Tiraamp osoo Iraan muddaa jiranii EU'n Eegdota Iraan shororkeessaa jedhe

Haguuggii Tamsaasa Kallattii

1. 29 Amajjii 2026Tiraamp amma Iraan irraa maal barbaada?

   Maxxansa YouTube irra dabri

   Qabiyyee Google YouTube hayyamtaa?

   Barreeffamni kun qabiyyee [social_media-site]n dhiyaatan qaba. Tarii 'cookies' fi teknolojiiwwan biraa fayyadamuu waan danda'aniif, osoo tokkoonsaa gadi hin buufamiin dura hayyama keessan gaafanna. Osoo hin simatin dura Google YouTubeimaammata cookies fi imaammata mateenyaa dubbisuu barbaadda ta'a. Qabiyyee kana ilaaluuf 'waliigaluun itti fufi' filadhu.

   Accept and continue

   Hubachiisa: Qabiyyee marsariitiiwwan alaatiif BBCn itti gaafatamummaa hin fudhatu. YouTube beeksisa qabaachuu danda'a.

   Xumura maxxansa YouTube

   Waxabajjii darbe wayita US waraana Israa’elii fi Iraanitti kallattiin dabalamuun buufataalee niwukilaraa Iraan haleeltu qoccolloon US fi Iraan achumarratti dhaabbata jedhamee tilmaamee ture.

   Pirezidantiin US Doonaald Tiraamp buufataalee Niwukilaraa Iraan guutummaatti barbadeessuu ibsuun kanaan boda yaaddoon Niwukilaraa gama Iraanii akka hin dhufne ibsee ture.

   Amma garuu Tiraamp akka haaraatti deebi’ee Iraanitti dhaadataa jira. Doonii waraanaa meeshaalee waraanaa hedduu fe’e garas erguus ibseera. Tiraamp amma Iraan irraa maal barbaada?

2. 29 Amajjii 2026Gamtaan Awurooppaa Eegdota Warraaqsaa Iraan tarree shororkeessitootaatti dabale

   

   Madda suuraa, ABEDIN TAHERKENAREH/EPA-EFE/REX/Shutterstock

   Gamtaan Awurooppaa Humna Eegdota Warraaqsaa Islaamaa Iraan (IRGC) tarree shororkeessitootaa jedhuunitti dabale.

   Gamtichi kana kan murteesse torbanota dhiyoo Teehraan mormii uummataarratti tarkaanfii hamaa fudhatte hordofeeti.

   Dippiloomaatiin gameessi naannichaa Kajaa Kalaas Gamtaan Awurooppaa 'tarkaanfii ijoo' fudhate, sababni isaas "ukkaamsaaf deebii kennuun barbaachisaa dha" jette.

   Tarkaanfichi Eegdota Warraaqsaa Islaamaa Iraan kan humna waraanaa, diinagdee, fi siyaasaa Iraan ta'e tarree shororkeessitootaa jihaadistii akka Al-Qaayidaa fi ISIS dabala jette.

   Gareeleen mirga namoomaa akka tilmaamanitti kumaatamni mormii uummataa Iraanirratti IRGC dabalatee humnoota nageenyaa Muddee fi Amajjii keessa ajjeefamanii jiru.

   Dhaabbileen Gamtaa Awurooppaatiin tarree shororkeessitootaatti ramadaman qoqqobbii akka uggura imalaa, uggura qabeenyaatu eeggata. Kun neetoworkii deeggarsaa isaanii hongeessufi.

   Eegdoonni Warraaqsa Islaamummaa Iraan abdattu eenyu, hangam cimaadha?

3. 29 Amajjii 2026Leenjisaan Seenegaal akkasumas federeeshiniin isaanii adabame

   

   Madda suuraa, Getty Images

   Leenjisaan Garee Kubbaa Miilaa Seenegaal Peep Tiyaawu jeequmsa tapha xumuraa Waancaa Afrikaa 2026 Morookootti mudate hordofee taphoota shan irraa uggaraman.

   Konfedereeshiniin Kubbaa Miilaa Afrikaa (CAF) Tiyaawu dolaara 100,000 akka adabamus murteesse.

   CAF, leenjisicha 'naamusa ispoortii hin malle mul'isuu' fi 'tapha jeequu' kan jedhuun adabbii kana irratti murteesse.

