Labarin wasanni daga 27 zuwa 30 ga watan Janairun 2026

Rahoto kai-tsaye

Mohammed Abdu

1. 30 Janairu 2026Champions League: Benfica za ta ƙara fafatawa da Real Madrid a wasan cike gurbi

   

   Asalin hoton, Getty Images

   Benfica za ta sake karawa da Real Madrid a wasannin cike gurbi na gasar cin kofin zakarun nahiyar Turai, mako uku bayan karawar da suka yi a wasannin cikin rukuni.

   A ranar Laraba, mai tsaron ragar ƙungiyar Benfica Anatoliy Trubin ya zura ƙwallon ta huɗu a ragar Madrid cikin minti na 98, lamarin da ya sa ƙungiyar, wadda Jose Mourinho ke horaswa ta yi nasara kan Real da ci 4-2.

   Ga cikakken jadawalin karawar:

   • Bodo/Glimt v Inter Milan
   • Benfica v Real Madrid
   • Monaco v Paris St-Germain
   • Qarabag v Newcastle
   • Galatasaray v Juventus
   • Club Brugge v Atletico Madrid
   • Borussia Dortmund v Atalanta
   • Olympiacos v Bayer Leverkusen

2. 29 Janairu 2026Brighton za ta yi watsi da tayin da Forest za ta yi wa Ayari, Brighton

   

   Asalin hoton, Getty Images

   Ƙungiyar Brighton na shirin kin amincewa da tayin fam miliyan £20 da Nottingham Forest za ta yi, domin sayen dan wasan Yasin Ayari.

   Forest, wadda ke fuskantar barazanar faduwa daga gasar Premier League a bana, na son kara karfin ƙungiyar kafin a rufe kasuwar saye da sayar da ƴan wasa a ranar Litinin.

   Ayari ya koma Brighton daga AIK Stockholm a shekarar 2023, kan fam miliyan £3.5, ya buga wasa 66 a ƙungiyar da cin ƙwallo shida.

   Tun bayan zuwansa Ingila, mai shekaru 22 ya kuma buga wasannin aro a Blackburn da Coventry.

   Tuni Forest ta ɗauki aron dan wasan Italiya, Lorenzo Lucca daga Napoli a watan nan.

   Haka kuma, mai tsaron ragar Wolverhampton, Jose Sa, na cikin jerin ƴan wasan da Forest ke fatan ɗauka, bayan da John Victor, wanda ke tsare raga tare da Matz Sels, aka tabbatar ba zai sake buga wasa ba har karshen kakar bana, sakamakon raunin da ya ji a gwiwa.

3. 29 Janairu 2026Carrick ba zai kai Man United ga cin kofi ba - Keane, Manchester United

   

   Asalin hoton, Getty Images

   Roy Keane ya ce Michael Carrick ba shi da isasshen “ilimin koyar da ƙwallon kafa” da zai jagoranci Manchester United zuwa lashe kofin Premier League, don haka dole ne ƙungiyar ta nemi wani koci ƙwararre tun da wuri.

   Carrick ya fara jan ragamar United da kafar dama tun bayan naɗa shi aikin riƙon ƙwarya har zuwa karshen kakar wasa ta bana, inda ya lashe wasa biyu a jere a Premier League da cin Manchester City 2-0 a Old Trafford da doke Arsenal 3-2 a Emirates.

   Waɗannan nasarori biyu sun kai United cikin ƴan huɗun teburi - an kuma ci gaba da faɗin ra'ayoyi cewa Carrick na iya samun aikin a matsayin na dindindin, amma tsohon ƙyaftin ɗin United, Keane, ya gargadi kulob din da kada su dauki wannan mataki.

4. 29 Janairu 2026Napoli na ci gaba da fuskantar ƙalubale a wasanninta, Napoli

   

   Asalin hoton, Getty Images

   Bayan da aka yi waje da iata daga gasar Champions League, ƙungiyar Napoli na fuskantar kalubale — ciki har da ƴan wasanta da dama da ke jinya, wadda ke fatan rage tazarar maki tara tsakaninta da Inter mai jan ragamar Serie A.

