁਧਿਕਾ ਸੰਪਥ ਨੇ ਦੱਸਿਆ, "ਇਹ ਘਟਨਾ ਸਾਡੇ ਸਮੁੰਦਰੀ ਖੇਤਰ ਤੋਂ ਬਾਹਰ ਸੀ, ਪਰ ਸਾਡੇ ਖੋਜ ਅਤੇ ਬਚਾਅ ਖੇਤਰ ਦੇ ਅੰਦਰ ਸੀ। ਇਸ ਲਈ ਅੰਤਰਰਾਸ਼ਟਰੀ ਜ਼ਿੰਮੇਵਾਰੀਆਂ ਦੇ ਤਹਿਤ ਸਾਨੂੰ ਕਾਰਵਾਈ ਕਰਨੀ ਪਈ।"
ਉਨ੍ਹਾਂ ਨੇ ਅੱਗੇ ਕਿਹਾ, "ਸਾਨੂੰ ਪਾਣੀ ਵਿੱਚ ਤੈਰਦੇ ਹੋਏ ਲੋਕ ਮਿਲੇ ਅਤੇ ਅਸੀਂ ਉਨ੍ਹਾਂ ਨੂੰ ਬਚਾਇਆ। ਬਾਅਦ ਵਿੱਚ ਪੁੱਛਗਿੱਛ ਦੌਰਾਨ ਪਤਾ ਲੱਗਿਆ ਕਿ ਇਹ ਲੋਕ ਇੱਕ ਈਰਾਨੀ ਜਹਾਜ਼ ਤੋਂ ਸਨ।"
ਬੁਲਾਰੇ ਦੇ ਮੁਤਾਬਕ ਜਹਾਜ਼ ਦੇ ਦਸਤਾਵੇਜ਼ਾਂ ਅਨੁਸਾਰ ਇਸ ਵਿੱਚ ਕਰੀਬ 180 ਲੋਕ ਸਵਾਰ ਸਨ। ਹਾਲਾਂਕਿ ਲਾਪਤਾ ਲੋਕਾਂ ਦੀ ਸਹੀ ਗਿਣਤੀ ਹਾਲੇ ਸਪਸ਼ਟ ਨਹੀਂ ਹੈ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਜਦੋਂ ਬਚਾਅ ਅਭਿਆਨ ਸ਼ੁਰੂ ਕੀਤਾ ਗਿਆ ਤਾਂ ਨੌਸੈਨਾ ਨੂੰ ਜਹਾਜ਼ ਨਜ਼ਰ ਨਹੀਂ ਆਇਆ, ਪਰ ਸਮੁੰਦਰ ਵਿੱਚ ਤੇਲ ਦੇ ਦਾਗ਼ ਅਤੇ ਤੈਰਦੇ ਹੋਏ ਲਾਈਫ ਰਾਫਟ ਮਿਲੇ।
ਬੁਲਾਰੇ ਨੇ ਬੀਬੀਸੀ ਨੂੰ ਇਹ ਵੀ ਕਿਹਾ ਕਿ ਉਹ ਇਸ ਦਾਅਵੇ ਨੂੰ ਰੱਦ ਕਰਦੇ ਹਨ ਕਿ ਜਹਾਜ਼ ਨੂੰ ਕਿਸੇ ਪਣਡੁੱਬੀ ਨੇ ਨਿਸ਼ਾਨਾ ਬਣਾਇਆ ਸੀ। ਉਨ੍ਹਾਂ ਦੇ ਅਨੁਸਾਰ ਜਹਾਜ਼ ਦੇ ਡੁੱਬਣ ਦਾ ਕਾਰਨ ਅਜੇ ਤੱਕ ਸਪੱਸ਼ਟ ਨਹੀਂ ਹੈ।
ਤਸਵੀਰ ਸਰੋਤ, Reuters
ਸਕੂਲ ਉੱਤੇ ਹਮਲਾ
ਇਜ਼ਰਾਇਲ-ਅਮਰੀਕਾ ਦਾ ਈਰਾਨ ਨਾਲ ਸੰਘਰਸ਼ ਜਾਰੀ ਹੈ। ਅਮਰੀਕਾ ਸਥਿਤ 'ਹਿਊਮਨ ਰਾਈਟਸ ਐਕਟਿਵਿਸਟਸ ਨਿਊਜ਼ ਏਜੰਸੀ' ਦਾ ਕਹਿਣਾ ਹੈ ਕਿ 28 ਫਰਵਰੀ ਤੋਂ ਹੁਣ ਤੱਕ ਈਰਾਨ ਵਿੱਚ 1,097 ਨਾਗਰਿਕਾਂ ਦੀ ਜਾਨ ਜਾਣ ਦੀ ਰਿਪੋਰਟ ਹੈ।
