Yaƙin Iran da Amurka da Isra'ila da kuma abubuwan da ke faruwa a Najeriya 03/03/2026

Rahoto kai-tsaye

Daga Aisha Babangida, Haruna Kakangi da Abdullahi Bello Diginza

1. 3 Maris 2026'Ɗan tsohon jagoran Iran, Mojtaba Khamenei, na nan da ransa cikin ƙoshin lafiya'

   

   Asalin hoton, Isna

   Kafofin watsa labaran Iran sun ruwaito cewa Mojtaba Khamenei, ɗan tsohon jagoran addinin Iran, Ayatollahi Khamenei, yana nan da ransa cikin ƙoshin lafiya.

   Kamfanin dillancin labarai na Mehr ya ruwaito cewa Mojtaba yana nan “yana nazari tare da duba ayyukan da suka shafi ƙasar, ciki har da nazarin waɗanda suka yi shahada da sauran al’amuran yau da kullum.“

   Kwana huɗu da suka gabata ne hare-haren Isra’ila da Amurka a ofishin Ali Khamenei suka yi ajalin tsohon jagoran ƙasar.

   Daga bisani kuma aka ruwaito cewa matarsa Mansoureh Khojasteh Bagherzadeh, wadda ta kwashe kusan kwana uku tana kwance a cikin wani mawuyacin hali ta rasu.

   A lokacin harin, Zahra Haddad Adel, matar Mojtaba Khamenei da ƴa da surukin Ali Khamenei, da wani jikansa duk sun mutu.

   Mojtaba ne na biyu a cikin ƴaƴan Ali Khamenei, kuma ana ambata shi a matsayin wanda zai iya maye gurbinsa.

2. 3 Maris 2026'Jagororin Iran na riƙon-ƙwarya sun gana a karon farko'

   

   Asalin hoton, ISNA

   Kafofin watsa labarai a Iran sun ruwaito cewa jagororin Iran na riƙon ƙwarya a Iran sun gudanar da zama a karon farko domin tattauna batutuwan ƙasar.

   Kafofin sun sanar da hakan ne a wani hoto da suka fitar.

   Sai dai babu cikakken bayani kan wuri da lokacin da aka gudanar da taron.

   Shugaban Iran Masoud Pezhakian, da babban alƙalin ƙasar Gholamhossein Mohseni-Ejei, da babban faƙihi Alireza Arafi ne suka halarci zaman.

   Su ne za su cigaba da jagorantar harkokin addinin ƙasar har zuwa lokacin da za a naɗa sabon jagoran addini a ƙasar.

3. 3 Maris 2026Iran ta watsar da damarta ta shiga yarjejeniyar sulhu - Trump

   

   Asalin hoton, EPA

   Shugaban Amurka Donald Trump ya bayyana cewa Iran ta watsar da damar da ya ba ta domin shiga yarjejeniyar sulhu a yaƙin da ake gwagzawa tsakanin Isra'ila da Amurka da Iran.

   A wani rubutu da ya wallafa a shafinsa na Truth, ya ce, "mun tarwatsa tsaron sararin samaniyar Iran da rundunar sojin ruwanta da ma jagorancinta. Sun nemi shiga yarjejeniya, amma na faɗa musu sun yi latti, domin sun watar da damar da na ba su," in ji shi.

   A makon jiya ne aka yi zaman tattaunawa karo na uku tsakanin Amurka da Iran a birnin Geneva, inda ministan harkokin wajen Iran Abbas Araqchi ya bayyana ƙarfin gwiwarsa kan maganar.

   Haka kuma Amurka ta ce bayan batun shirin nukiliyar Iran, makamanta masu linzami ma suna barazana babba ga tsaron Amurka.

4. 3 Maris 2026MDD ta buƙaci a kawo ƙarshen yaƙi tsakanin Afghanistan da Pakistan

   

   Asalin hoton, Getty Images

   Majalisar Dinkin Duniya ta yi kiran kawo ƙarshen yaƙin iyaka da ƙasashen Afghanistan da Pakistan ke yi da ya yi ajalin mutum 42 cikin kwanaki 6 da fara fadan.

   Babu takamaimai adadin waɗanda aka kashe a ɓangarorin biyu.

   Pakistan ta ce rikici ya sake ɓarkewa a sama da wurare 24 a iyakar su, inda jami'ai ke iƙirarin sun lalata wani sansanin soji da lalata wurin ajiyar makamai.

   Ya yin da ita ma gwamnatin Taliban a ke cewa dakarunsu sun karbe ikon wani sansanin soji da ke yankin Kandahar.

5. 3 Maris 2026Gwamnatina ba za ta lamunci rashawa ba - Ahmed Aliyu

   

   Asalin hoton, Sokoto State Government

   Gwamnan jihar Sokoto Ahmed Aliyu ya "gargaɗi" manyan ma'aikatan gwamnatin jihar game da rashawa, tare da bayyana cewa gwamnatinsa ba za ta lamunci hakan ba.

   Wata sanarwa da daraktan yaɗa labarai da hulɗa da jama'a na gwamnan jihar Abubakar Bawa ya fitar, ta ce gwamnan ya yi wannan bayani ne sa'ilin taron buɗe-baki da manyan sakatarori da shugabannin ma'aikatu da kuma daraktocin gwamnatin jihar a ranar Litinin.

   Aliyu ya ce "a matsayinku na shugabanni a ma'aikatunku, wajibi ne ku rungumi ɗabi'ar kaffa-kaffa da adalci a kan duk wata hulɗa."

   Sanarwar ta kuma ja hankalin ma'aikata kan zuwa aiki latti da kuma ƙin zuwa aikin baki ɗaya.

   Ya ce gwamnatinsa za ta ɗauki matakan inganta walwalar ma'aikata, saboda haka ya kamata su ma, su saka mata ta hanyar mayar da hankali wajen aiki.

6. 3 Maris 2026Yadda yaƙin Iran zai shafi farashin man fetur a Najeriya da duniya

   

   Asalin hoton, getty

   Yaƙi na ci gaba da rincaɓewa tsakanin Iran da Amurka da kuma Isra'ila tun bayan kisan jagoran addini na Iran Ayatollah Ali Khamenei.

   Yayin da Isra'ila da Amurka ke ci gaba da kai wa Iran hari a biranenta, Iran ta matsa ƙaimi wajen kai hare-hare kan duk wata kadarar Amurka da wasu cibiyoyin makamashi a yankin Gabas ta tsakiya.

   Wani abu da ake ganin wannan yaƙi zai shafa shi ne fannin makamashi.

   Farashin gangar man fetur ya tashi da ƙarin kashi 4% yayin da rikicin ke ci gaba da ƙazancewa a Gabas ta Tsakiya.

   A ranar Talata an riƙa sayar da gangan man fetur ɗaya kan dala 80, wanda shi ne farashi mafi tsada daga farkon wannan shekara.

   Iran ta datse mashigar Hormuz - wanda wata ƙaramar mashiga ce da ake bi wajen safarar man fetur, wadda ta haɗa yankin Gulf da tekun Indiya.

   Karanta cikakken labarin

7. 3 Maris 2026Yadda ake takun-saƙa tsakanin El-Rufai da ICPC

   

   Asalin hoton, Social media handles

   Dambarwa ta kaure tsakanin hukumar ICPC mai yaƙi da almundaha a Najeriya da kuma tsohon gwamnan jihar Kaduna, Malam Nasir El-Rufai.

   Sa-in-sar ta ɓarke ne bayan da a ranar Litinin hukumar ta shigar da shi ƙara gaban babbar kotun tarayya da Abuja.

   Tun a ranar 19 ga watan Fabrairun da ya gabata ne hukumar ta tabbatar da cewa El-Rufai na hannunta, bayan da ta kama shi, jim kaɗan bayan hukumar tsaron farin kaya ta DSS ta sallame shi daga gayyatar da ta yi masa.

   Tun da farko hukumar ta gayyace shi domin amsa wasu tambayoyin da ta ce tana son samun amsarsu daga gare shi.

   Bayan tsare shi hukumar ta kuma kai samame gidansa da ke Abuja, domin gudanar da bincike a ciki, kamar yadda Muyiwa Adekeye, kakakin yaɗa labaran El-Rufai ya bayyana a shafinsa na X.

   Cikin wata hira da El-Rufai ya yi da gidan talbijin na Arise gabanin kama shi ya yi iƙirarin satar jin wayar babban mai bai wa shugaban ƙasa shawara kan harkokin tsaro Mallam Nuhu Ribadu.

   Karanta cikakken labarin

8. 3 Maris 2026Tafiye-tafiye ta jirgin sama na fuskantar cikas a ƙasashen Gabas ta Tsakiya

   

   Asalin hoton, Getty Images

   Tafiye-tafiye ta jirgin sama sun funkanci cikas a yawancin ƙasashen Gabas ta Tsakiya, sakamakon rikicin da ake yi a yankin.

   A wani ɓangaren, jiragen Emirates daga Daular Larabawa sun fara tashi.

   Wasu jiragen sun tashi daga kasashen Faransa da Birtaniya da Jamus da Italiya da Switzerland, amma an soke tashin jirage da dama.

   Amurka da Isra'ila dai na ci gaba da kai munanan hare-hare a Iran

   Zai yi wuya a san ainahin abin da ke faruwa a Iran, sakamakon rashin sadarwar intanet.

   Amma mutanen da suka samu dama sun bayyana halin da ake ciki wanda ya fi kamari a birnin Isfahan da cibiyar makamin nukiliyar Iran ke ciki.

9. 3 Maris 2026An buɗe iyakar Gaza karon farko bayan hare-haren Amurka da Isra’ila kan Iran

   

   Asalin hoton, Getty Images

   Isra’ila ta ce ta buɗe babbar hanyar da ke shiga Gaza, wadda take da muhimmanci wajen shigar da kayan agaji a karon farko tun bayan da ta kai hare-haren jiragen sama kan Iran.

   Majiyoyi daga Majalisar Ɗinkin Duniya da hukumomin agaji sun yi gargaɗi cewa rufe hanyoyin shiga ne ya sa kayan abincion da mai ke ƙarewa a Gaza.

   Wannan ya sa mutane sun fara siyan kaya cikin hanzari, abin da ya sa farashin kaya ya tashi a kasuwannin cikin gida.

   Hukumar tsaron Isra’ila, Cogat, wadda ke kula da hanyoyin shiga, ta bayyana cewa an rufe iyakar Kerem Shalom ne saboda “barazanar harin makami” da ke da haɗari ga ma’aikatan Isra’ila da na Falasɗinu.

   Majiyoyi a Gaza sun shaida wa BBC cewa an tura motocin agaji zuwa Kerem Shalom da safe amma har yanzu ba su dawo da kaya ba.

   A wani ɓangare kuma, har yanzu mashigar Rafah da ke zuwa ƙasar Misira wadda ake amfani da ita wajen fitar da marasa lafiya a rufe take.

10. 3 Maris 2026Spain ta hana Amurka amfani da filin jirginta domin kai wa Iran hari

    

    Asalin hoton, Getty Images

    Wasu jiragen sojin Amurka sun bar sansanonin Rota da Morón da ke kudancin ƙasar Spain bayan gwamnatin Spain ta ƙi bai wa Washington izinin amfani da wuraren domin kai hari kan Iran.

    Ministan harkokin wajen Spain, José Manuel Albares, ya ce ƙasarsa ba za ta amince a yi amfani da ƙasarta ba ga “duk wani abu da bai yi daidai da ƙundin tsarin Majalisar Ɗinkin Duniya ba".

    Matakin ya sa Spain ta saɓa wa ra’ayin wasu ƙawayenta na Turai.

    Sai dai babban sakataren ƙungiyar tsaron ƙasashen yammacin duniya ta NATO, Mark Rutte, ya shaida wa BBC cewa Turai “na goyon bayan harin Amurka a Iran.”

    Duk da haka, firaministan Spain, Pedro Sánchez, ya soki matakin da Amurka da Isra’ila suka ɗauka kan Iran.

11. 3 Maris 2026Dangote ya ƙara farashin man fetur

    

    Asalin hoton, X/@AlikoDangote

    Matatar man Dangote ta ƙara farashin man fetur daga naira 774 zuwa naira 874 kan kowacce lita, lamarin da ya haifar da damuwa game da yiwuwar tashin farashin fetur a faɗin Najeriya.