   Tapha Waancaa Afrikaa darbe hordofee adabbiiwwan walumatti dolaara miliyoona gahan keessaa kan leenjisaa kanaa isa tokko jedhameera.

   Tapha xumuraa Waancaa Afrikaa Morookoo Raabaatitti Amajjii 18, 2026 Senegaal 1-0 Morookoo injifatterratti yeroo taphattoonni rukuttaa adabbii Morookoof kennetti gareen Senegaal mormuun dirree gad lakkisanii bahanii turan.

   Taphichis daqiiqaawwan 17'f adda citee ture. Taphataa Segaal Saadiyoo Maanee ture taphattoota Seenegaal gara dirree akka deebi'an kan waame.

   Gareen Seenegaal taphattoota isaa Ilimaan Daayee fi Saar naamusa ispoortii hin malle daanyaatti agarsiisaniif taphoota lama akka hin taphanne dhiyeesse.

   Federeeshiniin Kubbaa Miilaa Seenegaal immoo dolaara 615,000 adabame.

   Morookoon gama isheetiin Ismaa'el Saayibarii taphoota sadii fi dolaara 100,000 akka adabamu dabarsitee kennite.

   Ittisaa garee Morookoo Hakimiin taphoota lamaa irraa akka ugguramuu itti murtaaye.

   Uggurri leenjisaa Seenegaal Tiyaawu irra kaayame taphoota CAF qofarratti kan raawwatu dha.

   Qophii tapha Waancaa addunyaa kan US, Kaanaadaa fi Meeksikoon qopheessan irratti dhiibbaa hin qabaatu.

4. 29 Amajjii 2026Chaayinaan miseensota maafiyaa Maaynaamar 11du'aan adabde

   

   Madda suuraa, CCTV

   Chaayinaan miseensota maatii maafiyaa hamoo 11 wiirtuun isaanii daangaa kaaba baha Maaynaamar ta'ee fi yakka waliin dhawuu dalagaa turan du'aan adabuu miidiyaan mootummaa gabaase.

   Maatiin maafiyaa Miingi yakkoota ajjeechaa, seer-malee nama hidhuu, waliin dhawuu, fi qumaaran beekkaman manni murtii Chaayinaa kan bulchiinsa Zeejiyaangi du'a kan itti murteesse Fulbaana darbe ture.

   Warri Miingi gosoota Maaynaamar keessaa tokko yoo ta'an,magaalaa Laawukaa'ing bulchani. Magaalaa boodatti haftuu turte tana immoo tottolchanii magaalaa tajaajila ibsaa qabdu, maallaqni hedduun keessa socho'uu, qaalii taateefi maandhee qumaaraa godhanii turan.

   Impaayerri waliin dhawuu isaanii tun kan jalaa kufe bara 2023 wayita hidhamanii gareen milishoota sabaaf qabsaa'anii dabarsanii Chaayinaatt isaan kennan ture. Gareen milishootaa wayita sanatti magaalaa isaanii Laawukaa'ing to'atanii turan.

   Garee 'Maafiyaa' kumaatamaan hanna interneetii irratti bobba'aniif tarkaanfii mootummaa

5. 29 Amajjii 2026Lammiilleen UK Viizaa malee Chaayinaa dhaquu danda'u - MM UK Istaarmar

   

   Madda suuraa, Reutres

   Ministirri Muummee UK Kiir Istaarmar daawwannaa hojiif Chaayinaa jiru.

   Lammiileen UK yeroo ji'a tokko gadiitiif viizaa malee Chaayinaa deemuu akka danda'an Beejingi kan jiran Istaarmar himan.

   Tarkaanfiin UK biyyoota Faransaay, Jarmanii, Xaaliyaanii, Awustiraaliyaa fi Jaappaan tokko ta'uu himan Istaarmar. "Biizinasoonni keenya gabaa Chaayinaa ejjechuuf watwaataa turan turan" jedhan.

   Kaampaaniin guddichi oomisha qorichaa AstraZeneca, muummeen isaa UK ta'e, Chaayinaatti invastimantii dolaara biliyoona kudha shanii akka eegalu beeksise.

   Marii MM Chaayinaa Shii Jiinpiing waliin tolchan booda MM UK Kiir Istaarmar hariiroon UK fi Chaayinaa "gaarii fi gulantaa olaanaarra" jira jedhan.

   Shii Jiinpiing gama isaaniin hariiroon biyyoota lamaanii takka qorree takka ho'us garuu waliin mariin hafuun irra hin jiraatu jedhan. Mariin isaaniirraayis bu'aalee ijoon argamuu dubbatan.

   Biyyoonni lamaan dhimmoota fuulduraaf waliin hojjechuuf jiran irratti waliigalteewwan 10 mallatteessanii jiru.

6. 29 Amajjii 2026Akkam ooltan!

   Tamsaasi keenya kallattii BBC Afaan Oromoo amma eegaleera.

   Odeessawwan biyya keessaafi alaa faana dhoofnee isin biraan geenya.

   Nu waliin turaa!

7. 28 Amajjii 2026Humnoonni federaalaa lama Aleeks Pireetiitti dhukaasuu qorannoon dursaa akeeke

   

   Madda suuraa, Family handout

   Eegdonni gumrukaa fi daangaa US lama Sanbata duraa darbe Aleeksi Pireetiitti meeshaa dhukaasuu gabaasni gara Kongiresiitti ergame ni mul'isa.

   Gabaasni kun, akka ejensii eegdota gumrukaa fi daangaa jedhutti "qorannoo duraa" yoo ta'u. ejensicha jalatti waajjira qorannoofi gaafatamummaa ogummaa jedhamuun gidhame.

   Taatee kanaan wal qabsiisee ibsi qondaalota Miniyaapolisii fi bulchiinsa Tiraampi kan wal faallessu ture.

   Gabaasni kun akka mul'isetti gareen immigireeshinii oppireeshinii gaggeessaa yeroo turetti dubartoonni lama akka isaan achii sokkan itti himaa turan.

   Dubartiin takka gara Pireetii fiiguun akka humnoonni immigireeshinii "gara ishee fi Pireetii socho'anii karaarraa isaan baasaniif kakaasaa turte."

8. 28 Amajjii 2026Ameerikaan Humna Qilleensaa Itoophiyaa gargaartee?

   

   Madda suuraa, FDRE Defense Force

   Kabaja waggaa 90ffaa Humna Qilleensaa Itoophiyaa irratti Ministir Di'eetaan Ministira Dhimma Alaa US Kiristoofar Laandaaw argamaniiru.

   Isaan waliinis Ajajaan Waraana Ameerikaa Damee Afrikaa (AFRICOM) Jeneraal Daagvin Andarsan dhufanii turan.

   Janaraalli kuni yeroo Itoophiyaa daawwatan Ameerikaan humna qilleensaa Itophiyaa hundeessuu gargaaruu himan.

   Bara 1935 yeroo Itoophiyaan dhiibbaa jala turtetti, Koloneel Joon Roobinsan dhufee akka Humna Qilleensaa ijaaruuf Mootii Haayilesillaaseerraa waamichi isaan qaqqabeef deebii kennan jedhan.

   ''Wal-ta'iinsi isaa wal-ta'iinsa waraanaa qofa osoo hin taane, Daandii Qilleensa Itoophiyaas akka ijaaramu gargaarera - Daandii Qilleensaa guddaa Afrikaa,'' jechuun ibsan.

   ''Joon Roobinsan qaama leegasii sanaa ta'uu isaatti baay'een gammada. Xayyaarri Booying Dream Liner tokko maqaasaaniin moggaafameera.

   ''Daandiin Qilleensa Itoophiyaa maqaa Joon Roobinsaniin moggaasuun isaa nuuf kabaja guddaadha,'' jechuunis himan.

   Janaraalli Ameerikaa kuni hariiroon Itoophiyaafi Ameerikaa humna waraanaarrayyu kan darbe jechuun dubbatan.

   Humni Qilleensaa Itoophiyaa addunyaarraa sadarkaa kamirra jira, xiyyaarota akkamiifaa qaba?

9. 28 Amajjii 2026Mootummaan Ikuwaadoor humnoonni ICE qontsilaa isaa Miniyaappoolis seenu balaaleffate

   

   Madda suuraa, Photo by Jim Watson - Pool/Getty Images

   Mootummaan Ikuwaadoor humnoonni Immigireeshinii qoonsilaa isaa Ameerikaa Miniyaapoolis jiru seenuuf yaalii gochuu balaaleffate.

