Imvo n'Imvano ku iteka rigenga ibimina mu Rwanda

Imvo n'Imvano yo kuri uyu tariki ya 15 z'ukwezi kwa 3 umwaka wa 2025munsi turaganira ku iteka rigenga ibimina mu Rwanda, ni iteka ryashyizweho umwaka ushize na Ministeri y'Imari n'Igenamigambi.

Leta isobanura ko ikimina ari "uburyo abantu bagize itsinda batanga amafaranga bagamije kwizigamira no kugurizanya hagati yabo mu buryo babyumvikanyeho.

Nta mubare ntakuka uzwi w'ibimina biri mu Rwanda ariko ni uburyo bumenyerewe – bumaze imyaka myinshi – bwo kunganirana – biciye mu kwizigama – mu mibereho mu nzego nyinshi z'abaturage.

Ubushakashatsi ku mibereho y'ingo mu Rwanda, ari na bwo buheruka gusohoka, bwo mu kwezi kwa 3 umwaka wa 2021, bugaragaza ko ingo 53,4% zari zifite inguzanyo yo mu kimina.

Hari ababona ari uburyo bwiza bwo guhashya imikorere mibi hamwe na hamwe, mu gihe abandi baribona nk'uburyo bwo kwinjirira ubwisanzure bwabo.

Leta ivuga ko itagamije kubangamira ubwisanzure, ko ahubwo ishaka kunoza imikorere y'ibimina, harimo no kwirinda ubwambuzi bujya bubaho kuri bamwe mu banyamuryango.

Abasesenguzi mu bukungu bavuga ko iryo teka rije guha umurongo uko ibimina byari bisanzwe bikora-turabumva muri iki kiganiro.

Hari icyoba cy'uko kubera iryo teka, ibimina bishobora gusoreshwa, ariko abanyamategeko bakavuga ko ntaho iteka riteganya iby'umusoro ku bimina.

Iki kiganiro mwagiteguriwe na Yves Bucyana.