    Jaridar Vanguard ta ruwaito cewa wani babban jami’in matatar ya tabbatar da sabon farashin a ranar Litinin, inda ya ce an ɗauki matakin ne saboda rashin tabbas da hauhawar farashin man a kasuwannin duniya sakamakon rikicin Gabas ta Tsakiya.

    Binciken petroleumprice.ng ya nuna cewa an riga an fara amfani da sabon farashin, wanda zai iya shafar dillalan sayarwa da kuma masu amfani da fetur a ƙasar baki ɗaya.

    Ƙarin farashin ya biyo bayan dakatarwar da matatar ta yi kan lodin fetur daga karfe 12 na dare a ranar 2 ga Maris, 2026, sakamakon farashin mai a duniya da ya wuce dala 80 a kan kowacce ganga cikin dare ɗaya.

    Masu sayar da fetur a kasuwannin unguwanni sun bayyana fargaba cewa wannan ƙaruwa na iya kawo ƙarancin mai a wasu wurare, musamman a lokutan da ake da yawan buƙata, inda wasu ke ganin cewa hakan na iya ƙara matsaloli ga masu amfani da motoci da kamfanonin sufuri a Najeriya.

    Haka zalika, masana tattalin arziki sun yi gargadi cewa ƙarin farashin zai iya janyo hauhawar wasu kayan more rayuwa, wanda zai ƙara tsananta halin tattalin arziki ga talakawa da 'yan kasuwa a ƙasar.

12. 3 Maris 2026Ƴan shi'a sun yi zanga-zangar nuna goyon bayan Iran a Legas

    

    Asalin hoton, Media Forum of the Islamic movement

    Ƴan Shi'a a Najeriya sun gudanar da zanga-zangar lumana a Jihar Legas, da ke kudu maso yammacin Najeriya, domin yin allawadai da kisan jagoran addinin Iran, Ayatollah Ali Khamenei, a hare-haren da Amurka da Isra’ila suka kai wa Iran.

    Jaridar Punch a Najeriya ta ruwaito cewa masu zanga-zangar sun ratsa wasu sassan yankin Maryland, ɗauke da alluna da tutoci, suna allawadai da abin da suka kira mamaye Iran da kuma kisan gilla kan jagoranta wanda ya daɗe yana mulki.

    An kashe Ayatollah Ali Khamenei ne a safiyar Asabar 28 ga Fabrairu a hare-haren haɗin gwiwa da Amurka da Isra’ila suka kai tare da wasu manyan jami’an gwamnatin Iran.

    Zanga-zangar ta Legas na zuwa ne bayan irin zanga-zangar da mabiya Shi’ar suka gudanar a jihohin Kano da Yobe da Gombe da Bauchi a ranar Lahadi.

13. 3 Maris 2026Rundunar sojin Isra’ila ta ce ta kai hari kan ofishin shugaban ƙasar Iran

    

    Asalin hoton, Getty Images

    Rundunar sojin Isra’ila ta bayyana cewa sojojinta sun kai hari kan ofishin shugabancin ƙasar Iran.

    A cikin wata sanarwa da ta wallafa a shafin Telegram, rundunar ta ce an jefa “makamai da dama” a kan Ofishin Shugaban da majalisar tsaron ƙasar.

    Sanarwar ta ƙara da cewa an kai harin ne kan wata cibiyar horon soji da “ƙarin muhimman gine-ginen shugabancin ƙasar.”

    Rundunar ta ce tsohon jagoran addinin Iran, Ayatollah Ali Khamenei wata sa'in yana amfani da ofishin shugaban ƙasar.

    An kashe jagoran addinin ne a hare-haren da Isra'ila da Amurka suka kai kan Iran a ƙarshen makon da ya gabata.

14. 3 Maris 2026Hezbollah ta ce ta kai hari kan sansanonin sojin Isra'ila uku

    

    Asalin hoton, Getty Images

    Ƙungiyar Hezbollah mai samun goyon bayan Iran ta bayyana cewa ta kai hari kan sansanonin sojin Isra'ila uku a matsayin martani ga barnar da harin Isra’ila ta yi wanda ya shafi garuruwa da ƙauyuka da dama a Lebanon.”