   Humnoonni kunneen battala yaalii kana godhanitti qondaalota qoonsilichaa, hojjettoota qoonsilaa lammiilee Ikuwaadoor tiksuuf gaafatamummaa qabaniin, ittifamuu hime ministeerri dhimma alaa Ikuwaadoor ibsa kaleessa baasen.

   Mootummaan Ikuwaador, kan pireezdaantiin isaa michuu Tiraamp ta'e, taatee kana mootummaaf gabaaseera.

   Akkaataa Konveenshinii Veenaa 1963, dhimmoota Qoonsilaa jalatti tumameen, waajjirri qoonsilaa biyya tokkoo "hin sarbamu" aangawoonni bakka qoonsilaa sanaa heyyama hogganaa qoonsilaa sanaa malees "seenuu hin danda'an".

   Viidiyoon miidiyaan Ikuwaadoor qoode, kan BBC'n adda hin baafatin, akka agarsiisutti, qondaalli qoonsilaa gara seensaa fiigaa yoo humnoota immigireeshiitiin, "Kun qoonsilaa dha, seenuun isiniif hin heyyamamu" jedhuun ni mul'ata.

   qondaalli immigireeshiniimmoo, "yoo na tuqxe sin qabeen deema" jehaan.

   Qondaalli qoonsilaa ammas, "as seenuu hin dandeessu, kun qoonsilaa dha, kun waajjira mootummaa biyya biraa ti", jedhaan balbala cufuun dura.

10. 28 Amajjii 2026Konkolaachisaan Finfinneetti birrii 100,000 maaliif adabame?

    

    Madda suuraa, EBC

    Magaalaa Finfinneetti konkolaachisaa daandii biskileetiifi irra fiiguuf qophaa'e irratti konkolaataa oofe adabame.

    Konkolaachisaan daandiirra miidhaa dhaqqabsiise jedheera Abbaan Taayitaa Dambii Eegsisuu Magaalaa Finfinnee.

    Badiin kuni galgala sa'aatii 12:00'tti paarkii Araadaa naannawa Raas Mokonnin jiru keessa mudate jedhame.

    Adabbiin kunis badii ''bu'uraalee misoomaa irratti dhaqqabsiiseefi'' jedheera gabaasi EBX.

    Kana durallee adabbiin wal fakkaataa dhagahamee beeka.

    Misooma Koridarii magaalaa Finfinnee keessatti hojjetaman magaalaa Finfinnee bareechaniiru.

    Ta'us, dursi kan kennamuuf qabu waan biraati jechuun hojii kana kan qeeqanis jiru.

11. 28 Amajjii 2026Hawaasni Oromoo Waataa Keeniyaa keessa jiraatu eenyu?

    Maxxansa YouTube irra dabri

    Qabiyyee Google YouTube hayyamtaa?

    Barreeffamni kun qabiyyee [social_media-site]n dhiyaatan qaba. Tarii 'cookies' fi teknolojiiwwan biraa fayyadamuu waan danda'aniif, osoo tokkoonsaa gadi hin buufamiin dura hayyama keessan gaafanna. Osoo hin simatin dura Google YouTubeimaammata cookies fi imaammata mateenyaa dubbisuu barbaadda ta'a. Qabiyyee kana ilaaluuf 'waliigaluun itti fufi' filadhu.

    Accept and continue

    Hubachiisa: Qabiyyee marsariitiiwwan alaatiif BBCn itti gaafatamummaa hin fudhatu. YouTube beeksisa qabaachuu danda'a.

    Xumura maxxansa YouTube

    Argaa-dhageettiin jaarrolee Waataa, gosi kun Itoophiyaarraa kahuun jaarraa hedduun dura gara Keeniyaatti as cehuu himu.

    Kanneen Keeniyaa keessa jiran bakkaa bakkatti faffaca’anii waan jiraniif, lakkoofsi isaanii hangana jedhanii ibsuun nama rakkisa.

12. 28 Amajjii 2026Tiraamp kantiibaan Miniyaappolis 'ibiddaan taphataa jira' jedhan, kantiibaan deebii kennan

    

    Madda suuraa, Reuters

    Pirezidantiin Ameerikaa Donaald Tiraamp kantiibaan magaalaa Miniyaappolis ''ibiddaan taphataa jira'' jechuun dubbatan.

