Янгиликлар. Воқеа сатҳидан: Украинада жасад шунча кўпми? Rossiya Ukraina Dunyo Yangiliklar

Огоҳлантириш: Мақоланинг айрим ўринлари кўнгилни хира қилиши мумкин.

Артур ўз ишини ўликларни унутилишдан сақлаб қолиш деб таърифлайди.

У ва Денис - икки украиналик йигит зиммасида ушбу шафқатсиз урушда ҳалок бўлган тинч аҳоли ва аскарларнинг жасадларини топишдек оғир вазифа турибди. Бунга руслар ҳам, украиналиклар ҳам киради.

Алоқадор мавзулар:

Биз бу йигитлар билан учрашган кун улар Украина шарқидаги яқинда озод қилинган ҳудудда эди. Артурнинг айтишича, уларнинг вазифаси жанг майдонида бирорта ҳам жасад қолмаслигини таъминлашдир. Ер вайроналар, ташландиқ хандаклар ва чуқур кратерлар билан қопланган. Уларга апокалиптик вайронагарчилик саҳнасида бир нечта жасадлар борлиги айтилди.

Ҳали ҳам узоқдан жанг овозлари эшитилади. Артурнинг айтишича, улар ўз иши хавфли эканини яхши билишади, лекин қилаётган ишлари шунга арзийди, "чунки энг муҳими, бу даҳшатли урушдан ўликларни олиб чиқишдир".

Улар қизил хоч ва ўлик аскарларни ташиш учун ҳарбий код 200 рақами билан белгиланган оқ фургон эшигини очишади. Орқа эшикни очишганда, ўлимнинг кўнгилни айнитувчи ҳиди ва ўша куни эртароқ топилган жасадлардаги қуртлар кўринади.

Артур ва Денисга яқин атрофда кўпроқ жасадлар борлигини айтишди, аммо энди улар қаердалигини топишлари керак. Денис ҳудудни разведка қилиш учун камерали кичик дронни ишга туширади. Улар нафақат жасадларни, балки мина изларини ҳам қидирмоқда. Уларнинг жамоасидан бири яқинда жароҳат олди. Бу доимий хавф.

Энди улар эҳтиёт чораларини кўриб, жасадга яқинлашмасдан олдин уни айлантириш учун илгак ташлайдилар. Маълумки, рус қўшинлари чекинишдан олдин бинолар ва ҳатто жасадларни миналайди.

Бир кун олдин украиналик ҳарбий муҳандис менга Украина шарқидаги янги озод қилинган ҳудудларда 100 мингга яқин мина бор деб ўйлашини айтди. Уларни тозалаш учун узоқ вақт керак бўлади. Муҳандиснинг айтишича, қоидага кўра, бир йиллик жанглар беш йиллик миналардан тозалашга тенг бўлади.

Дрони тахминан 20 дақиқа учгандан сўнг, Артур ва Денис эҳтимолий жойни аниқлашганига ишонишади. Бу вайрон бўлган темир йўл ёқасидаги бомбаланган бино. Улар дубулға ва ўқ ўтказмайдиган жилет кийиб, вайроналар орасидан эҳтиёткорлик билан ўтишади.

Қулаган иншоот ичида учта жасаднинг куйган қолдиқлари бор. Аввалига одам қолдиқларини куйган ёғочлардан ажратиш қийин. Аста-секин Артур ва Денис суякларни таний бошлайди. Улар идентификация белгисини қидириб, қолган нарсаларни эҳтиёткорлик билан тозалашади.

Бу сафар улар ўзлариникини эмас, балки ўлик русларни чиқармоқда. Бундай дўзахда бирорта ҳам шахсни тасдиқловчи ҳужжат сақланиб қолмайди, лекин Артур ва Денис қорайган, куйган рус ҳарбий камарининг метал қолдиғини топадилар.

Кичкина сопол зирҳлар ҳам улар Россия учун жанг қилганликларини кўрсатади. Улар ердан кўтарадиган яна бир нечта шахсий нарсалар бор, улар орасида бир жуфт кўзойнак. Ҳар бири суратга олинган ва бир четга сурилган. Улар инсон қолдиқлари билан бирга қайтарилади - эҳтиёткорлик билан жасад сумкаларига солиниб, кейин юк машинасига солинади.

Бир пайтлар инсон ҳаётининг ҳар бир қисми бўлган қисмларни тўплашдек нозик вазифани бажариш учун уларга бир неча соат керак бўлади.

Кейин олинган жасадлар маҳаллий ўликхонага юборилади.

Муносиб дафн

Артурнинг айтишича, у ким бўлишидан қатъиназар, жасадни топганда деярли руҳий енгилликни ҳис қилади.

"Жасад ниҳоят урушдан қайтарилганидан бахтиёрмиз", дейди у.

Унинг айтишича, ўлган руслар қайтарилгач, "улар бизнинг ўликларимиз билан алмаштирилиши, бизникилар эса Украинада муносиб дафн этилиши ҳақида аниқ тушунча бор". Қизил Хоч мамлакатлар ўртасидаги алмашинувни таъминлайди.

Артур ва Денис унутилишдан асраб қолган украиналик аскарларнинг дафн маросимларида қатнашадилар.

Ўтган йил давомида улар ҳаётдан кўра кўпроқ ўлимни кўрдилар. Артурнинг тан олишича, бу охир-оқибат уларнинг ҳиссий ҳолатига таъсир қилади. Аммо у қўшимча қилади: "Мен яхши иш қилаётганимизни тушунаман ва бу мени бироз рағбатлантиради ва уруш тез орада тугашига ишонч беради."

Уларнинг иши Украинадаги уруш шунчаки жисмоний жанг эмаслигини кўрсатади. Армиянинг тирикларга ҳам, ўликларга ҳам қандай муносабатда бўлишида акс этадиган ахлоқий компонент ҳам мавжуд.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek