DR Congo: Abashinwa bakatiwe gufungwa imyaka 7 kubera gucukura amabuye y'agaciro binyuranyije n'amategeko
Ahavuye isanamu, Reuters
Urukiko rwo mu ntara ya Kivu y'Epfo muri Repubulika ya Demokarasi ya Congo rwaraye rukatiye Abashinwa batatu gufungwa umwe umwe imyaka irindwi, nyuma yo guhamwa no gucukura amabuye y'agaciro mu buryo bunyuranyije n'amategeko hamwe n'iyezandonke.
Mu gifungo urukiko rwo mu mujyi wa Bukavu wo muri iyo ntara yo mu burasirazuba bw'igihugu rwakatiye abo bagabo, harimo n'igifungo cy'amezi atatu kubera kuba mu gihugu mu buryo bunyuranyije n'amategeko.
Rwategetse ko ibipande 10 bya zahabu n'amadolari y'Amerika 400,000 (arenga miliyoni 550 FRW) bafatanywe, bifatirwa.
Banaciwe amande y'amadolari y'Amerika 600,000 (arenga miliyoni 800 FRW).
Arsène Mwaka, umwe mu bunganizi mu mategeko b'abo Bashinwa, yabwiye ibiro ntaramakuru AP ko abakiliya babo batanyuzwe n'umwanzuro w'urukiko ndetse ko bateganya kujurira.
Ariko abanyamategeko bo ku ruhande rw'ubushinjacyaha, barimo Christian Wanduma, bashimye icyo cyemezo cy'urukiko, bavuga ko "gitanga isomo" no ku bandi bakora ubucukuzi butemewe n'amategeko, nkuko AP yabitangaje.
Urubanza rwabo rwari rwatangiye ku wa mbere w'iki cyumweru. Bari batawe muri yombi mu ntangiriro y'uku kwezi.
Intara ya Kivu y'Epfo ikize kuri zahabu, icukurwa ahanini mu buryo bwa gakondo, aho ibirombe bimwe bigenzurwa n'imitwe yitwaje intwaro ikorana n'abacuruzi badafite ibyangombwa.
Mu Kuboza (12) kw'umwaka ushize, abandi Bashinwa 13 badafite ibyangombwa birukanwe muri RDC nyuma yo gutabwa muri yombi. Bashinjwaga kuba mu bucukuzi bunyuranyije n'amategeko mu kirombe cya zahabu cyo mu ntara ya Kivu y'Epfo.