    A cikin saƙonni guda uku da ta wallafa a shafin Telegram, Hezbollah ta ce ta harbi sansanin Nafah dake kan tsaunukan Golan da “manyan roka,” sannan ta kuma kai hari kan sansanonin jiragen sama na Meron da Ramat David, a arewacin Isra’ila da jirage marasa matuƙa.

    Isra’ila ba ta yi wani bayani ba game da harin da Hezbollah ta ce ta kai mata.

15. 3 Maris 2026Farashin gas na ci gaba da tashi sakamakon rikicin Gabas ta Tsakiya

    

    Asalin hoton, Getty Images

    Farashin gas a kasuwannin Turai na ci gaba da hauhawa sakamakon rikicin da ke ƙara kamari a Gabas ta Tsakiya.

    Ma’aunin farashin gas na Turai ya tashi da kashi 33 cikin ɗari, yayin da na Birtaniya ya ƙaru da kashi 30 cikin ɗari.

    Duka ɓangarorin biyu na cinikayya a matakan da ba a taɓa gani ba tun watan Janairun shekarar 2023.

    A ranar Litinin farashin gas ya tashi da kusan kashi 50 cikin ɗari bayan kamfanin QatarEnergy, wanda ke cikin manyan masu fitar da gas a duniya, ya dakatar da samarwa sakamakon abin da ya kira hare-haren soji kan wasu wurarensa.

    A cewar kamfanin Trading Economics, Birtaniya na cikin mawuyacin hali musamman saboda ƙarancin wuraren adana gas da take da su, da kuma dogaro mai yawa kan shigo da shi daga waje.

    Rahoton ya nuna cewa adadin gas da ke ajiye a cikin ƙasar bai wuce kashi 30 cikin ɗari ba zuwa ƙarshen watan Fabrairu.

16. 3 Maris 2026Isra'ila ta kai hari kan hukumar yaɗa labaran Iran

    

    Asalin hoton, Getty Images

    Shugaban kafar yaɗa labarai ta Iran IRIB, Peyman Jebeli, ya ce an kai hari kan wasu sassan harabar ofisoshin hukumar da ke birnin Tehran, lamarin da ya janyo ɓarna a wasu sassan gine-gine yayin da rundunar sojin Isra’ila ta kuma tabbatar da cewa ta kai hari kan IRIB ɗin.

    A wani saƙo da rundunar ta wallafa a shafinta na harshen Farisa a dandalin X, ta ce ta kai hari kan abin da ta kira “kafar yaɗa ƙarya da danniya” ta rundunar kare juyin juya halin Iran.

    Kafofin yaɗa labarai na Iran sun ruwaito a jiya cewa wasu gine-ginen gidan talabijin na gwamnati sun fuskanci hari.

    Wannan ba shi ne karon farko ba da aka kai hari kan kafar yaɗa labaran Iran domin an taɓa kai mata hari a lokacin yaƙin kwanaki goma sha biyu tsakanin Iran da Isra’ila a watan Yunin shekarar da ta gabata.

17. 3 Maris 2026Trump ya soki firaiministan Birtaniya kan 'rashin taimaka' wa Amurka

    

    Asalin hoton, Reuters

    Shugaban Amurka, Donald Trump, ya soki firaiministan Birtaniya, Keir Starmer, kan abin da ya kira rashin taimaka wa Amurka a hare-haren da ta kai kan Iran.

    A wata hira ta wayar tarho da jaridar The Sun, Trump ya ce Starmer “bai taimaka ba. Ban taɓa tunanin zan ga hakan ba. Ban taba tunanin zan ga hakan daga Birtaniya ba.”

    Ya kara da cewa wannan abin takaici ne ganin dangantakar ƙasashen biyu.

    A ranar Litinin, Starmer ya shaida wa majalisar dokokin Birtaniya cewa gwamnatinsa “ba ta goyon bayan sauya mulki ta hanyar hare-hare ba."

    Da farko dai Birtaniya ba ta amince Amurka ta yi amfani da sansanoninta wajen kai hari kan Iran ba, amma daga baya ta buɗe sansanonin nata domin abin da ta kira hare-haren kariya kan wasu wurare a Iran.