    Aangawoonni lamaan keessumaa Tiraamp humnoota nageenyaa immigireeshinii gara bulchiinsa Minesotaatti bobbaasuu isaaniin dhibdee qabu.

    Humnoota kanaanis lammiileen lama Minesotaatti ajjeefamaniiru.

    Kantiibaan Miniyaappolis Jaakob Fireey magaalli isaan bulchan ''seera immigireeshinii federaalaa hojiirra akka hin olchine'' dubbatan.

    Yeroo kana ture Tiraamp 'ibiddaan taphataa jirta' kan jedhaniin.

    Kanaaf deebii kan kennan kantiibaan Miniyaappolis ''hojiin keenya nageenya ummataa tiksuudha, seera immigireeshinii tiksuu miti,'' jedhan.

13. 28 Amajjii 2026Ilhaan 'tarii ofirratti biifte ta'a' jechuun Tiraamp itti qoosan

    

    Madda suuraa, Getty Images

    Miseensa Kongirasii Ameerikaa kan taate Ilhaan Omaar irratti dhangala'aan waliin isaa hin beekamne dhangala'ee ture.

    Dhimma kana kan gaafataman Pirezidant Tiraamp ''Tarii ofirratti biifte ta'a,'' jechuu ABC gabaaseera.

    Tiraamp fi Ilihaan kana dura dhimmoota garagaraarratti wal dhabaniiru.

    Tiraampiis irra deddeebiin ishee qeequ, akka ishee hin jaalannes dubbatu.

    Nami Omaaritti dhangala'aa facaase to'annoo jala ooleera, himannaanis irratti banamuu poolisiin ibseera.

    Ilihaan eega taateen kuni ishee mudate booda ''fayyaan qaba, namni dubbii na barbaadu kuni hojiikoo hojjechuurra na dhaabuu hin danda'u,'' jechuun X gubbaa katabde.

    Miseensi Kongireesii Ilhaan Omaar osoo haasaa taasiftuu dhagala'aa waliinsaa hin beekamneen haleelamte

14. 28 Amajjii 2026'Yeroon Iraan dhumataa jira' jechuun Tiraamp akeekkachiisan

    

    Madda suuraa, Getty Images

    Pirezidantiin Ameerikaa Donaald Tiraamp Iraan sagantaan nukilaraa isheerratti mari'achuuf ''yeroon [jalaa] dhumataa jira'' jechuun akeekkachiisan.

    Kunis, eega waraanni Ameerikaa naannawa galfii yeroo sochii cimsetti dhagahame.

    Dooniin waraanaa Ameerikaa ''Armaadaa' jedhamu ''saffisaan, humna guddaan, kaka'umsaafi galma qabatee'' imalaa jira jechuun Truth Social irra kataban.

    Kanaaf deebii kan kennan UN'tti ergamaan Iraan ''Teehiraan marii kabajaafi fedhii waliinii irratti hundaa'ef qophaa'uu'' dubbatan.

    Yoo dhiibamte garuu ''haal akkana dura hin turreen'' deebii akka kennitu dubbatan.

    Tiraamp kana dura mormitoota Iraan mormii ummataa keessa qooda fudhatan akka ''baraaran'' dubbatanii turan.

    Akka gartuun mirga namoomaa US buufate jedhutti, namoonni 6,000 ta'an Iraan keessa mormiirratti ajjeefamuu mirkaneessuu dubbate.

    Mormiin Iraan jalqaba qaala'insa jireenyaan eegale boodarra bulchiinsa mormuutti ce'e.

    Tiraamp Iraan ''saffisaan'' gara mariitti akka dhuftu dubbatan. ''Meeshaa Niwukilaraa hin barbaachisu'' jechuunis himan.

    Iraan immoo sagantaan niwukilaraa karaa nagaaf akka itti dhimma baatu dubbatti.

    Muddamni Iraan maaliif biyyoota Arabaa akkaan yaaddesse?

15. 28 Amajjii 2026MM Abiy aangawoota US waliin marii 'walkabajuurratti' hundaa'e taasisan

    

    Madda suuraa, Abiy Ahmed/ Facebook

    Ministirri Muummee Itoophiyaa Abiy Ahimad Ministir Di'eetaa Ministeera Dhimma Alaa US Kiristoofar Laandaawu waliin waajjira isaanitti mari'atan.