ਏਜੰਸੀ ਅਨੁਸਾਰ, ਇਨ੍ਹਾਂ ਵਿੱਚੋਂ 181 ਬੱਚੇ 10 ਸਾਲ ਤੋਂ ਘੱਟ ਉਮਰ ਦੇ ਸਨ। ਏਜੰਸੀ ਨੇ ਅੱਗੇ ਦੱਸਿਆ ਕਿ ਜ਼ਖਮੀ ਲੋਕਾਂ ਦੀ ਗਿਣਤੀ 5,402 ਤੱਕ ਪਹੁੰਚ ਗਈ ਹੈ, ਜਿਨ੍ਹਾਂ ਵਿੱਚ 100 ਬੱਚੇ ਸ਼ਾਮਲ ਹਨ।
ਏਜੰਸੀ ਮੁਤਾਬਕ, ਪਿਛਲੇ 24 ਘੰਟਿਆਂ ਵਿੱਚ ਹੀ ਘੱਟੋ-ਘੱਟ 104 ਹਮਲੇ ਹੋਏ ਹਨ। ਇਨ੍ਹਾਂ ਹਮਲਿਆਂ ਵਿੱਚ ਫੌਜੀ ਅੱਡਿਆਂ, ਮੈਡੀਕਲ ਕੇਂਦਰਾਂ ਅਤੇ ਰਿਹਾਇਸ਼ੀ ਇਲਾਕਿਆਂ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ।
ਸੈਂਕੜੇ ਹੋਰ ਮੌਤਾਂ ਦੀਆਂ ਰਿਪੋਰਟਾਂ ਦੀ ਪੜਤਾਲ ਕੀਤੀ ਜਾ ਰਹੀ ਹੈ।
ਤਸਵੀਰ ਸਰੋਤ, Reuters
ਖਾਮੇਨੇਈ ਦਾ ਸਰਕਾਰੀ ਅੰਤਿਮ ਸੰਸਕਾਰ ਮੁਲਤਵੀ- ਈਰਾਨ ਦਾ ਸਰਕਾਰੀ ਮੀਡੀਆ
ਈਰਾਨੀ ਦੇ ਸਰਕਾਰੀ ਮੀਡੀਆ ਦੀਆਂ ਰਿਪੋਰਟਾਂ ਅਨੁਸਾਰ, ਈਰਾਨ ਦੇ ਸੁਪਰੀਮ ਲੀਡਰ ਅਯਾਤੁੱਲ੍ਹਾ ਅਲੀ ਖਾਮੇਨੇਈ ਲਈ ਸਰਕਾਰੀ ਅੰਤਿਮ ਸੰਸਕਾਰ ਮੁਲਤਵੀ ਕਰ ਦਿੱਤਾ ਗਿਆ ਹੈ।
ਤਿੰਨ ਦਿਨਾਂ ਅੰਤਿਮ ਸੰਸਕਾਰ ਅੱਜ ਰਾਤ ਸ਼ੁਰੂ ਹੋਣਾ ਸੀ, ਸੋਸ਼ਲ ਮੀਡੀਆ 'ਤੇ ਤਸਵੀਰਾਂ ਵਿੱਚ ਸਭ ਸਾਰੀਆਂ ਤਿਆਰੀਆਂ ਬਾਰੇ ਜਾਣਕਾਰੀ ਸਾਂਝੀ ਕੀਤੀ ਸੀ।
ਹਾਲਾਂਕਿ, ਰਿਪੋਰਟਾਂ ਤੋਂ ਪਤਾ ਲੱਗਦਾ ਹੈ ਕਿ ਪ੍ਰਬੰਧਕਾਂ ਨੇ ਕਿਹਾ ਹੈ ਕਿ ਬੁਨਿਆਦੀ ਢਾਂਚਾ ਤਿਆਰ ਹੋਣ ਤੱਕ ਸਮਾਗਮ ਮੁਲਤਵੀ ਕਰ ਦਿੱਤਾ ਜਾਵੇਗਾ।
ਸਮਾਗਮ ਕਦੋਂ ਹੋਵੇਗਾ ਇਸ ਸਬੰਧੀ ਕਿਸੇ ਤਰੀਕ ਦਾ ਐਲਾਨ ਨਹੀਂ ਕੀਤਾ ਗਿਆ ਹੈ।