   Ranar Asabar Napoli za ta karɓi bakunci Fiorentina, wadda take ta 18 a kasan teburin babbar gasar tamaula ta Italiya.

   Bayan da aka fitar da ita daga gasar zakarun Turai sakamakon shan kashi 3-2 a hannun Chelsea a ranar Laraba, mai riƙe da kofin Serie A za ta samu raguwar buga wasanni, amma koci, Antonio Conte ba zai dauki hakan a matsayin alheri ba, bayan da suke fama da yawan ƴan wasa da ke jinya.

   Tuni dai Conte ya yi murna da Romelu Lukaku ya koma buga tamaula bayan doguwar jinya, amma har yanzu Kevin De Bruyne da Billy Gilmour da David Neres da Matteo Politano da Amir Rrahmani da Andre-Frank Zambo Anguissa da kuma Vanja Milinkovic-Savic duk suna jinya.

5. 29 Janairu 2026Ƙungiya biyar daga Ingila ta kai zagaye na biyu kai tsaye a Champions League, Champions League

   

   Asalin hoton, Getty Images

   Ƙungiyoyin Premier League biyar sun kai zagaye na biyu kai tsaye a Champions League, bayan da aka kammala wasa na takwas takwas a cikin rukuni ranar Laraba.

   Arsenal ce ta ɗaya a kan teburi da lashe dukkan wasan da ta buga gida da waje, Liverpool ta uku ta yi da Tottenham ta hudu da Chelsea ta shida da kuma Manchester City ta takwas.

   Sauran da ke yan takwas ɗin farko da suka kai bante sun hada da Bayern Munich ta biyu da Barcelona ta biyar da kuma Sporting ta Portugal ta bakwai.

   Newcastle United ta 12 ta yi kenan za ta buga gida da waje a wasannin cike gurbi, Real Madrid ma wadda ta kare a mataki na tara da mai rike da kofin PSG karawar cike gurbi za su yi a cikin watan Fabrairu.

   Sauran da za su yi fafatawar cike gurbi sun hada da Inter, Juventus, Atletico Madrid, Atalanta, Bayern Leverkusen, Borussia Dortmund, Olympiakos, Club Brugge, Galatasaray, Monaco, Qarabag da Bodo da kuma Benfica.

   Haka kuma an samu wadanda suka yi ban kwana da wasannin bana su 12 da ya kunshi Marseille, Pafos, Union St Gilloise, PSV Eindhoven, Athletic Bilbao, Napoli, Copenhagen, Ajax, Eintranch Frankfurt, Slavia Prague, Villarreal da kuma Kairat Almaty

6. 29 Janairu 2026''Ina farinciki na fahimci yadda ake buga tamaula a Ingila'', Liverpool

   

   Asalin hoton, Getty Images

   Ɗan wasan gaba na Liverpool, Hugo Ekitike, ya bayyana cewa yana farinciki da yadda ya fahimci yadda ake buga kwallon kafa a Ingila, amma ya amince cewar har yanzu yana bukatar kara bada gudummawa ga kungiyarsa.

   Ɗan wasan na kasar Faransa ya zura ƙwallonsa ta 13 a kakar wasa a lokacin da Liverpool ta doke Qarabag da ci 6–0, sakamakon da ya ba su gurbin shiga zagaye ƴan 16 a gasar Champions League ranar Laraba.

   Bayan fara kakar wasa da cin ƙwallo uku a wasa uku, mai shekaru 23 ya ɗauki karin wasa 17 kafin ya ninka adadin da ya zura a raga, amma tun daga ranar 6 ga Disamba, ya ci ƙwallo bakwai a wasa 11.

   Ya koma Liverpool kan fara kakar bana daga Eintracht Frankfurt kan fam miliyan 79.

7. 28 Janairu 2026West Ham ta sayar da Paqueta ga Flamengo, West Ham United

   

   Asalin hoton, Getty Images

   West Ham ta amince da yarjejeniya sayar da Lucas Paqueta ga Flamengo kan sama da fam miliyan 35.5m.

