PSG go play Chelsea, Arsenal meet Bayer Leverkusen for Champions league round of 16 fixtures

Collage of immages of Bukayo Saka, Erling Haaland, Mohammed Sallah, and Cole Palmer

27 February 2026

Read am in 3 mins

Di draws for di 2026 season of di Uefa Champions League round of 16 don conclude dis Friday and e throw up interesting matches.

No two English Premier League teams go meet dia sef for dis round, wich mean say e still dey possible for all di six EPL teams for di tournament to qualify for di quarterfinal.

No doubt di ogbonge tie for dis round na between Manchester City and Real Madrid while Chelsea go meet last season champions Paris Saint Germain.

Di prayers of Nigeria striker Victor Osimhen no work as im club Galatasaray go face Liverpool. Osimhen bin tell tori pipo say e prefer to avoid Liverpool, but e be like say im prayer no go work.

Tottenham go face Atletico Madrid wia anoda Nigeria striker Ademola Lookman don settle well since im transfer dis January.

Newcastle get ogbonge mountain to climb as dem face La Liga leaders Barcelona, while EPL leaders Arsenal go dig am out against former Bundesliga champions Bayer Leverkusen.

For di oda draws, Bodo Glimt, wey be di surprise team for dis season Champions League, go fancy diasef say dem go fit Sporting CP of Portugal. Di Norway club don already record wins against top European clubs like Man City and Atletico Madrid bifor dem beat last year finalists Inter Milan home and away for di round of 16 play offs.

Atalanta, di only Italian club wey remain for di tournament go face free-scoring Bayern Munich.

Di dates for di round of 16 na; 10 and 11 March for di first leg, and 17 and 18 March for di second leg.

Skip content and continue reading

Ronaldo become co-owner of Spanish side Almeria26th February 2026
Ghana authorities appeal to Ukraine to release two citizens wey dia captivity as prisoners of war26th February 2026
'Imo State 'Tiger Base' police station na base of extrajudicial killing, torture, extortion' - Amnesty International claim26th February 2026

End of content

Round of 16 fixtures

January signings fit play?

Players wey sign for di January transfer window dey eligible to play for di Champions League knockout phase.

Dis mean say Manchester City go fit play dia new signings Marc Guehi and Antoine Semenyo and Tottenham go fit play Conor Gallagher wey dem sign newly from Atletico Madrid.

Mamadou Sarr also dey eligible to play for Chelsea afta dem recall am from im loan move to Strasbourg of France.

However, di clubs gatz register dia new players for dia Champions League 'A list' bifor di knockout play-offs in order for dem to fit participate.