    Aangawaa US waliin Ajajaan waraana Ameerikaa Damee Afrikaa (AFRICOM) waliin turaniiru.

    Qondaalonni US kuni guyyaa kaleessaa Buufata Humna Qilleensaa Itoophiyaatti argamuun kabaja hundeeffama waggaa 90ffaa dhaabbatichaarratti hirmaataniiru.

    MM Abiy marii isaan waliin taasisan booda ergaa miidiyaa hawaasummaa isaaniirratti katabaniin akkana jedhan:

    ''Marii gaariifi walhubannaa irratti hundaa'e, kan walta'insaafi walkabajuu ittifufiinsa qabu irratti xiyyeeffate gochuu keenyaaf galatan qaba.''

    Aangawaan olaanaa US kuni xumura torban darbe daawwannaa isaanii Afrikaa Masriirraa eegalan.

    Itoophiyaattis dhimma "nageenyaafi tasgabbii naannoo" irratti MM Abiy waliin akka mari'atan Ministeerri Dhimma Alaa US ibsa kana dura baaseen beeksiseera.

    Itti aananiis gara Keeniyaafi Jibuutii imalu.

    Daawwannaan isaanii kuni yeroo Pirezidant Tiraamp hidha Abbayyaarratti irra deddeebiin haasaa gochaa jiran mudate.

16. 28 Amajjii 2026Namni Ilhaan Omaaritti wanta waliin isaa hin beekamne facaase haleellaa raawwachuun himatame

    

    Madda suuraa, AFP via Getty Images

    Bakka-buutuu Kongiresii Kutaa Bulchiinsa Minisootaa kan taate Ilhaan Omaaritti dhangala'aa waliin isaa hin beekamne namni itti facaase to'atamuu qondaalonni poolisii naannoo beeksisaniiru.

    Namni kun gocha kana kan raawwate yeroo Ilhaan Omaar galma magaalichaa keessatti haasaa taasisaa jirtutti ture.

    Namni kun tasa osoo hin eegamiin dhangala'aa sirinjii marfee/lilmeetti qabatee ture itti biifeera/facaaseera.

    Gabaasaan BBC bakka sana ture, dhangala'aan sun waan keemikaala fakkaatuufi foolii funyaan nama waraanu akka qabu ibseera.

    Ragaan poolisiin ifa godhe akka agarsiisutti, namni Antoonii Jams Kaazmiir Kaazmiirchaak jedhame kun umuriin isaa waggaa 55.

    Namni kun battalumatti to'annoo jala oolfamee poolisiin bakka taateen kun mudatetti qorannoo foorensikii gaggeessa jiraachuu himeera.

    Namni kun yakka namarratti haleellaa raawwachuu sadarkaa sadaffaan himatamuu poolisiin ifa godheera.

17. 28 Amajjii 2026Ruwaandaan waliigaltee godaantotaa haqameen wal-qabatee UK irratti himannaa bante

    

    Madda suuraa, Getty Images

    Ruwaandaan kooluugaltooota UK jiran simattee tursuuf mootummaa biyyattii waliin waliigalteen raawwatte jalaa haqamuun booda qarshii kennamuufiif ture kaffalamuu qaba jechuun himannaa banteetti.

    Mootummaan Ruwaandaa mana murtii ijibbaataa Neezarlaandis keessatti himannaa kana kan bane.

    Mootummaan biyyattii, UK'n kooluugaltoota muraasa gara Ruwaandaa erguuf turte raawwachuu qabdi jechuun falmeera.

    Mootummaan paartii duudhaa duriitti cichu yeroo aangoorra ture UK'n kooluugaltoota Ruwaandaa simattuuf akka tahuufi diinagdee ishee deeggaruuf qarshii kaffaluuf waliigalee ture.

    Haa tahu malee yeroo MM Kar Istaamar bara 2024 aangootti dhufan waliigaltichi addaan citeera.

    Ministarri Dhimma Biyya Keessaa UK qarshiin paawundii miiliyoona 220 ''gara fuulduraatti'' Ruwaandaaf kaffalama jedhame akka hin kaffalamne himeera.

    Qarshiin akka kennamu waliigalame maallaqa uummata gibira kaffaluurraa akka tahes beeksiseera.

    BBC'n qondaalota mootummaa Ruwaandaa dubbisuuf yaalus hin milkoofne.