   Paquetá mai shekaru 28, wanda ya koma West Ham daga Lyon a 2022, an ba shi izinin tzuwa ƙasarsa domin kammala komawar can kafin a rufe kasuwar saye da sayar da ƴan wasa ranar 2 ga Fabrairu.

   Ana sa ran Paquetá zai kammala komawar ne yayin da za a fara babbar gasar tamaula ta Brazil a watan Maris.

   West Ham ta yi nasarar lashe wasanni uku a jere a karon farko tun 2023 ba tare da Paquetá ya buga mata wasan ba.

   Sai dai kuma, West Ham da ke matsayi na 18 har yanzu tana cikin barazanar faduwa daga Premier League.

8. 28 Janairu 2026Ward-Prowse zai bar West Ham saboda Nuno baya saka shi a wasanni, West Ham United

   

   Asalin hoton, Getty Images

   Ana sa ran ɗan wasan West Ham, James Ward-Prowse, zai koma Burnley domin buga wasannin aro.

   Ward-Prowse mai shekaru 31 ya koma West Ham daga Southampton a watan Agustan 2023, inda ya buga wasa 78.

   Ɗan wasan Ingila ya je ya buga wasannin aro a Nottingham Forest a kakar 2024–25, inda ya buga wasa 10 a ƙarƙashin kocin wancan lokaci, Nuno Espírito Santo.

   Ya ktaka leda a ƙarƙashin tsohon kocin West Ham, Graham Potter, inda ya buga wasa shida a kakar kafin a sallami Potter a watan Satumba.

   Ward-Prowse bai buga ko minti ɗaya ba tun bayan da aka ɗauko Nuno a matsayin sabon kocin West Ham, wanda ya maye gurbin Potter.

   Burnley na matsayi na 19 a teburin Premier League, kuma tana da tazarar maki 10 tsakaninta da tsira daga faduwa daga gasar.

9. 28 Janairu 2026Tielemans zai yi jinya a Aston Villa zuwa watan Afirilu, Aston Villa

   

   Asalin hoton, Getty Images

   An tabbatar da cewa ɗan wasan Aston Villa, Youri Tielemans, zai yi jinyar mako 10, lamarin da ya kara jefa Aston Villa cikin karancin masu buga mata tsakia a wasanninta.

   Ɗan wasan Belgium mai shekaru 28 ya ji ciwo ne a wasan Premier League da suka ci Newcastle United 2-0 ranar Lahadi.

   Bayan auna girman raunin an tabbatar cewar sai cikin watan Afirilu zai koma taka leda.

   Tuni dai John McGinn ya yi wata biyu yana jinya, yayin da Boubacar Kamara ya gama buga wasannin bana, sakamakon raunin da ya ji.

10. 28 Janairu 2026, Daga Jaridu

    

    Asalin hoton, Getty Images

    Brighton ta ƙi amincewa da tayin da Nottingham Forest ta yi wa ɗan wasan baya na Ingila mai shekaru 34 Lewis Dunk. (Sky Sports)

    Chelsea ba za ta amince a taba mata ɗan wasanta na tsakiya Cole Palmer, mai shekaru 23 ba, yayin da ake alakanta shi da Manchester United, kuma tana ɗaukar ɗan wasan Ingila, wanda ke da kwantiragi har zuwa 2033, a matsayin muhimmin ɗan wasa a nan gaba na ƙungiyar. (Sky Sports)

    Amma ana sa ran ɗan wasan gaba na Chelsea din Raheem Sterling zai bar kungiyar kafin lokacin rufe kasuwar musayar 'yan wasa ta bana, inda ɓangarorin biyu ke tattaunawa kan tashin tsohon ɗan wasan na Ingila mai shekaru 31. (Fabrizio Romano)

    West Ham na neman yarjejeniyar aro ga mai tsaron gidan Tottenham na Czech Antonin Kinsky, mai shekaru 22, da kuma mai tsaron baya na Chelsea Axel Disasi, mai shekaru 27, amma Hammers za su mayar da ɗan wasan baya na Brazil Igor Julio, mai shekaru 27, zuwa Brighton don taimakawa wajen cimma yarjejeniyar biyu. (Guardian)

11. 28 Janairu 2026Kano Pillars ta ɗauki fansa a kan Katsina United, Najeriya Premier League

    

    Asalin hoton, NPFL

    Ƙungiyar ƙwallon kafa ta Kano Pillars ta yi nasarar cin Katsina United 1-0 ranar Laraba a wasan mako na 23 a gasar Premier ta Najeriya.

