इन्कम टॅक्स ते रेल कॉरिडोर; देशाच्या अर्थसंकल्पातील मोठ्या घोषणा जाणून घ्या

केंद्रीय अर्थमंत्री निर्मला सीतारमण यांनी लोकसभेमध्ये सकाळी 11 वाजता 2026-27 या वर्षाचा अर्थसंकल्प सादर केला.

त्यांचं हे भाषण साधारणत: दीड तास चाललं.

अर्थमंत्री निर्मला सीतारमण या सलग नवव्यांदा अर्थसंकल्प सादर केला आहे.

'एनडीए' सरकारने 1 फेब्रुवारीला अर्थसंकल्प सादर करण्याचा पायंडा सुरू केला असून यावर्षीही तो कायम ठेवला आहे.

निर्मला सीतारमण यांचं अर्थसंकल्पीय भाषण तुम्ही 'बीबीसी मराठी'वर इथे लाईव्ह पाहू शकता. हे भाषण तुम्हाला मराठीत पाहता येईल.

अर्थमंत्र्यांच्या या अर्थसंकल्पीय भाषणानंतर शेअर बाजारात जोरदार पडझड झाल्याचं दिसून येत आहे.

सिक्यूरिटीज ट्रान्झेक्शन टॅक्स वाढवल्याने शेअर बाजारावर परिणाम झाल्याचं सांगण्यात येत आहे.

अर्थसंकल्पातील मोठ्या घोषणा :

गेमिंग आणि कंटेंट क्षेत्रांच्या वाढीवर दिला जाईल भर

नवीन आयकर कायदा 1 एप्रिल 2026 पासून अंमलात

दिव्यांगजन कौशल्य योजना राबवणार

दिव्यांगांसाठीच्या रोजगाराच्या - प्रशिक्षणाच्या संधी वाढवणार

पुणे-हैदराबाद हायस्पीड रेल कॉरिडोर होणार

पाहा अर्थसंकल्पीय भाषण मराठीतून...

अर्थमंत्री निर्मला सीतारमण 2026-27 या वर्षाचा अर्थसंकल्प सादर केला. त्यांचं हे भाषण तुम्हाला 'बीबीसी मराठी'वर मराठीतून पाहता येईल.

इथे क्लिक करा.

तसेच, या भाषणातील महत्त्वाचे मुद्दे तुम्हाला इथे वाचता येतील.

पुणे - हैदराबाद हायस्पीड रेल कॉरिडोर होणार

'रेअर अर्थ'साठी मोठी घोषणा

'कॉर्पोरेट मित्र योजने'ची घोषणा

सेमीकंडक्टर क्षेत्राची क्षमता वाढवण्यावर जोर देणार

अर्थसंकल्पाबाबत कोण काय म्हणाले?

गृहमंत्री अमित शहा यांनी अर्थसंकल्पाचं वर्णन "विकसित भारताचा अर्थसंकल्प" असे केले.

अमित शाह यांनी X वर पोस्ट करत म्हटलं की, "उत्पादन ते पायाभूत सुविधांपर्यंत, आरोग्य ते पर्यटन, ग्रामीण भाग ते कृत्रिम बुद्धिमत्ता, क्रीडा ते तीर्थस्थळांपर्यंत, हे बजेट प्रत्येक गाव, शहर आणि शहरातील तरुण, महिला आणि शेतकऱ्यांचे स्वप्न सक्षम करणारे आणि पूर्ण करणारे आहे."

केंद्रीय अर्थसंकल्प 2026 बद्दल केंद्रीय मंत्री ज्योतिरादित्य सिंधिया यांनी, "हा एक प्रगतीशील अर्थसंकल्प असून तो भारतीय अर्थव्यवस्थेच्या प्रत्येक क्षेत्रावर लक्ष केंद्रित करतो" असं म्हटलं.

"प्रत्येक नागरिकासाठीचा हा अर्थसंकल्प आहे. या अर्थसंकल्पात ईशान्येकडील अनेक संस्था आणि जलमार्गांसाठी तरतूद करण्यात आली आहे," असंही ते म्हणाले. म्हटलं.

काँग्रेस खासदार शशी थरूर यांनी, अर्थमंत्री निर्मला सीतारमण यांच्या अर्थसंकल्पीय भाषणातून काहीही मिळालं नसल्याचं म्हटलं. भाषणातून फारच कमी माहिती मिळाली कदाचित बजेटची छापील प्रत पाहून अधिक माहिती मिळेल असंही थरूर म्हणाले.