    Trump ya kuma ce Faransa ta nuna goyon baya sosai, yana mai cewa, “Faransa ta yi abin kirki.

    Sauran ma sun yi abin kirki. Amma Birtaniya ta bambanta da sauran.”

18. 3 Maris 2026Muna da isassun makaman yaƙi 'har abada' - Trump

    

    Asalin hoton, Getty Images

    Shugaban Amurka, Donald Trump, ya ce ƙasarsa na da isassun makaman yaƙi da za a iya amfani da su “har abada”, yana mai jaddada cewa Amurka a shirye take ta yi nasara a duk wani rikici.

    Trump ya bayyana hakan ne a wani saƙo da ya wallafa a dandalin sada zumunta na Truth Social, inda ya yi magana kan abin da ya kira tarin makaman da Amurka ke da su.

    Ya rubuta cewa, ana iya gudanar da yaƙe-yaƙe na dogon lokaci ta amfani da irin waɗannan makamai kaɗai.

    Ya kuma ƙara da cewa, “Amurka na da tarin makamai marasa iyaka, kuma a shirye take ta yi nasara babba,”.

    Trump ya kuma zargi tsohon shugaban ƙasar, Joe Biden, da bai wa Ukraine makaman Amurka masu matuƙar ƙarfi da yawa.

    A ƙarshen wa’adin mulkinsa na shekara huɗu, Biden ya amince Ukraine ta yi amfani da makamai masu linzami na dogon zango irin su ATACMS, waɗanda ke iya kai hari har nisan mil 190, kimanin kilomita 300.

19. 3 Maris 2026Harin Iran ya lalata sansanin sojin saman Amurka a Bahrain

    

    Asalin hoton, Getty Images

    Rahotanni na cewa wani hari da Iran ta kai ya lalata babban sansanin sojin saman Amurka da ke ƙasar Bahrain.

    Hotuna da bidiyo da kamfanin dillancin labarai na Fars News Agency, wanda ke da alaƙa da dakarun juin juya halin Iran IRGC ya wallafa, sun nuna abin da ya yi kama da jerin makamai masu linzami na faɗowa kan wasu wurare daga nesa tare da fashewa.

    Rahoton ya yi iƙirarin cewa harin jiragen sama marasa matuƙa da makamai masu linzami na IRGC ya lalata wani ginin da ma’aikatar Amurka a yankin Sheikh Isa na Bahrain, tare da haddasa fashewar tankunan mai.

    Har zuwa yanzu, Amurka ba ta fitar da wata sanarwa kan waɗannan rahotanni ba.

    A baya dai an ga hayaƙi na tashi daga wani sansanin sojan ruwa da Amurka ke gudanarwa a Bahrain.

    Ma’aikatar Harkokin Wajen Amurka ta ba ‘yan ƙasarta umarnin su fice daga Bahrain nan take, tare da wasu ƙasashe kusan goma sha biyu a yankin Gabas ta Tsakiya, saboda matsalar tsaro da ke ƙara kamari.

20. 3 Maris 2026An kai hari kan ofishin jakadancin Amurka a Saudiyya

    

    Asalin hoton, Getty Images

    Ma’aikatar Tsaron Saudiyya ta tabbatar da cewa an kai hari kan ofishin jakadancin Amurka da ke birnin Riyadh da jiragen sama marasa matuƙa guda biyu, lamarin da ya haddasa wata ƙaramar gobara da kuma lalacewar kayayyaki kaɗan a ginin.

    A cikin sanarwar da ma’aikatar ta wallafa a shafinta na X, ta ce bisa ƙiyasin farko, harin bai yi sanadiyyar asarar rai ba, amma ya janyo ɓarnar da ba ta wuce iyaka ba a cikin ginin.

    A nasa bangaren, ofishin jakadancin Amurka a Saudiyya ya fitar da umarnin kowa ya zauna a inda yake ga ma’aikatansa da ke biranen Jeddah da Dhahran tare da Riyadh.

    Haka kuma ya bayyana cewa zai takaita duk wata tafiya da ba ta zama dole ba zuwa sansanonin soji a yankin.