DR Congo: Abantu hafi 200 bapfiriye mu mpanuka ebyiri z'ubwato

Inyandiko gusa
Ubwato bw'ibiti butwaye abantu n'ibintu. Harimo abitwikiriye imitaka, buriho n'imizigo irimo n'amajerikani. Hejuru y'ubwato hariho ibendera rya Repubulika ya Demokarasi ya Congo

Ahavuye isanamu, AFP via Getty Images

Insiguro y'isanamu, Amato amaze igihe arushaho kurohama mu ruzi rwa Congo (ifoto mbarankuru yo mu bubiko)
    • Umwanditsi, Shingai Nyoka
    • Igikorwa, BBC News
  • Igihe co gusoma: iminota 2

Abantu hafi 200 bapfuye naho abandi babarirwa muri za mirongo baracyaburiwe irengero nyuma y'impanuka ebyiri zitandukanye z'ubwato mu majyaruguru ashyira uburengerazuba bwa Repubulika ya Demokarasi ya Congo.

Umuryango utari uwa leta (société civile) wo muri ako gace washinje leta kuba nyirabayazana wabyo ndetse uvuga ko umubare w'abapfuye ari munini cyane kuruta uwo.

Nta cyo leta ya DRC yahise itangaza ku mugaragaro.

Amatsinda y'abakora ubutabazi aracyarimo gushakisha ababuriwe irengero nyuma y'izo mpanuka zapfiriyemo abantu mu ntara ya Équateur muri iki cyumweru.

Abantu hafi 150 baracyaburiwe irengero nyuma yuko inkongi y'umuriro yadutse mu bwato mu ijoro ryo ku wa kane. Bwahise bubirindukira mu ruzi rwa Congo.

Ku wa gatatu, indi mpanuka y'ubwato yishe abagenzi barenga 80, biganjemo abanyeshuri. Amakuru yo mu bitangazamakuru avuga ko ubwo bwato bwari butwaye abagenzi benshi cyane.

Amato amaze igihe arushaho kurohama muri DR Congo. Mu gihe gutwara abantu n'ibintu mu nzira y'uruzi ari uburyo bw'ingenzi bwo gukora ingendo hagati y'ibyaro binyuranye byo mu duce tw'amashyamba y'inzitane, ubwo buryo bunagenzurwa nabi ndetse ntiburimo umutekano.