    Ahmed Musa ne ya ci ƙwallon daf da tashi a karawar da suka yi a filin wasa na Sani Abacha da ke kofar Mata a jihar Kano, Najeriya.

    A cikin watan Satumba Katsina United ta ci Kano Pillars 1-0 a babbar gasar tamaula ta Najeriya.

    Da wannan sakamakon ƙungiyar da ake kira sai masu gida ta yi sama zuwa ta 18 a kasan teburin da maki 25, ita kuwa Katsina United mai maki 30 tana ta 11, amma sai a ranar Alhamis za a karasa sauran wasannin mako na 23.

12. 28 Janairu 2026Chelsea da Sterling sun soke sauran ƙunshin yarjejeniyar da ke tsakaninsu, Chelsea

    

    Asalin hoton, AFP via Getty Images

    Raheem Sterling da Chelsea sun cimma yarjejeniyar soke sauran ƙunshin ƙwantiragin da ke tsakaninsu.

    Ɗan wasan mai shekaru 31 yana da sauran watanni 18 a ƙungiyar Stamford Bridge, wadda ke biyansa albashin fam 325,000 a kowane mako.

    Sterling ya bar Chelsea ne bayan shafe kaka uku da rabi a Stamford Bridge, tun bayan komawarsa daga Manchester City kan fam miliyan 47.5 a shekarar 2022.

    Ɗan wasan tawagar Ingila ya buga karawa 81 a Chelsea, amma rabon da ya kara taka mata leda tun Mayun 2024.

    A baya-bayan nan, Sterling yana atisaye ne shi kaɗai tun bayan da Enzo Maresca ya sanar da shi cewar ba zai yi amfani da shi.

    Ƙungiyoyi da dama, ciki har da Juventus da Bayer Leverkusen, sun so zawarcin ɗan ƙwallon, wanda ake alakanta shi da Fulham.

13. 28 Janairu 2026Sinner zai fuskanci Djokovic a daf da karshe a Australain Open, Australian Open

    

    Asalin hoton, Getty Images

    A gasar tennis ta Australian Open da ake yi a Melbourne, Jannik Sinner ya kai wasan daf da ƙarshe.

    Zakaran da ke kare kambunsa mai fatan lashe na uku a jere ya doke Ben Shelton da cin 6-3, 6-4, 6-4, kuma yanzu zai fafata da Novak Djokovic.

    Shima Djokovic ya tsallaka karawar daf da ƙarshe bayan abokin wasansa Lorenzo Musetti ya janye sakamakon rauni. Musetti yana cin ɗan kasar Serbia, kafin ya ji raunin.

    A ɓangaren mata kuwa, Elena Rybakina ta kai daf da ƙarshe, bayan da ta doke Iga Swiatek da cin 7-5, 6-1.

    Ita kuwa Rybakina za ta fafata da Jessica Pegula, wadda ta ta yi waje da Amanda Anisimova da cin 6-2, 7-6.

14. 28 Janairu 2026West Ham ta kammala ɗaukar Traore daga Fulham, West Ham United

    

    Asalin hoton, Getty Images

    West Ham ta kammala ɗaukar Adama Traoré daga Fulham kan yarjejeniya da ta kai fam miliyan biyu.

    Ɗan wasan mai shekaru 30 zai sake taka leda karkashin kociya, Nuno Espírito Santo, wanda ya taɓa horar da shi a Wolverhampton.

    Yarjejeniyar ta fara ne da fam miliyan 1 (£1m), kuma za ta iya ƙaruwa zuwa fam miliyan 2 tare da ƙarin tsarabe-tsarabe.