ਇਜ਼ਰਾਈਲ ਨੇ ਖਾਮੇਨੇਈ ਦੇ ਅੰਤਿਮ ਸੰਸਕਾਰ ਸਮਾਗਮ ਤੋਂ ਪਹਿਲਾਂ ਈਰਾਨ ਨੂੰ ਚੇਤਾਵਨੀ ਦਿੱਤੀ
ਈਰਾਨੀ ਸਰਕਾਰੀ ਮੀਡੀਆ ਦੇ ਅਨੁਸਾਰ, ਦੇਸ਼ ਦੇ ਸੁਪਰੀਮ ਲੀਡਰ, ਅਯਾਤੁੱਲ੍ਹਾ ਅਲੀ ਖਾਮੇਨੇਈ ਦਾ ਅੰਤਿਮ ਸੰਸਕਾਰ ਸਮਾਗਮ ਅੱਜ ਤੇਹਰਾਨ ਵਿੱਚ ਹੋਵੇਗਾ।
ਉਹ ਸ਼ਨੀਵਾਰ ਨੂੰ ਸ਼ੁਰੂ ਹੋਏ ਅਮਰੀਕਾ-ਇਜ਼ਰਾਈਲ ਹਮਲਿਆਂ ਵਿੱਚ ਮਾਰੇ ਗਏ ਸਨ। ਇਹ ਸਮਾਗਮ ਅੱਜ ਰਾਤ ਸਥਾਨਕ ਸਮੇਂ ਅਨੁਸਾਰ 10 ਵਜੇ ਸ਼ੁਰੂ ਹੋਵੇਗਾ ਅਤੇ ਅੰਤਿਮ ਯਾਤਰਾ ਤੋਂ ਪਹਿਲਾਂ ਤਿੰਨ ਦਿਨ ਜਾਰੀ ਰਹੇਗਾ।
ਦਿ ਨਿਊਯਾਰਕ ਟਾਈਮਜ਼ ਨੇ ਈਰਾਨੀ ਅਧਿਕਾਰੀਆਂ ਦੇ ਹਵਾਲੇ ਨਾਲ ਰਿਪੋਰਟ ਦਿੱਤੀ ਕਿ ਖਾਮੇਨੇਈ ਦਾ ਪੁੱਤਰ, ਮੋਜ਼ੇਤਬਾ ਖਾਮੇਨੇਈ, ਨਵੇਂ ਸੁਪਰੀਮ ਲੀਡਰ ਬਣਨ ਲਈ ਸਭ ਤੋਂ ਅੱਗੇ ਹੈ।
ਇਸ ਦੌਰਾਨ, ਇਜ਼ਰਾਈਲ ਦੇ ਰੱਖਿਆ ਮੰਤਰੀ ਇਜ਼ਰਾਈਲ ਕਾਟਜ਼ ਨੇ ਚੇਤਾਵਨੀ ਦਿੱਤੀ ਹੈ ਕਿ ਕੋਈ ਵੀ ਉੱਤਰਾਧਿਕਾਰੀ ਜੋ 'ਇਜ਼ਰਾਈਲ ਨੂੰ ਤਬਾਹ ਕਰਨ' ਜਾਂ 'ਅਮਰੀਕਾ ਨੂੰ ਧਮਕੀ ਦੇਣ' ਅਤੇ 'ਈਰਾਨੀ ਲੋਕਾਂ ਨੂੰ ਦਬਾਉਣ' ਦੀ ਯੋਜਨਾ ਜਾਰੀ ਰੱਖਦਾ ਹੈ, ਉਹ 'ਸਿੱਧਾ ਨਿਸ਼ਾਨਾ' ਹੋਵੇਗਾ।
ਤਸਵੀਰ ਸਰੋਤ, Getty Images
ਈਰਾਨੀ ਮਿਜ਼ਾਈਲ ਕਤਰ ਵਿੱਚ ਅਮਰੀਕੀ ਹਵਾਈ ਅੱਡੇ 'ਤੇ ਡਿੱਗੀ
ਕਤਰ ਦੇ ਰੱਖਿਆ ਮੰਤਰਾਲੇ ਦਾ ਕਹਿਣਾ ਹੈ ਕਿ ਦੋ ਈਰਾਨੀ ਬੈਲਿਸਟਿਕ ਮਿਜ਼ਾਈਲਾਂ ਨੇ ਕਤਰ ਨੂੰ ਨਿਸ਼ਾਨਾ ਬਣਾਇਆ ਹੈ।
ਇਨ੍ਹਾਂ ਵਿੱਚੋਂ ਇੱਕ ਮਿਜ਼ਾਈਲ ਨੂੰ ਕਤਰ ਦੇ ਹਵਾਈ ਰੱਖਿਆ ਪ੍ਰਣਾਲੀਆਂ ਦੁਆਰਾ ਰੋਕਿਆ ਗਿਆ ਸੀ ਅਤੇ ਦੂਜੀ ਨੇ ਅਲ ਉਦੈਦ ਵਿਖੇ ਅਮਰੀਕੀ ਹਵਾਈ ਅੱਡੇ 'ਤੇ ਹਮਲਾ ਕੀਤਾ, ਜੋ ਕਿ ਖੇਤਰ ਦਾ ਸਭ ਤੋਂ ਵੱਡਾ ਅਮਰੀਕੀ ਅੱਡਾ ਹੈ।
ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ ਹੈ, ਕਤਰ ਦਾ ਕਹਿਣਾ ਹੈ।
ਤਸਵੀਰ ਸਰੋਤ, Getty Images
ਮੱਧ ਪੂਰਬ 'ਚ ਫਸੇ ਲੋਕਾਂ ਦੀ ਮਦਦ ਲਈ ਭਾਰਤ ਸਰਕਾਰ ਨੇ ਬਣਾਇਆ ਵਿਸ਼ੇਸ਼ ਕੰਟਰੋਲ ਰੂਮ
ਖਾੜੀ ਖੇਤਰ ਦੀ ਮੌਜੂਦਾ ਸਥਿਤੀ ਦੇ ਮੱਦੇਨਜ਼ਰ ਭਾਰਤੀ ਵਿਦੇਸ਼ ਮੰਤਰਾਲੇ ਵਿੱਚ ਇੱਕ ਕੰਟਰੋਲ ਰੂਮ ਕਾਇਮ ਕੀਤਾ ਗਿਆ ਹੈ। ਕੰਟਰੋਲ ਰੂਮ ਨਾਲ ਸਵੇਰੇ 9 ਵਜੇ ਤੋਂ ਰਾਤ 9 ਵਜੇ ਤੱਕ ਇਨ੍ਹਾਂ ਨੰਬਰਾਂ 'ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ:
1800118797 (ਟੋਲ ਫ੍ਰੀ)
+91-11-2301 2113
+91-11-2301 4104
+91-11-2301 7905
ਖੇਤਰ ਵਿੱਚ ਭਾਰਤੀ ਦੂਤਾਵਾਸਾਂ ਦੇ ਐਮਰਜੈਂਸੀ ਸੰਪਰਕ ਨੰਬਰ ਹੇਠਾਂ ਦਿੱਤੇ ਅਨੁਸਾਰ ਹਨ:
ਬਹਿਰੀਨ: +973 39418071
ਈਰਾਨ: +989128109115 / +989128109102 / +989128109109 / +989932179359
ਇਰਾਕ: +964 771 651 1185 / +964 770444 4899
ਇਜ਼ਰਾਈਲ: +972 54 7520711 / +972 54 2428378
ਜਾਰਡਨ: +962 770 422 276
ਕੁਵੈਤ: +965 65501946
ਲੇਬਨਾਨ: +961 76860128
ਓਮਾਨ: +968 98282270 (ਵਟਸਐਪ) / 80071234 (ਟੋਲ ਫ੍ਰੀ)
ਕਤਰ: +974 55647502
ਰਾਮੱਲਾ, ਫਲਸਤੀਨ: +970 592916418
ਸਊਦੀ ਅਰਬ (ਰਿਆਦ): +966 11 4884697 / 800 247 1234 (ਟੋਲ ਫ੍ਰੀ)
