Imvo n'Imvano: Senkeri Salathiel arishura ku bibazo by'abatwandikiye

Mwaramukanye amahoro mwese muteze amatwi Imvo n'Imvano yo kuri uyu wa gatandatu tariki 12 z'ukwa 7 mu 2025. Nyuma yo guhitisha ikiganiro kuwa gatandatu tariki 28 z'ukwezi gushize kwa 6, aho mugenzi wanjye Yves Bucyana yagiye mu Murenge wa Mudende mu karere ka Rubavu akaganira na Bwana Senkeri Salathiel wahoze ari umwe mu barindaga umutekano wa Perezida Habyarimana Juvenal waguye mu ndege mu mwaka 1994, abantu benshi baratwandikiye badusaba kubahuza na Senkeli Salathiel.

Senkeri Salathiel w'imyaka 69, akaba yarafite ipete rya Sergeant, yavuze muri icyo kiganiro ko ku itariki 6 z'ukwezi kwa 4 mu 1994 ubwo yari arinze indege Falcon 50 ya Perezida Habyarimana yari ku kibuga cy'indege I Dar Salaam muri Tanzania yamenye amakuru y'uko iyo ndege iza kuraswa nawe ayamenyesha ababishinzwe ariko ngo Habyarimana ntiyabiha agaciro- Ayo makuru ngo bayahawe n'abarindaga umukuru w'icyahoze ari Zaire, Mobutu Sese Seku basanze kuri icyo kibuga cy'indege cy'i Dar el Salaam.

Avuga kandi ko abapilote b'abafaransa bari batwaye iyo ndege nabo bamenye ayo makuru y'ihanurwa ry'indege, basabye ko indege yagwa ku kibuga cy'indege I Goma muri Zaire y'icyo gihe (ubu ni repubulika ya demokrasi ya Congo) nabyo ntibyemerwa-

Senkeri washoje akazi ka Gisirikare ngo afite ipeti rya Sergeant avuga ko nawe kimwe n'abandi barindaga Habyarimana batagiye muri iyo ndege kuko Habyarimana yemereye gutwara Perezida w'u Burundi Cyprien Ntaryamira n'abari bamuherekeje nyuma y'aho indege yabo igiriye ikibazo ku kibuga cy'indege cy'I Dar es Salam muri Tanzania-

Mu kwezi kwa kabiri umwaka wa 2022 Urukiko rusesa imanza mu Bufaransa rwategetse ko dosiye y'iperereza ku iraswa ry'indege y'uwari Perezida w'u Rwanda Juvenal Habyarimana ifungwa.

Umwanzuro w'urwo rukiko - rwa nyuma rwo kujuririramo imanza mu Bufaransa – washyize iherezo ku iperereza ku bagize uruhare mu iraswa ry'iriya ndege mu nkiko z'Ubufaransa.

Uyu munsi rero turaha umwanya abatwandikiye bifuza kumubaza ibibazo.

Ikiganiro mwagiteguriwe kandi murakigezwaho na Felin Gakwaya