    Yarjejeniyar za ta ƙare ne a ƙarshen kakar bana tare da zaɓin tsawaita masa kaka ɗaya da zarar ya taka rawar gani.

    Traore, wanda ya wakilci tawagar Sifaniya wasa takwas, ya buga karawa biyu kacal a Premier League a Fulham a wannan kakar, kuma bai buga wasan da Fulham ta samu nasarar cin Brighton 2–1 a gida a ranar Asabar ba.

15. 28 Janairu 2026, Daga jaridu

    

    Asalin hoton, Getty Images

    Wakilan mai tsaron gidan Manchester United Andre Onana mai shekaru 29, wanda ke zaman aro a Trabzonspor, sun yi tattaunawa game da komawar dan wasan na Kamaru zuwa tsohuwar kungiyarsa Inter Milan a lokacin bazara. (Mail)

    Wolves na tattaunawa don sayen dan wasan tsakiya na Ingila mai shekaru 25 Angel Gomes a matsayin aro daga kungiyar Marseille ta Faransa. (Talksport)

    Burnley na tattaunawa da West Ham kan sayen dan wasan tsakiya na Ingila mai shekaru 31 James Ward-Prowse a matsayin aro. (Telegraph)

    Sunderland ta yi watsi da rahotannin cewa za a iya barin dan wasan gaba na Spain mai shekaru 20 Eliezer Mayenda ya koma Paris FC. (The I paper)

16. 28 Janairu 2026An kashe sama da fam biliyan tara a cinikayyar ƴan ƙwallo, Fifa

    

    Asalin hoton, Getty Images

    An kashe kuɗi mafi yawa a tarihi wajen cinikayyar ƴan ƙwallo da ya kai fam biliyan 9.49 a 2025, kamar yadda hukumar ƙwallon kafa ta duniya, Fifa ta fitar da rahoto.

    Wannan adadin ya haura na fam biliyan 7.01 da aka kashe a 2023, inda aka fi cinikayya a gasar Premier League.

    Ƙungiyyoyin Ingila sun kashe fam biliyan 2.7 a 2025, yayin da a Jamus da Italiya su ne kaɗai sauran ƙasashen da suka kashe ƙudin da ya haura dala Amurka biliyan ɗaya.

    Haka kuma, Ingila ta samu kuɗin shiga da ya kai fam biliyan 1.28 daga cinikayyar ƴan ƙwallo tsakanin ƙasa da ƙasa.

    Shekarar da ta gabata an yi cefanen ƴan wasa 86,158 — mafi yawa a tarihi — a wasannin ƙwararru na maza da mata, da kuma ƙwallon ƙafa ta ƴan wasa ƴan dagaji da ake kira (amateur).

    A ɓangaren wasan mata, an kashe kuɗi fam miliyan 20.74 a 2025, wanda ya karu sama da kaso 80 cikin 100 idan aka kwatanta da shekarar da ta gabata.

17. 28 Janairu 2026Za a kammala wasannin cikin rukuni a Champions League ranar Laraba, Champions League

    

    Asalin hoton, Getty Images

    Yau ne za a kammala wasannin cikin rukuni a Champions League karawa ta takwas - takwas, inda za a yi tata ɓurza 18 don fayyace, waɗanda za su kai zagayen gaba da su wanene za su yi karawar cike gurbi da masu ban kwana da fafatawar bana.

    Wasannin da za a buga:

    • Ajax da Olympiakos
    • Arsenal da Kairat Almaty
    • Ath Bilbao da Sporting
    • Atl Madrid da Bodo Glimt
    • B Dortmund da Inter
    • B Leverkusen da Villarreal
    • Barcelona da Copenhagen
    • Benfica da Real Madrid
    • Club Brugge da Marseille
    • E Frankfurt da Tottenham
    • Liverpool da Qarabag
    • Man City da Galatasaray
    • Monaco da Juventus
    • Napoli da Chelsea
    • PSG da Newcastle
    • PSV Eindhoven da B Munich
    • Pafos da Slavia Prague

    Ƙungiya 36 ne ke buga wasannin kakar nan, kuma da zarar an kammala fafatawar yau - tun daga matakin farko zuwa na takwas a teburi sun kai zagayen ƴan 16, duk wadda take ta tara zuwa 24 ja a raba su a jadawalin cike gurbi, domin samun takwas da za su kai zagaye na biyu.

