Greeg Schoof Umunyamerika ufite Radio yafunzwe mu Rwanda na we yafunzwe

Inyandiko gusa
Abapolisi bambika amapingu Bwana Schoof bamusanze aho yari agiye gukorera ikiganiro n'abanyamakuru

Ahavuye isanamu, BBC GAHUZA

Insiguro y'isanamu, Abapolisi bambika amapingu Bwana Schoof bamusanze aho yari agiye gukorera ikiganiro n'abanyamakuru

Jean Claude Mwambutsa /BBC Gahuzamiryango i Kigali

Pastor Greeg Schoof, umuyobozi wa Radio Amazing Grace (Radio Ubuntu Butangaje) yafunzwe mu Rwanda, muri iki gitondo na we yatawe muri yombi na polisi i Kigali.

Bwana Schoof - ni Umunyamerika - yari agiye gukoresha ikiganiro n'abanyamakuru cyahise kiburizwamo, mu kumufata uyu mugabo yumvikanye avuga ko atazi impamvu afashwe.

Umuvugiz wa polisi y'u Rwanda yatangarije AFP ko uyu mugabo yafashwe ashinjwa "gukora inama n'abanyamakuru ahantu hatemewe kandi hanze".

Bwana Schoof ahura n'abanyamakuru yari afite urupapuro rumusaba kwitaba urwego rushinzwe kugenza ibyaha mu Rwanda uyu munsi.

Aho ikiganiro n'abanyamakuru cyari kigiye kubera we n'abanyamakuru bahageze ba nyiraho banga ko binjiramo ku mpamvu zitasobanuwe, nk'uko umunyamakuru wa BBC wari uhari abivuga.

Mu gihe yarimo abwira abanyamakuru ko yangiwe kwinjira aho yari yateguye guhurira n'abanyamakuru nibwo polisi yahise iza imuta muri yombi yirukana abanyamakuru.

Bwana Schoof amaze igihe mu rubanza na leta y'u Rwanda yafunze Radio ye iregwa gukora ibiganiro birimo ivangura no gupfobya abagore.

Skip Ibisomwa cane and continue reading
Ibisomwa cane

End of Ibisomwa cane

Mu kwezi kwa gatanu Bwana Schoof yatsinzwe ikirego nyuma yo kujurira mu rukiko rukuru ku ifungwa rya Radio ye.

Icyo gihe yabwiye abanyamakuru ko atanyuzwe n'umwanzuro w'urukiko, yongeraho ko "ubwisanzure bwo gutanga ibitekerezo bukwiye kurindwa nk'uko bikubiye mu Itegeko Nshinga ry'u Rwanda".

Yerekaga abanyamakuru ko yahamagajwe na RIB ariko afite uburenganzira bwo gukoresha ikiganiro n'abanyamakuru

Ahavuye isanamu, BBC GAHUZA

Insiguro y'isanamu, Yerekaga abanyamakuru ko yahamagajwe na RIB ariko afite uburenganzira bwo gukoresha ikiganiro n'abanyamakuru

Mu itangazo yahaye abanyamakuru mbere y'uko afatwa uyu munsi ryanditsemo ko yajuririye urukiko rw'ubujurire ariko hashize amezi atatu adasubizwa.

Yanditse ko agiye kuva mu Rwanda ariko "ashaka gusiga asobanuye neza ibyo bakorewe".

Muri iri tangazo yasinyeho asobanura ko urwego rw'abanyamakuru (Rwanda Media Commission), urwego rugenzura imirimo imwe n'imwe mu Rwada (RURA) n'umukozi warwo witwa Tony Kuramba babahohoteye.

Mu itangazo urwego rw'abanyamakuru (RMC) rwasohoye nyuma yaho ku itariki ya 8 y'uku kwezi kwa cumi, rwavuze ko ibikubiye muri iyo nyandiko Bwana Schoof yagejeje ku banyamakuru "byose birimo kuyobya kandi nta shingiro bifite".

RMC ivuga ko "ibyakozwe byose kuri iyo radio byatewe n'uruhererekane rw'ibikorwa [by'iyo radio] byo kutubahiriza amahame y'umwuga w'itangazamakuru".

Uyu muvugabutumwa yanditse ko yibaza "niba guverinoma y'u Rwanda ishaka kujyana Abanyarwanda mu muriro".

Ati: "Radio ya gikiristu yafunzwe mu buryo bunyuranye n'amategeko, insengero 7000 zarafunzwe,... abana mu mashuri bashishikarizwa gukoresha udukingirizo..."

We avuga ko ibi bidakwiriye ndetse akavuga ko abantu bose bakwiriye gusengera u Rwanda.

Kumubuza gukoresha ikiganiro n'abanyamakuru yavuze ko bibangamiye ubwisanzure buvugwa n'Itegeko Nshinga mu Rwanda

Ahavuye isanamu, BBC GAHUZA

Insiguro y'isanamu, Kumubuza gukoresha ikiganiro n'abanyamakuru yavuze ko binyuranye n'ubwisanzure buvugwa n'Itegeko Nshinga mu Rwanda

Asoza iyi nyandiko ye ati: "Sinaje hano kurwanya leta, naje kuvuga ubutumwa, sinitaye kuri politiki, sinitaye kumenya ngo perezida ni inde cyangwa ishyaka riri ku butegetsi. Ariko iyi guverinoma yafashe inzira zirwanya Imana mu mikorere yayo".

Ubutegetsi mu Rwanda ntacyo buratangaza ku bivugwa n'uyu Munyamerika.

Iyi nkuru yavuguruwe saa saba n'iminota 59 z'amanywa (ku isaha y'i Kigali) ku itariki ya 8 y'ukwa cumi, hongerwamo bimwe mu byatangajwe n'urwego rw'abanyamakuru rwa RMC