वृत्तसंस्था पीटीआयशी बोलताना ते म्हणाले की, "आपण मोठ्या मुद्द्यांकडं पाहिलं तर त्यात मध्यमवर्गीय किंवा निम्न मध्यमवर्गीयांसाठी काहीही नाही. राज्यांसाठीही त्यात काहीही नव्हतं."

"राजकोषीय विकेंद्रीकरण 41 टक्क्यांवर आहे आणि अनेक राज्यांकडं त्यांच्या नागरिक आणि मतदारांप्रती असलेल्या जबाबदाऱ्या पूर्ण करण्यासाठी पुरेसा पैसाही नाही. हीच आता खरी चिंता बनली आहे," असं थरूर म्हणाले.

"कोणत्या ठिकाणी काय असेल याबद्दलही फारशी माहिती नव्हती. उदाहरणार्थ, केरळमध्ये आम्ही जवळजवळ 15 वर्षांपासून एम्सची वाट पाहत आहोत. याबद्दल कोणतीही घोषणा झाली नाही. अखिल भारतीय आयुर्वेद संस्था स्थापन करण्याचा उल्लेख आहे, पण ती कुठे होणार हेच सांगितलं नाही," असं थरूर म्हणाले.

समाजवादी पक्षाचे प्रमुख अखिलेश यादव यांनी 2026 चा अर्थसंकल्प समजण्यापलिकडचा असल्याचं म्हटलं आहे.

अखिलेश यादव म्हणाले की, "गरीब, शेतकरी आणि ग्रामीण भागत राहणाऱ्या लोकांच्या समजण्यापलिकडचा हा अर्थसंकल्प आहे. यामुळं गरिबांचं पोट भरत नाही किंवा नोकऱ्या मिळणार नाहीत. हे फक्त स्वप्नं दाखवणारं बजेट आहे," असं अखिलेश यादव म्हणाले.

आज शेअरबाजार सुरू

रविवारचा दिवस असूनही आज शेअरबाजारात ट्रेडिंग सुरू होतं. BSE आणि NSE दोन्हींमधील व्यवहार आज पूर्ण ट्रेडिंग सेशन सुरू असतील. अर्थसंकल्पांमधल्या घोषणांनंतर गुंतवणूकदारांना लगेचच त्यावर प्रतिक्रिया देता यावी, यासाठी ट्रेडिंग सुरू आहे.

स्वतंत्र भारताच्या इतिहासात फक्त दुसऱ्यांदाच शेअरबाजार वीकेंडला सुरू आहे. यापूर्वी गेल्या वर्षी - 2025 मध्ये शनिवारी अर्थसंकल्प सादर करण्यात आला होता, तेव्हा देखील शेअर बाजारांचं कामकाज सुरू ठेवण्यात आलं होतं.

अर्थमंत्री निर्मला सीतारमण यांचा विक्रम

अर्थमंत्री निर्मला सीतारमण यांनी रविवारी अर्थसंकल्प सादर केला.

2026 च्या अर्थसंकल्पाबाबत पंकज चौधरी म्हणाले की, "गेल्या 11 वर्षात पंतप्रधानांच्या नेतृत्वाखाली सादर झालेले अर्थसंकल्प देशातील लोकांच्या आकांक्षांवर आधारित होते आणि ते देशाला पुढे घेऊन जाणारे ठरले. आज सादर होणारा अर्थसंकल्प 2047 च्या विकसित भारताला लक्षात ठेवूनच काम करेल.".

अर्थमंत्री निर्मला सीतारमण यांनी सलग नववा अर्थसंकल्प सादर करून देशाच्या संसदीय इतिहासात एक नवा विक्रम प्रस्थापित केला.

माजी पंतप्रधान मोरारजी देसाई यांनी एकूण 10 अर्थसंकल्प सादर केले होते.

निर्मला सीतारामणदेखील हा अर्थसंकल्प सादर करून त्यांच्या या विक्रमाच्या जवळ जाऊन पोहोचतील. देसाई यांनी 1959-1964 दरम्यान सहा आणि 1967-1969 दरम्यान चार अर्थसंकल्प सादर केले होते.

मात्र, सर्वाधिक सलग अर्थसंकल्प सादर करण्याच्या बाबतीत सीतारमण आघाडीवरच राहतील.

(बीबीसीसाठी कलेक्टिव्ह न्यूजरूमचे प्रकाशन.)