    Yayin da duk ƙungiyar da take daga mataki na 25 zuwa ta 36 za su yi ban kwana da fafatawar bana.

    Kawo yanzu an buga karawa 126 da cin kwallo 426, kuma Kylain Mbappe na Ral Madrid kan gaba mai 11 a raga, sai Harry Kane na Bayern Munich mai bakwai.

18. 28 Janairu 2026Ƙungiya shida daga Ingila za su buga Champions League ranar Laraba, Champions League

    

    Asalin hoton, Getty Images

    Za a buga wasan karshe a cikin rukuni a Champions League ranar Laraba, inda za a yi karawa 18 tsakanin ƙungiya 36.

    Tuni kuma shida daga ciki suka samu matakin zuwa zagaye na biyu, yayin da za a fayyace makomar saura 30 a babbar gasar tamaula ta zakarun Turai ta kakar nan.

    Ƙungiyoyi shida daga Ingila na fatan zuwa zagayen gaba kai tsaye wato cikin ƴan takwas kenan.

    Tuni Arsenal ta kai zagayen gaba, wadda ke jan ragamar teburin Champions League da kuma Bayern Munich ta biyu ba sa fuskantar wata matasala kawo yanzu, amma sauran na fatan yin abin kirki a ranar ta Laraba, domin ci gaba da fafatawa a wasannin bana.

    Sauran ƙungiyoyin Ingila da ke cikin ƴan takwas a yanzu haka har da Liverpool da Tottenham da Newcastle United da kuma Chelsea, kuma dukkansu na fatan kaucewa buga wasannin cike gurbi.

    Manchester City tana ta 11 a kan teburi, kenan matakin ƴan cike gurbi, kafin wasan karshe ranar Laraba.

    A tarihin wannan gasar ba a taɓa samun ƙungiya shida daga kasa ɗaya ba a gasar Champions League, sannan ace sun kai zagaye na biyu kai tsaye ba a tarihi.

19. 27 Janairu 2026Guardiola ya jaddada sukar da ya yi wa Hallam raflin Premier, Premier League

    

    Asalin hoton, Getty Images

    Pep Guardiola ya sake jaddada sukar da ya yi wa alkalin wasa Farai Hallam bayan wasan da Manchester City ta buga da Wolves a karshen makon da ya gabata a Premier League.

    Guardiola ya zargi Hallam, wanda ya busa wasan farko a babbar gasar tamaula ta Ingila a ranar, da kokarin nuna kansa, bayan da ya tsaya kai da fata kan hukuncinsa na kin bai wa Manchester City bugun fanareti.

    An ba Hallam shawarar ya je ya duba VAR ko dan wasan Wolves, Yerson Mosquera ya taba kwallo da hannu, amma sai yayi kememe kuma bai sauya hukuncin da ya yanke tun farko ba.

20. 27 Janairu 2026, Daga Jarida

    

    Asalin hoton, Getty Images

    Nottingham Forest ta taya ɗanwasan gaba na Crystal Palace Jean-Philippe Mateta kan fam miliyan 35, amma Eagles na son fam miliyan 40 kuma ba za ta bar ɗanwasan na Faransa tafiya ba har sai an lale mata kuɗin. (Athletic - subscription required)

    Ɗanwasan gaba na Everton da Guinea-Bissau Beto, mai shekara 27, na cikin zaɓin da Juventus ke da shi yayin da take lalaben ɗanwasan gaba kafin rufe kasuwar cinikin ƴanwasa. (Gazzetta dello Sport - in Italian)

    Juventus kuma na son ɗanwasan gaba na Liverpool da Italiya Federico Chiesa, mai shekara 28, da kuma ɗanwasan gaba Joshua Zirkzee, da ke taka leda a Manchester United. (Gazzetta dello Sport - in Italian)