ਸਊਦੀ ਅਰਬ (ਜੇਦਾਹ): +966 126648660 / +966 12 2614093
ਸੰਯੁਕਤ ਅਰਬ ਅਮੀਰਾਤ: +971 543090571 (ਵਟਸਐਪ) / 800 46342 (ਟੋਲ ਫ੍ਰੀ)
ਤਸਵੀਰ ਸਰੋਤ, Getty Images
ਕਤਰ ਦਾ ਦਾਅਵਾ: ਆਈਆਰਜੀਸੀ ਦੇ 10 ਸ਼ੱਕੀ ਜਾਸੂਸ ਗ੍ਰਿਫ਼ਤਾਰ
ਕਤਰ ਦੀ ਸਰਕਾਰੀ ਨਿਊਜ਼ ਏਜੰਸੀ ਦਾ ਕਹਿਣਾ ਹੈ ਕਿ ਕਤਰ ਦੇ ਸੁਰੱਖਿਆ ਬਲਾਂ ਨੇ ਬੁੱਧਵਾਰ ਤੜਕਸਾਰ 'ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡਜ਼ ਕੋਰਪਸ' (ਆਈਆਰਜੀਸੀ) ਲਈ ਕੰਮ ਕਰ ਰਹੇ "ਦੋ ਸੈੱਲਾਂ ਨੂੰ ਸਫਲਤਾਪੂਰਵਕ ਗ੍ਰਿਫ਼ਤਾਰ" ਕੀਤਾ ਹੈ।
ਨਿਊਜ਼ ਏਜੰਸੀ ਮੁਤਾਬਕ, ਸੱਤ ਸ਼ੱਕੀਆਂ ਨੂੰ "ਦੇਸ਼ ਦੇ ਅਹਿਮ ਅਤੇ ਫੌਜੀ ਬੁਨਿਆਦੀ ਢਾਂਚੇ ਬਾਰੇ ਖੁਫ਼ੀਆ ਜਾਣਕਾਰੀ ਇਕੱਠੀ ਕਰਨ ਲਈ ਜਾਸੂਸੀ ਮਿਸ਼ਨਾਂ ਦੀ ਜ਼ਿੰਮੇਵਾਰੀ" ਸੌਂਪੀ ਗਈ ਸੀ।
ਏਜੰਸੀ ਮੁਤਾਬਕ ਜਾਸੂਸੀ ਦੇ ਇਲਜ਼ਾਮ ਹੇਠ ਫੜੇ ਗਏ ਤਿੰਨ ਹੋਰ ਵਿਅਕਤੀਆਂ ਨੂੰ "ਡਰੋਨ ਦੀ ਵਰਤੋਂ ਕਰਨ ਦੀ ਸਿਖਲਾਈ" ਦਿੱਤੀ ਗਈ ਸੀ।
ਸਰਕਾਰੀ ਨਿਊਜ਼ ਏਜੰਸੀ ਅਨੁਸਾਰ, "ਪੁੱਛਗਿੱਛ ਦੌਰਾਨ ਸ਼ੱਕੀਆਂ ਨੇ ਈਰਾਨੀ ਰੈਵੋਲਿਊਸ਼ਨਰੀ ਗਾਰਡ ਨਾਲ ਆਪਣੇ ਸਬੰਧਾਂ ਨੂੰ ਕਬੂਲਿਆ ਅਤੇ ਦੱਸਿਆ ਕਿ ਉਨ੍ਹਾਂ ਨੂੰ ਜਾਸੂਸੀ ਅਤੇ ਤਖ਼ਤਾਪਲਟ ਵਰਗੀਆਂ ਕਾਰਵਾਈਆਂ ਦੇ ਮਿਸ਼ਨ ਸੌਂਪੇ ਗਏ ਸਨ।"
ਕੁੜੀਆਂ ਦੇ ਸਕੂਲ 'ਤੇ ਹਮਲੇ ਦੇ ਮ੍ਰਿਤਕਾਂ ਦੀਆਂ ਅੰਤਿਮ ਰਸਮਾਂ ਦੀਆਂ ਤਸਵੀਰਾਂ ਸਾਹਮਣੇ ਆਈਆਂ
ਤਸਵੀਰ ਸਰੋਤ, EPA