18. 28 Amajjii 2026Ispeen godaantota miliyoona walakkaa sanada hin qabnef beekamtii seeraa kennuuf

    

    Madda suuraa, Europa Press via Getty Images

    Mootummaan Ispeen godaantota sanada hin qabneef beekamtii seeraa kannuufii akka barbaaddu beeksiste. Tarkaanfiin mootummaan biyyattii ifa godhe kun yoo xiqqaate namoota miliyoona walakkaa fayyada jedhamee eegama.

    Beekamtiin seeraa kan kennamuuf lammilee alaa galmee yakkaa hin qabneefi Mudde 31, 2025 dura yoo xiqqaate ji'oota shaniif Ispeen keessa jiraachuu isaanii mirkaneessuu danda'aniifidha.

    Ministirri dhimma, Hawaasummaafi Godaansaa Ispeen Eelmaa Saayiz, "kun biyya keenyaaf guyyaa seena qabeessadha," jedhaniiru.

    Akka karoora mootummaatti, godaantonni tarkaanfii kanarraa fayyadaman, jalqabarra hayyama jireenyaa waggaan tokkoo kan kennamuuf yoo ta'u, yeroon isaa dhumnaan dheereffamuufiif danda'a.

    Mootummaan kana keessa galuuf gaaffiiwwan dhiyaatu fudhachuu kan jalqabu Ebla irraa kaasee akka ta'e ibseera. Hanga Waxabajji dhumaatti banaa ta'ee tura.

    Ispeen waggoota dhiyootiin asitti adda durummaan godaantota lakkoofsa guddaan Ameerikaa Kibbaarraa dhufan keessummeessaa jirti.

19. 28 Amajjii 2026Giiftii dureen duraanii Kooriyaa Kibbaa matta'aa fudhachuun hidhaa baatii 20'n adabamte

    

    Madda suuraa, AFP

    Haati warraa pireezidantii duraanii Kooriyaa Kibbaa waldaa Unification Church fudhatteetti jedhamuun hidhaa ji'a 20'n adabamte.

    Haa tahu malee dubartiin ganna 52 Kiim Kiyoon Hii himannaa gatii gabaa istookii waliin dhahuufi filannoo bara 2022 dura qorannoo yaada uummataa dhaabbata siyaasaa dhimma kana mijeessurraa fudhatteetti jedhanirraa bilisa baateetti.

    Pireezidantiin biyyattii duraanii Yuun aangoo akka malee fayyadamuufi haqni akka hin buune danquun bara 2024tti hidhaa waggaa shaniin adabameera.

    Seenaa Kooriyaa Kibbaa keessatti haati warraafi abbaan warraa yeroo tokkotti adabamuun kan jalqabaati.

20. 28 Amajjii 2026Miseensi Kongireesii Ilhaan Omaar osoo haasaa taasiftuu dhagala'aa waliinsaa hin beekamneen haleelamte

    

    Madda suuraa, Getty Images

    Miseensi Kongireesii Mineesotaa Ilhaan Omar Kibxata kaleessaa galma walga'ii bakka isheen waltajjii irratti dubbataa turtetti dhangal'aa ammaaf waliinsaa hin beekamneen haleelamuu ishee poolisiin Miniyaappoolis beeksiseera.

    Namichi tokko walga'ii ummataa sanarratti erga gara isheen waltajjii irra jirtutti dhiyaateen booda waan dhangala'aa wayii yeroo itti biifu viidiyoon agarsiisu qoodameera.

    Omaar garuu osoo hin miidhamiin dhaabattee mul'atti. Namichi kun battalumatti to'annoo jala oolfamuu fi bakka balaan kun itti dhaqqabe sanatti qorannoon fooransikii gaggeeffamaa akka ture poolisiin ibseera.

    Hiriirri ummataa tibbana magaalaa Miniyaappooliis keessatti geggeeffamaa kan ture yoo ta'u, Ilhaan Omaar gocha hojjatootni Immigireeshiinii fi Gumurukaa Minisootaa keessatti raawwatan balaaleffachaa ture.

    "Gargaartoota ishee keessaa tokkotu yaadannoo irraa waa ilaaltu ykn waan akkasii isheef kennuudhaaf ol ba'e natti fakkaate," jette dubartiin Jaakulaayeen Goosling jedhamtu kan galma sana keessa turte.

    Odeeffannoo dabalataaf