ਈਰਾਨ ਦੇ ਮੀਨਾਬ ਸ਼ਹਿਰ ਵਿੱਚ ਕੁੜੀਆਂ ਦੇ ਇੱਕ ਸਕੂਲ ਉੱਤੇ ਹੋਏ ਹਵਾਈ ਹਮਲੇ ਦੇ ਵਿੱਚ ਮਾਰੇ ਗਏ ਕੁਝ ਜਣਿਆਂ ਦੀਆਂ ਅੰਤਿਮ ਰਸਮਾਂ ਦੀਆਂ ਤਸਵੀਰਾਂ ਸਾਹਮਣੇ ਆਈਆਂ ਹਨ।
ਈਰਾਨੀ ਅਧਿਕਾਰੀਆਂ ਨੇ ਦੱਸਿਆ ਕਿ ਸ਼ਨੀਵਾਰ ਨੂੰ ਜਦੋਂ ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰਪਸ ਦੇ ਅੱਡੇ ਦੇ ਨੇੜੇ ਸਥਿਤ ਸਕੂਲ 'ਤੇ ਹਵਾਈ ਹਮਲਾ ਹੋਇਆ, ਤਾਂ 160 ਤੋਂ ਵੱਧ ਲੋਕ ਮਾਰੇ ਗਏ ਸਨ।
ਹਾਲਾਂਕਿ ਅਮਰੀਕਾ ਅਤੇ ਇਜ਼ਰਾਇਲ ਨੇ ਇਸ ਹਮਲੇ ਦੀ ਪੁਸ਼ਟੀ ਨਹੀਂ ਕੀਤੀ ਹੈ। ਪੱਤਰਕਾਰਾਂ ਦੇ ਸਵਾਲਾਂ ਦਾ ਜਵਾਬ ਦਿੰਦਿਆਂ ਅਮਰੀਕੀ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨੇ ਕਿਹਾ ਸੀ ਕਿ ਅਮਰੀਕਾ ਜਾਣਬੁੱਝ ਕੇ ਕਿਸੇ ਸਕੂਲ 'ਤੇ ਹਮਲਾ ਨਹੀਂ ਕਰੇਗਾ।
ਤਸਵੀਰ ਸਰੋਤ, Reuters
ਬੀਬੀਸੀ ਨਿਊਜ਼ ਈਰਾਨੀ ਅਧਿਕਾਰੀਆਂ ਵੱਲੋਂ ਦੱਸੀ ਗਈ ਮੌਤਾਂ ਦੀ ਗਿਣਤੀ ਦੀ ਸੁਤੰਤਰ ਤੌਰ 'ਤੇ ਪੁਸ਼ਟੀ ਨਹੀਂ ਕਰ ਸਕਿਆ ਹੈ।
ਅਮਰੀਕੀ ਫੌਜ ਨੇ ਕਿਹਾ ਕਿ ਉਹ ਇਸ ਘਟਨਾ ਦੀਆਂ ਰਿਪੋਰਟਾਂ ਦੀ ਜਾਂਚ ਕਰ ਰਹੀ ਹੈ, ਜਦਕਿ ਇਜ਼ਰਾਇਲੀ ਫੌਜ ਨੇ ਕਿਹਾ ਕਿ ਉਹ ਖੇਤਰ ਵਿੱਚ ਅਜਿਹੀ ਕਿਸੇ ਵੀ ਕਾਰਵਾਈ ਤੋਂ "ਵਾਕਫ਼ ਨਹੀਂ" ਹੈ।
ਪੂਰੇ ਮੱਧ ਪੂਰਬ ਵਿੱਚ ਤਬਾਹੀ ਦੀਆਂ ਤਸਵੀਰਾਂ
ਤਸਵੀਰ ਸਰੋਤ, EPA/Shutterstock
ਤਸਵੀਰ ਸਰੋਤ, EPA/Shutterstock
ਤਸਵੀਰ ਸਰੋਤ, Getty Images
ਤਸਵੀਰ ਸਰੋਤ, Reuters
ਤਸਵੀਰ ਸਰੋਤ, Reuters
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
